فيديو: تحديد الترتيب الصحيح لمجموعة أعداد تتضمن قيمة مطلقة

طلبت معلمة من طلابها ترتيب الأعداد |١٥|، −٣، |−٥|، ٢ من الأكبر إلى الأصغر. رتبهم زيدان كالآتي −٣، ٢، |−٥|، |١٥|، في حين أن وحيد رتبهم |١٥|، |−٥|، ٢، −٣. من الذي رتبهم ترتيبًا صحيحًا؟

٠٢:٥٦

‏نسخة الفيديو النصية

طلبت معلمة من طلابها ترتيب الأعداد: القيمة المطلقة لخمستاشر، وسالب تلاتة، والقيمة المطلقة لسالب خمسة، واتنين، من الأكبر إلى الأصغر. رتبهم زيدان كالآتي: سالب تلاتة، واتنين، والقيمة المطلقة لسالب خمسة، والقيمة المطلقة لخمستاشر. في حين إن وحيد رتبهم: القيمة المطلقة لخمستاشر، والقيمة المطلقة لسالب خمسة، واتنين، وسالب تلاتة. من الذي رتبهم ترتيبًا صحيحًا؟

يعني معطى عندنا الأعداد اللي في السؤال دي، ومطلوب مننا نرتبهم من الأكبر إلى الأصغر، وبعد كده هنشوف الترتيب اللي إحنا اللي رتبناه ده عشان نعرف مين اللي رتبهم ترتيب صحيح هل زيدان ولا وحيد، وهنلاحظ في الأعداد اللي عايزين نرتبها إن عندنا قيم مطلقة، وخلينا نفتكر إن القيمة المطلقة لأي عدد بتساوي قيمة العدد بغض النظر عن إشارته، يعني مثلًا القيمة المطلقة لخمستاشر بتساوي خمستاشر، والقيمة المطلقة لسالب خمسة بتساوي خمسة، فمعنى كده إن دايمًا القيمة المطلقة لأي عدد هتكون عدد موجب، إلا في حالة إننا بنوجد القيمة المطلقة لصفر فبتفضل صفر زي ما هي، لأن الصفر ولا موجب ولا سالب، فهنبدأ نرتب الأعداد اللي عندنا من الأكبر إلى الأصغر، فلما نيجي نرتب هنلاحظ إن أكبر عدد عندنا هو القيمة المطلقة لخمستاشر، بعد كده هنشوف العدد اللي أقل منه على طول، يعني تاني أكبر عدد عندنا، فهنلاحظ إن القيمة المطلقة لسالب خمسة هي تاني أكبر عدد؛ لأن قيمتها هتبقى بتساوي خمسة، بعد كده هيتبقى عندنا سالب تلاتة واتنين، وبما إننا بنرتب من الأكبر إلى الأصغر فهيبقى الأكبر هو اتنين، وأصغر عدد عندنا هو سالب تلاتة؛ فبالتالي هيبقى ترتيب الأعداد من الأكبر للأصغر هو: القيمة المطلقة لخمستاشر، والقيمة المطلقة لسالب خمسة، واتنين، وسالب تلاتة؛ فهيبقى هو ده الترتيب الصحيح.

بعد كده عايزين نعرف مين اللي رتبهم ترتيب صحيح، فهنلاحظ إن الترتيب اللي رتبه زيدان مختلف عن الترتيب اللي إحنا رتبناه؛ فبالتالي هيبقى ترتيب خاطئ، بعد كده هنشوف الترتيب إلى رتبه وحيد، فهنلاحظ إن الترتيب اللي وحيد رتبه نفس الترتيب اللي إحنا رتبناه، فمعنى كده إن اللي رتبهم ترتيب صحيح هو وحيد؛ عشان هو اللي رتب الأعداد ترتيب صحيح من الأكبر إلى الأصغر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.