فيديو: إيجاد الكسور المتكافئة

يوضح الفيديو الكسور المتكافئة؛ وهي الكسور المعبِّرة عن نفس الكمية ولها نفس القيمة، وكيفية إيجادها.

٠٣:٣٣

‏نسخة الفيديو النصية

إيجاد الكسور المتكافئة.

في الفيديو ده هنتكلم عن الكسور المتكافئة، وإزاي بنوجدها. بنسمّي كل كسرين أو أكتر بيعبّروا عن نفس الكمية، بالكسور المتكافئة. والكسور المتكافئة بيكون ليها نفس القيمة. يعني مثلًا لو مكتبة من تلات رفوف، وعاوزين نعبّر عن الكُتُب الموجودة في رف واحد بس، فهنقول إنها تقريبًا واحد على تلاتة من الكُتُب، أو تِلت الكُتُب. فلو مثلًا الدائرة دي بتعبّر عن واحد كامل، أو المكتبة كاملة؛ فهتبقى الكُتُب الموجودة في رف واحد بتمثّل الجزء الملوّن في الدائرة دي. يعني لو الدائرة الكاملة هي كل الكُتُب، فبنعبّر عن كُتُب رفّ واحد بإننا نلوّن تِلت الدائرة بس.

طيب لو بدل ما نقسّم الدائرة لتلات أجزاء قسّمناها لست أجزاء. ففي الحالة دي عشان نعبّر عن الكُتُب اللي موجودة في رف واحد، هنلوّن قد إيه من الدائرة؟ هنلاقي إننا لو لوّنّا جزئين من الست أجزاء، فهيساووا الجزء اللي لوّنّاه من الدائرة الأولى من تلات أجزاء. فممكن نقول هنا إن واحد على تلاتة من الدائرة الأولى بتساوي اتنين على ستة من الدائرة التانية؛ لأن الجزء الملوّن في الدائرتين متساوي. وفي الحالة دي بنسمّي الكسرين واحد على تلاتة، واتنين على ستة، كسور متكافئة. يعني ممكن نعبّر عن الكُتُب اللي موجودة في رف واحد؛ إمّا إنها بواحد على تلاتة من الكُتُب، أو إنها اتنين على ستة من الكُتُب.

أوجد كسر مكافئ للكسر واحد على اتنين. لو قسّمنا مستطيل إلى جزئين متساويين، ولوّنّا جزء منهم، فده كده معبّر عن الكسر واحد على اتنين. فلو قسّمنا المستطيل نفسه إلى أربع أجزاء، فمحتاجين نلوّن منهم قد إيه عشان الجزء الملوّن في المستطيل التاني يساوي الجزء الملوّن في المستطيل الأول؟ هنلاقي إننا محتاجين نلوّن جزئين من الأربع أجزاء. يعني ممكن نعبّر عنه بالكسر اتنين على أربعة. وده معناه إن واحد على اتنين بيساوي اتنين على أربعة. وإن الكسرين واحد على اتنين، واتنين على أربعة، هم كسرين متكافئين. نلاحظ إن الكسر واحد على اتنين بيعبّر عن جزء من جزئين متساويين. وإن الكسر اتنين على أربعة بيعبّر عن جزئين من أربع أجزاء متساوية.

أوجد كسر مكافئ للكسر تلاتة على خمسة. هنعبّر عن الكسر تلاتة على خمسة بالشكل ده. ولو قسّمنا نفس الشكل لعَشر أجزاء بدل خَمس أجزاء، يعني قسّمنا كل جزء من الخمسة إلى جزئين. فهنبقى محتاجين نلوّن كام جزء عشان يبقى الجزء الملوّن في الشكل التاني، بيساوي الجزء الملوّن في الشكل الأول؟ هنلاقي إننا محتاجين نلوّن ست أجزاء، يعني ستة على عشرة من الشكل. يعني ممكن نقول إن الكسرين تلاتة على خمسة، وستة على عشرة، هما كسرين متكافئين. وإن تلاتة على خمسة بيساوي ستة على عشرة.

يبقى في الفيديو ده عرفنا يعني إيه كسور متكافئة. وهي الكسور اللي بتعبّر عن نفس الكمية، أو ليها نفس القيمة. وعرفنا إزاي بنوجدها.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.