فيديو: نموذج تدريب امتحان الفيزياء • ٢٠١٩ • السؤال الثالث والأربعون ب

نموذج تدريب امتحان الفيزياء • ٢٠١٩ • السؤال الثالث والأربعون ب

٠٣:٢٨

‏نسخة الفيديو النصية

وضِّح بالرسم كيفية توصيل ثلاث مقاومات، قيمتها: اتنين أوم، وتلاتة أوم، وستة أوم؛ للحصول على مقاومة مكافئة قيمتها أربعة أوم.

ففيه تلات مقاومات قيمتهم: اتنين أوم، وتلاتة أوم، وستة أوم. مطلوب إننا نوصّلهم بطريقة معينة. علشان المقاومة المكافئة للتلات مقاومات تبقى بتساوي أربعة أوم. فممكن علشان نحدّد طريقة التوصيل، نجرّب كل الطرق اللي ممكن نوصّل بيها التلات مقاومات. ونحسب القيمة المكافئة لكل طريقة منهم. ولكن المشكلة في طريقة الحل دي، إنها هتستهلك وقت كتير. فعلشان نقلّل الوقت اللي هنستهلكه ده، محتاجين نسترجع قاعدتين.

القاعدة الأولى: إن المقاومة المكافئة لمقاومات متوصّلة على التوازي، لازم قيمتها تبقى أقل من قيمة أقل مقاومة موجودة في التوصيل. يعني مثلًا لو وصّلنا التلات مقاومات اللي موجودين في المسألة على التوازي … فمن القاعدة دي، نقدر نستنتج إن لازم المقاومة المكافئة ليهم، تبقى أقل ما قيمة أقل مقاومة موجودة في التلات مقاومات. يعني لازم المقاومة المكافئة تبقى أقل من اتنين أوم. فده يخلينا نستبعد طريقة التوصيل دي من قبل ما نرسمها، عن طريق استخدام القاعدة دي.

والقاعدة التانية: إن المقاومة المكافئة للمقاومات متوصّلة على التوالي، لازم هتبقى أكبر من قيمة أكبر مقاومة في المقاومات. فمثلًا لو وصّلنا التلات مقاومات على التوالي، فالمقاومة المكافئة هتبقى مجموعهم. وهنلاقيها بتساوي ستة أوم، زائد تلاتة أوم، زائد اتنين أوم. فده يخلينا نستنتج إن طريقة التوصيل دي أكيد مش هتنفع من قبل ما نرسمها. وكمان يخلينا نستنتج إن المقاومة الستة أوم ما ينفعش تتوصّل على التوالي مع أي مقاومة تانية، وتدّينا مقاومة مكافئة أقل منها.

يعني المقاومة الستة أوم لازم هتبقى متوصّلة مع التلاتة أو الاتنين أوم على التوازي. والمقاومة اللي هتفضل هتبقى متوصّلة على التوالي مع المقاومة المكافئة للمقاولين اللي على التوازي. فكده إحنا عرفنا نختصر طرق التوصيل لطريقتين بس. الطريقة الأولى إن الستة أوم تبقى متوصّلة على التوازى مع الاتنين أوم. والمقاومة المكافئة ليهم متوصّلة على التوالي مع التلاتة أوم. والطريقة التانية إن الستة أوم متوصّلة على التوازي مع التلاتة أوم. والمقاومة المكافئة ليهم متوصّلة على التوالي مع الاتنين لاوم. لأن زي ما قلنا، لازم الستة أوم تبقى متوصّلة على التوازي مع أي مقاومة من الاتنين.

والمقاومة المكافئة لمقاومتين متوصّلين على التوازي، بتساوي حاصل ضرب المقاومتين، على حاصل جمع المقاومتين. فممكن كده نقول إن المقاومة المكافئة لطريقة التوصيل الأولى بتساوي تلاتة أوم، زائد المقاومة المكافئة للمقاومتين المتوصّلين على التوازي. واللي بتساوي ستة أوم في اتنين أوم، على ستة أوم زائد اتنين أوم. وده هيدّينا إن المقاومة المكافئة لطريقه التوصيل دي، بتساوي أربعة وخمسة من العشرة أوم. فنقدر كده نقول إن طريقة التوصيل دي مش هي المطلوبة. لأن المطلوب إن المقاومة المكافئة تبقى أربعة أوم.

أما طريقة توصيل التانية، فهنلاقي إن المقاومة المكافئة فيها بتساوي اتنين أوم، زائد المقاومة المكافئة للمقاومتين المتوصّلين على التوازي. واللي بتساوي ستة أوم في تلاتة أوم، على ستة أوم زائد تلاتة أوم. وبالفعل المقاومة المكافئة لطريقة التوصيل دي، هتبقى بتساوي أربعة أوم. وبكده نبقى عرفنا نوضّح بالرسم طريقة توصيل تلات مقاومات. بحيث المقاومة المكافئة بتاعتهم تبقى قيمة معينة. بمعرفة إن المقاومة المكافئة لأي مقاومات متوصّلة على التوازي، بتبقى أقل من أقل مقاومة فيهم. وإن المقاومة المكافئة لمجموعة مقاومات متوصّلين على التوالي، لازم تبقى أكبر من أكبر مقاومة فيهم.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.