فيديو: إيجاد قياس زاوية في شكل رباعي بمعلومية العلاقة بين قياسات زواياه

في الشكل الرباعي ﺃﺏﺟد، إذا كان ق∠ﺃ = ٣ ق∠ﺏ = ٣ ق∠ﺟ = ٧٢°، فأوجد ﻕ∠د.

٠٣:٣٧

‏نسخة الفيديو النصية

في الشكل الرباعي أ ب ﺟ د. إذا كان قياس الزاوية أ يساوي تلاتة قياس الزاوية ب، يساوي تلاتة قياس الزاوية ﺟ، يساوي اتنين وسبعين درجة. فأوجد قياس الزاوية د.

وأول حاجة، خلّينا نشوف المعطيات اللي عندنا في السؤال. فهنلاحظ إن قياس زاوية أ بتساوي اتنين وسبعين درجة. وهيبقى ده أول معطى عندنا. بعد كده هنلاحظ إن معطى عندنا تلاتة قياس الزاوية ب بيساوي تلاتة قياس الزاوية ﺟ بيساوي اتنين وسبعين درجة. فخلّينا الأول نشوف الزاوية ب. فمعطى عندنا إن تلاتة قياس الزاوية ب بتساوي اتنين وسبعين درجة. فمعنى كده إننا عشان نوجد قياس الزاوية ب، يبقى هنقسم طرفَي المعادلة على تلاتة.

فهنيجي عند الطرف الأيمن للمعادلة، لمّا هنقسم تلاتة قياس الزاوية ب على تلاتة، فهنقسم البسط والمقام على تلاتة. فبالتالي هيبقى الطرف الأيمن للمعادلة هو قياس الزاوية ب. وأمَّا الطرف الأيسر للمعادلة، فهنقسم اتنين وسبعين على تلاتة. فلمّا نحسبها هتبقى بتساوي أربعة وعشرين. فبالتالي هيبقى قياس الزاوية ب بيساوي أربعة وعشرين درجة. وبما إن معطى عندنا في السؤال إن تلاتة قياس الزاوية ب يساوي تلاتة قياس الزاوية ﺟ. فمعنى كده إن قياس الزاوية ب بيساوي قياس الزاوية ﺟ. فبالتالي هيبقى قياس الزاوية ﺟ بتساوي أربعة وعشرين درجة. فكده بقى عندنا قياس الزاوية أ، وقياس الزاوية ب، وقياس الزاوية ﺟ.

والمطلوب في السؤال إننا نوجد قياس الزاوية د. وخلّينا نفتكر إن مجموع قياسات زوايا الشكل الرباعي بتساوي تلتمية وستين درجة. فمعنى كده إن في الشكل الرباعي أ ب ﺟ د هيبقى عندنا مجموع قياسات الزوايا أ وَ ب وَ ﺟ وَ د بيساوي تلتمية وستين درجة. فبالتالي هيبقى قياس الزاوية أ، زائد قياس الزاوية ب، زائد قياس الزاوية ﺟ، زائد قياس الزاوية د بيساوي تلتمية وستين درجة.

وإحنا من المعطيات اللي عندنا، قدرنا نوجد قياسات الزوايا أ وَ ب وَ ﺟ. فهنعوّض بيهم في المعادلة. فهيبقى عندنا اتنين وسبعين درجة، اللي هي قياس زاوية أ. زائد أربعة وعشرين درجة، اللي هي قياس زاوية ب. زائد أربعة وعشرين درجة، اللي هي قياس زاوية ﺟ. زائد قياس الزاوية د. بيساوي تلتمية وستين درجة. فبعد كده هنجمع اتنين وسبعين، زائد أربعة وعشرين، زائد أربعة وعشرين. فلمّا نجمعهم هيبقوا بيساووا مية وعشرين درجة. فهتبقى المعادلة هي مية وعشرين درجة زائد قياس الزاوية د بتساوي تلتمية وستين درجة.

فعشان نوجد قياس الزاوية د، يبقى هنطرح مية وعشرين من طرفَي المعادلة. فلمّا نطرح مية وعشرين درجة من طرفَي المعادلة، هيبقى الطرف الأيمن مية وعشرين زائد قياس الزاوية د ناقص مية وعشرين، فهيساوي قياس الزاوية د. وأمَّا الطرف الأيسر للمعادلة، لمّا نطرح تلتمية وستين درجة ناقص مية وعشرين درجة، هتساوي ميتين وأربعين درجة. وبالتالي هيبقى قياس الزاوية د بيساوي ميتين وأربعين درجة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.