فيديو: تحديد أيُّ مجموعة من التحويلات من الأعداد العشرية إلى الكسور أو الأعداد الكسرية ليست صوابًا

أيّ من العبارات الآتية غير صحيح؟ [أ] ٦٫٦٥ = ٢٠/١٣ ٦ [ب] ٠٫٣٧٥ = ٨/٣ [ج] ٠٫٢ = ٥/١ [د] ١١٫٢ = ٥٠/١١ ١١

٠٤:٢٠

‏نسخة الفيديو النصية

أيّ من العبارات الآتية غير صحيح؟ الاختيار الأول: ستة وخمسة وستين من مية يساوي ستة، وتلتاشر على عشرين. الاختيار التاني: تلتمية خمسة وسبعين من ألف يساوي تلاتة على تمنية. الاختيار التالت: اتنين من عشرة يساوي واحد على خمسة. الاختيار الرابع: حداشر واتنين من عشرة يساوي حداشر، وحداشر على خمسين.

هنختبر دلوقتي صحة كل عبارة من العبارات اللي عندنا. العبارة اللي بتمثّل الاختيار الأول مذكور فيها إن ستة وخمسة وستين في المية [من مية] يساوي ستة، وتلتاشر على عشرين. عايزين نشوف هو ستة وخمسة وستين في المية [من مية] لو جينا نكتبها على صورة عدد كسري، هتبقى بتساوي كام.

ستة وخمسة وستين من مية معناها ستة، وخمسة وستين على مية. نقدر نبسّطها، أو نبسّط الجزء الكسري اللي في العدد الكسري اللي عندنا، بإننا نقسم البسط والمقام على خمسة. دلوقتي هنقسم خمسة وستين على خمسة. ستة عَ الخمسة فيها واحد، ويتبقّى واحد. خمستاشر عَ الخمسة فيها التلاتة. دلوقتي هنقسم المية على الخمسة. عشرة عَ الخمسة فيها الاتنين، وصفر عَ الخمسة تساوي صفر. يبقى العدد الكسري المكافئ هو: ستة، وتلتاشر على عشرين. يعني العبارة دي صحيحة.

دلوقتي هنختبر صحة العلاقة التانية. عايزين نشوف تلتمية خمسة وسبعين من ألف إيه الكسر اللي بيكافئه. دلوقتي نقدر نكتبها على صورة كسر مقامه ألف؛ لأن ده عدد عشري بيتكوّن من أجزاء من ألف. فنقدر نكتبه على شكل كسر مقامه ألف.

نقدر نبسّطه أكتر بإننا نقسم البسط والمقام على خمسة. هنبدأ بقسمة البسط. سبعة وتلاتين على خمسة فيها سبعة. خمسة في سبعة بخمسة وتلاتين، ويتبقّى اتنين. خمسة وعشرين على خمسة تساوي خمسة. وبعدين نقسم المقام على الخمسة. عشرة عَ الخمسة فيها الاتنين. وبعدين صفر عَ الخمسة تساوي صفر، وصفر عَ الخمسة يساوي صفر. يبقى خمسة وسبعين على ميتين.

نقدر نختصره أكتر بالقسمة على خمسة مرة أخرى. هنبدأ بقسمة البسط، خمسة وسبعين على خمسة. سبعة عَ الخمسة فيها الواحد، ويتبقّى اتنين. يبقى خمسة وعشرين على الخمسة هتساوي خمسة. وبعدين نقسم المقام. عشرين على خمسة فيها أربعة، وصفر عَ الخمسة فيها الصفر. خمستاشر على أربعين.

نقدر نختصر لسه أكتر من كده، ونقسم مرة تالتة البسط والمقام على خمسة. خمستاشر عَ الخمسة تساوي تلاتة، وأربعين عَ الخمسة تساوي تمنية. يبقى الكسر المكافئ لتلتمية خمسة وسبعين من ألف هو تلاتة على تمنية. يبقى العبارة دي صحيحة.

دلوقتي هنختبر صحة الاختيار التالت. عايزين نشوف اتنين من عشرة ده بيكافئ كسر إيه. اتنين من عشرة بنقدر نكتبها على شكل كسر مقامه عشرة بالشكل ده، يعني اتنين على عشرة. ونقدر نبسّطه أكتر بقسمة البسط والمقام على اتنين. لمّا نقسم البسط على اتنين هيساوي واحد. والمقام على اتنين هيساوي خمسة. يبقى اتنين من عشرة بيساوي واحد على خمسة. يبقى العبارة دي صحيحة.

دلوقتي هنختبر صحة آخر اختيار عندنا. عايزين نشوف إيه العدد الكسري اللي بيكافئ حداشر واتنين من عشرة. حداشر واتنين من عشرة نقدر نكتبها بالشكل ده: حداشر، واتنين على عشرة. اللي ممكن نبسّطها أكتر، وتبقى حداشر، ونبسّط الجزء الكسري ده بقسمة بسطه ومقامه على اتنين، زي الخطوة اللي فاتت، أو الاختيار اللي فات. فيبقى حداشر، وواحد على خمسة. طب هو اللي مكتوب عندنا في العبارة إن حداشر واتنين من عشرة بيكافئ أو بيساوي حداشر، وحداشر على خمسين. طبعًا الاختيار ده غير صحيح.

يبقى إيه العبارة الوحيدة الغير صحيحة؟ هي إن حداشر واتنين من عشرة يساوي حداشر، وحداشر على خمسين. يبقى هي دي العبارة الوحيدة غير الصحيحة الموجودة في العبارات اللي عندنا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.