فيديو: الزوايا وقياسها بالدرجات

يوضِّح الفيديو مفهوم الزاوية، وطريقة تسميتها، وطرق قياس الزوايا بالدرجات.

١٢:١٧

‏نسخة الفيديو النصية

الزوايا وقياسها بالدرجات.

هنبدأ نعرف يعني إيه زاوية. وإزاي نقدر نقيسها.

لو عندنا الشعاع أ ب بالشكل ده. والشعاع أ ج بالشكل ده. عندنا الشعاعين أ ب وَ أ ج، ليهم نفس البداية وهي نقطة أ. وبالتالي نقدر نقول على المسافة الموجودة بينهم إن هي زاوية. وبالتالي نقدر نقول إن الزاوية هي اتحاد شعاعين لهما نفس نقطة البداية. نقدر نسمي نقطة البداية إن هي رأس الزاوية. وكلٍّ من الشعاعين أ ب وَ أ ج اسمهم ضلع الزاوية.

طب كده عرفنا يعني إيه زاوية. عايزين نعرف إزَّاي نقدر نسمي الزاوية. الزاوية ممكن نسميها بطريقتين. أول حاجة هنكتب الزاوية … أول طريقة هنبدأ بنقطة ب. نقول ب أ ج. يبقى هنكتب ب أ ج. ممكن نسميها بطريقة تانية، هنكتب الزاوية … وهنسميها ج أ ب. يبقى هنكتب ج أ ب. في كل من الطريقتين هنلاحظ إن نقطة تقاطع الشعاعين اللي هي رأس الزاوية، موجودة في النص. أيًّا كان بدأنا من عند ب أو بدأنا من عند ج. ممكن كمان نشيل كلمة الزاوية، ونعبر عنها بالعلامة دي. يبقى نقدر نقول الزاوية زاوية ب أ ج، وزاوية ج أ ب. وبكده عرفنا إزَّاي نسمي أو نكتب الزاوية.

هنجيب صفحة جديدة.

لو عندنا خطين بالشكل ده. الخطين دول متوازيين. هل ينفع يكوّنوا زوايا؟ لا، مش هينفع يكونوا زوايا؛ لأن … عفوًا … لأن الخطين غير متقاطعين. طب لو الخطين تقاطعوا بالشكل ده في نقطة و. هنلاحظ إن هينتج من التقاطع أربع زوايا. الزوايا دي عايزين نعرف نسميهم إزَّاي. هنرقّم الزوايا؛ عشان نعرف نسميها. هنسمي دي واحد، ودي اتنين، ودي تلاتة، ودي أربعة.

هنبدأ أول حاجة بالزاوية رقم واحد؛ هنسميها إزَّاي. ممكن نسميها بطريقتين. أول طريقة أ و ج. يبقى هنكتب زاوية أ و ج. وممكن نكتبها بالعكس، وهي زاوية ج و أ. بحيث إن تبقى نقطة التقاطع أو رأس الزاوية موجودة في النص.

تاني حاجة عايزين نسمي الزاوية رقم اتنين. هنبدأ منين؟ ممكن نقول إن الزاوية اسمها ج و ب، أو العكس. يبقى نقدر نقول إن هي زاوية ج و ب، أو نسميها بالعكس، هتبقى زاوية ب و ج.

تالت حاجة عايزين نسمي الزاوية رقم تلاتة. ممكن نبدأ من النقطة د. يبقى اسمها د و ب. أو العكس، اللي هي ب و د. يبقى الزاوية رقم تلاتة هي زاوية د و ب، أو ممكن نسميها زاوية ب و د.

آخر زاوية موجودة عندنا هي الزاوية رقم أربعة. نبدأ نشوف هنسميها إزَّاي. ممكن نسميها د و أ. أو العكس، أ و د. وبالتالي هتبقى زاوية د و أ، أو زاوية أ و د.

يبقى لو عندنا خطين متقاطعين في نقطة، نقدر نسمي الزوايا اللي نتجت عن تقاطع الخطين. طب نفرض إن الخطين المتقاطعين مش عليهم أي رموز بالشكل ده. هنسميهم إزَّاي؟ ممكن نعمل قوس بين كل خطين متقاطعين عند نقطة. يبقى دي نقطة التقاطع. يبقى نعمل قوس بين الخطين دول، وقوس بين الخطين دول، وقوس كده، وقوس كده. ونبدأ نكتب هنا مثلًا أ. هنا ب. هنا ج. هنا د. يبقى نقدر نسمي الزوايا دي إزَّاي، أو نكتبها إزَّاي … هنسميها زاوية أ، وزاوية ب، وزاوية ج، وزاوية د.

هنلاحظ إن الزوايا اللي موجودة عندنا مختلفة. يعني مثلًا الزاوية دي أصغر من الزاوية دي. هل الزوايا ليها أشكال؟ آه ليها. هنبدأ نجيب صفحة جديدة، ونشوف إزَّاي.

الزاوية ممكن تبقى بالشكل ده. أو ممكن تبقى كبيرة بالشكل ده. يعني الزاوية ممكن تبقى زاوية صغيرة زي زاوية ب أ ج. أو ممكن تبقى زاوية كبيرة زي زاوية س ص ع. هل ده بيفرق في تسمية الزاوية؟ لأ مش بيفرق. طب عايزين نعرف إيه هي طرق قياس الزوايا. يعني زاوية زيّ زاوية ب أ ج، أو زاوية س ص ع، نقدر نقيسها إزَّاي. وإمتى نقدر نقول على الزاوية دي إنها كبيرة أو إنها زاوية صغيرة.

بنستخدم حاجة اسمها المنقلة بتساعدنا على قياس الزوايا بالدرجات. وبتكون بالشكل ده. المنقلة بتبقى مقسّمة إلى درجات من صفر درجة إلى مية وتمانين درجة. وكل علامة بتزيد عن اللي بعديها بعشر درجات.

لو عندنا أي زاوية وعايزين نقيسها باستخدام المنقلة. عايزين نعرف نقيسها إزَّاي. بنيجي عند رأس الزاوية يعني أ. ونبدأ نحطها في النص هنا بالشكل ده. يبقى هنيجي نحط أ هنا، ونبدأ نحط الضلع أ ج بالشكل ده. يبقى هنا هيبقى عندنا أ. وهنا ج. يبقى أ في النقطة دي، وَ ج عند الصفر. الضلع التاني للزاوية اللي هو أ ب، هيحدّد قياس الزاوية. يعني مثلًا لو ب بتيجي هنا، يبقى نقدر نقول في الحالة دي إن قياس زاوية ب أ ج تساوي أربعين درجة.

طب لو عايزين نقيس زاوية س ص ع، هنقيسها إزَّاي؟ نفس الكلام. هنيجي عند الضلع ص ع ونحطه هنا بالشكل ده. هيبقى كده مثلًا باللون الأزرق. هنا مثلًا ص وهنا ع. هنيجي نحط الضلع التاني اللي هو س ص. هييجي مثلًا عند النقطة دي بالشكل ده. وبالتالي نقدر نقول إن قياس زاوية س ص ع تساوي مية وتلاتين درجة.

يبقى إحنا فعلًا بمجرد النظر لقينا إن زاوية ب أ ج أصغر من زاوية س ص ع. وفعلًا بدأنا نقيس بالمنقلة، لقينا إن زاوية … إن قياس زاوية ب أ ج أربعين درجة. وقياس زاوية س ص ع مية وتلاتين درجة. وبالفعل أربعين أصغر من مية وتلاتين.

طب هنبدأ نرسم المنقلة في صفحة جديدة، ونبدأ نتعرف بصورة مبدئية على أنواع الزوايا.

لو عندنا المنقلة بالشكل ده. ولقينا إن ضلعي الزاوية الاتنين موجودين عند الصفر. في الحالة دي نقدر نقول على الزاوية إنها زاوية صفرية.

ولو عندنا أحد ضلعي الزاوية عند الصفر، والضلع التاني موجود عند تسعين درجة. ففي الحالة دي هنقول على الزاوية إنها زاوية قائمة؛ يعني قياس الزاوية تسعين درجة.

لكن لو عندنا أحد ضلعي الزاوية عند الصفر برضو، والضلع التاني موجود عند مية وتمانين درجة بالشكل ده؛ في الحالة دي هنقول على الزاوية إنها زاوية مستقيمة.

يبقى كده قلنا تلات أنواع من الزاوية. زاوية صفرية، لو ضلعَي الزاوية موجودين عند الصفر. وزاوية قائمة، لو أحد الضلعين عند الصفر والضلع التاني عند تسعين درجة. وزاوية مستقيمة، لو أحد ضلعي الزاوية عند الصفر والضلع التاني عند مية وتمانين درجة.

طب لو في حالة إن أحد ضلعي الزاوية موجود عند الصفر، والضلع التاني موجود في المسافة اللي موجودة بين الصفر لحدّ تسعين درجة. يعني أكبر من الصفر وأصغر من تسعين درجة. في الحالة دي هنقول على الزاوية إنها زاوية حادة.

طب لو في حالة قياس الزاوية أكبر من تسعين درجة، وأصغر من مية وتمانين درجة. يعني موجودة في الجزء ده. في الحالة دي هنسمي الزاوية إنها زاوية منفرجة.

يبقى لو قياس الزاوية أكبر من صفر وأصغر من تسعين درجة، هنسمي الزاوية إنها زاوية حادة. ولو الزاوية أكبر من تسعين درجة وأصغر من مية وتمانين درجة، هنسمي الزاوية زاوية منفرجة.

يبقى كده فهمنا يعني إيه زاوية. وإزاي نقدر نسميها. وإزاي كمان نقدر نقيسها بالمنقلة. وإن قياس الزوايا بيبقى بالدرجات. وقدرنا كمان نوضح بصورة مبدئية أنواع الزوايا، وهي: زاوية صفرية، وزاوية حادة، وزاوية قائمة، وزاوية منفرجة، وزاوية مستقيمة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.