فيديو: القسمة والكسور

يوضح الفيديو استعمال الكسور لتمثيل القسمة، وأمثلة توضيحية.

٠٤:٤٠

‏نسخة الفيديو النصية

القسمة والكسور.

هنتكلم عن إزاي إن الكسر ممكن يمثّل عملية قسمة. لو عندنا كوب من اللبن، زيّ اللي قدامنا في الصورة ده. وعايزين نقسّمه على تلات أطباق بالتساوي، لإطعام تلات قطط. يا تري هيبقى نصيب كل قطة قدّ إيه من اللبن ده؟

هنلاقي إن نصيب كل قطة، نقدر نحدّده بإن إحنا نقسم كوب اللبن على تلاتة، اللي هو عدد القطط. يبقى نصيب كل قطة، واحد على تلاتة. نتيجة القسمة في الحالة دي، عبارة عن كسر أقل من الواحد. هنشوف في صفحة جديدة، إيه هو الكسر وتعريفه.

الكسر هو بيمثّل أجزاء متساوية من الكل، أو من مجموعة. وبتُستعمل الكسور لتمثيل القسمة. يعني في حالة المثال اللي إحنا استخدمناه من شوية، لو قسّمنا كوب الحليب لتلات أجزاء متساوية، هيبقى نصيب كل وعاء ثُلُث الكوب. يعني نقدر نكتبها بالشكل ده: واحد … عفوًا، واحد على تلاتة. كل وعاء من الأوعية، اللي هو نصيب كل قطة يعني، هيبقى ثُلُث الكوب.

أيّ كسر عندنا، زيّ التِّلت ده، بيتكوّن من جزئين. البسط، اللي هو العدد العلوي في الكسر، اللي هو في الحالة دي الواحد. ده اسمه البسط. وبيمثّل عدد الأجزاء. تلاتة هنا بيمثّل المقام … عفوًا، اسمه المقام. اللي هو العدد السفلي في الكسر. وبيمثّل عدد أجزاء الكل. يعني أيّ كسر بيتكوّن من البسط، على المقام. والبسط بيبقى عدد الأجزاء، والمقام هو عدد أجزاء الكل.

في المثال اللي عندنا هنا، يريد أحمد وكريم ويوسف، اقتسام فطيرتين بالتساوي. فكم سيكون نصيب كلٍّ منهم؟

هنرسم الفطيرتين، ونقسّم كل واحدة منها، إلى تلات أجزاء متساوية. لو قسّمناها على التلات ولاد بالتساوي، هنلاحظ إن نصيب كل واحد منهم، من كل فطيرة، ثُلُث الفطيرة. يبقى نصيب كل واحد منهم، من الاتنين، عبارة عن ثُلُثين. يبقى نقدر نقول: نصيب كل واحد منهم، اتنين على تلاتة، أو ثُلُثي الفطيرة.

في صفحة جديدة هنشوف مثال كمان. تريد كارما وسارة اقتسام تلات كعكات صغيرة بالتساوي. ما نصيب كلٍّ منهما؟

عندنا عدد تلات كعكات، هيتقسموا على شخصين، اللي هي كارما وسارة. يعني عندنا عملية قسمة: تلاتة على اتنين. دلوقتي هنشوف إزاي نقسّمهم. إحنا عندنا تلات كعكات، هيتقسّموا على كارما وسارة. فأول حاجة هنلاقي كعكة تاخدها كارما، وكعكة هتاخدها سارة. هيتبقى كعكة واحدة، هنقسمها نُصين. هيبقى نُص لكارما، ونُص لسارة. يعني بكده نقدر نقول إن كل واحدة فيهم أخدت كعكة ونص. فيبقى نصيب كلٍّ منهما واحد ونص كعكة.

اتكلمنا في الدرس ده على القسمة، وعلى الكسور. وإزاي إن الكسور ممكن تعبّر عن عملية القسمة. وعرفنا إن كل كسر بيتكوّن من جزئين. البسط، اللي هو الجزء العلوي من الكسر؛ واللي بيمثّل عدد الأجزاء. والمقام، اللي هو الجزء السفلي من الكسر؛ واللي بيمثّل عدد أجزاء الكل. ولازم لمّا نتعامل مع الكسور، نقسّم الأشياء أو الكميات، إلى أجزاء متساوية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.