تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تقدير حاصل ضرب الكسور والأعداد الكسرية والأعداد الصحيحة

أحمد لطفي

يوضح الفيديو كيفية تقدير حاصل ضرب الكسور والأعداد الكسرية والأعداد الصحيحة.

٠٦:٤٧

‏نسخة الفيديو النصية

هنتكلم عن تقدير حاصل ضرب الكسور والأعداد الكسرية والأعداد الصحيحة.

في البداية لو عندنا مثال بالشكل ده، مطلوب نقدّر الناتج واحد على أربعة في تلتاشر. واحد على أربعة في تلتاشر معناها محتاجين نِوجد رُبع التلتاشر. وعشان نِقدر نقدّر الناتج، محتاجين نِوجد مضاعف من مضاعفات العدد أربعة، ويكون قريب من التلتاشر، هنجد إن اتناشر هي من مضاعفات العدد أربعة، وقريبة من تلتاشر، وبالتالي واحد على أربعة في تلتاشر تقريبًا هتساوي واحد على أربعة في اتناشر.

بما إن اتناشر وأربعة هما عددان متوافقان، يعني عددان ممكن نقسمهم بسهولة؛ عشان اتناشر على أربعة هيساوي تلاتة؛ وده السبب اللي خلانا نكتب واحد على أربعة في تلتاشر تقريبًا هتساوي واحد على أربعة في اتناشر.

وممكن نِوجد قيمة واحد على أربعة في اتناشر، لو عندنا عمود بالشكل ده، ومتقسم لاتناشر مستطيل متساويين، هنقسّم الاتناشر مستطيل المتساويين إلى أربع مجموعات متساوية، وبالتالي المجموعة الواحدة هتمثّل واحد على أربعة، عشان هي بتمثل مجموعة واحدة من أربع مجموعات. هنجد إن بداخل المجموعة الواحدة تلات مستطيلات صغيرة، وبالتالي لما يكون عندنا اتناشر مستطيل، وعايزين نقسمهم لأربع مجموعات متساوية، المجموعة الواحدة هيكون فيها تلات مستطيلات، يعني واحد على أربعة في اتناشر هيساوي تلاتة، ويبقى واحد على أربعة في تلتاشر تقريبًا هتساوي تلاتة.

ويبقى كده قدرنا نقدّر ناتج واحد على أربعة في تلتاشر؛ يبقى واحد على أربعة في تلتاشر تقريبًا هتساوي تلاتة.

لو عندنا مثال آخر بالشكل ده، مطلوب نقدّر ناتج اتنين على خمسة من حداشر. عشان نقدّر ناتج اتنين على خمسة من حداشر، هنِوجد واحد على خمسة في حداشر، وهتبقى الخطوة الأولى إن إحنا محتاجين نِوجد مضاعف من مضاعفات العدد خمسة، ويكون قريب من حداشر، هنجد إن هو عشرة؛ وبالتالي واحد على خمسة في حداشر تقريبًا هتساوي واحد على خمسة في عشرة، وده بما إن عشرة وخمسة عددان متوافقان، يعني أقدر أوجد قسمتهم بسهولة؛ بحيث عشرة على خمسة هيساوي اتنين.

لو عايزين نِوجد ناتج واحد على خمسة في عشرة باستخدام طريقة الرسم. فلو عندنا عمود ومتقسم لعشر مستطيلات متساوية بالشكل ده، وقسّمت العمود لخمس مجموعات متساوية، هنجد إن المجموعة الواحدة بتحتوي على مستطيلين صغيرين؛ يبقى نقدر نقول المجموعة الواحدة، يبقى نقدر نقول إن المجموعة الواحدة بتحتوي على مستطيلين صغيرين، وبالتالي واحد على خمسة في عشرة هتساوي اتنين؛ يعني واحد على خمسة في حداشر تقريبًا هتساوي اتنين. وبما إن واحد على خمسة من العشرة هتساوي اتنين، يبقى نقدر نقول إن اتنين على خمسة من العشرة هتساوي اتنين في اتنين، أو أربعة؛ وبالتالي اتنين على خمسة في حداشر تقريبًا هتساوي أربعة. وبكده نكون قدرنا نقدّر ناتج ضرب كسر في عدد صحيح.

لو عايزين نشوف إزاي هنقدر نقدّر ناتج ضرب كسر في كسر آخر. فلو عندنا مثال بالشكل ده، مطلوب نقدّر الناتج واحد على تلاتة في سبعة على تمنية، ممكن نستخدم خط الأعداد، هنجد إن واحد على تلاتة على خط الأعداد هتكون في المكان ده، وبالتالي ممكن نقرّبها لـ نص. وهنجد أيضًا إن سبعة على تمنية على خط الأعداد سبعة على تمنية هتكون تقريبًا في المكان ده، وبالتالي نقدر نقرّبها لـ واحد، يبقى عندنا واحد على تلاتة في سبعة على تمنية تقريبًا هتساوي، واحد على تلاتة هنقربها لـ نص، في، سبعة على تمنية هنقرّبها لـ واحد؛ نص في واحد هيساوي نص؛ وبالتالي واحد على تلاتة في سبعة على تمنية تقريبًا هتساوي نص. ويبقى نقدر نقول إن واحد على تلاتة في سبعة على تمنية تقريبًا هتساوي نص. وبكده نكون قدرنا نقدّر ناتج ضرب كسر في كسر آخر باستخدام خط الأعداد.

لو عايزين نشوف إزاي هنقدر نقدّر ناتج ضرب عدد كسري في عدد كسري آخر. مطلوب نقدّر مساحة الملعب، ومُعطى إن ملعب كرة القدم طوله مية وتسعة وأربعة على خمسة متر وعرضه خمسة وسبعين وواحد على تلاتة متر، وبالتالي مساحة الملعب هتساوي مية وتسعة وأربعة على خمسة، في خمسة وسبعين وواحد على تلاتة. عشان نقدّر ناتج حاصل ضرب عددين كسريين محتاجين نقرّب كل عدد كسري لأقرب عدد صحيح، يعني مية وتسعة وأربعة على خمسة هنقرّبه لـ مية وعشرة، وخمسة وسبعين وواحد على تلاتة هنقرّبه لـ خمسة وسبعين؛ يعني مية وتسعة وأربعة على خمسة في خمسة وسبعين وواحد على تلاتة تقريبًا هتساوي مية وعشرة في خمسة وسبعين، ويبقى مية وتسعة وأربعة على خمسة في خمسة وسبعين وواحد على تلاتة تقريبًا هتساوي مية وعشرة في خمسة وسبعين هتساوي تمن تلاف ميتين وخمسين، وبالتالي نقدر نقول إن مساحة ملعب كرة القدم تقريبًا هتساوي تمن تلاف ميتين وخمسين متر مربع.

وفي النهاية نكون عرفنا إزاي نقدّر حاصل ضرب الكسور، والأعداد الكسرية، والأعداد الصحيحة.