فيديو: تسمية الأشكال الثلاثية الأبعاد وإيجاد عدد أوجهها وأحرفها ورءوسها

يعرض الفيديو بعض الأشكال الثلاثية الأبعاد مع شرح مفهوم الوجه والحرف والرأس لكل شكل من هذه الأشكال، وكيفية استخراجه منها.

٠٦:٠٠

‏نسخة الفيديو النصية

تسمية الأشكال الثلاثية الأبعاد، وإيجاد عدد أوجُهها وأحرُفها ورؤوسها.

الأشكال الثلاثية الأبعاد، هي الأشكال اللي ليها طول وعرض، وكمان ارتفاع. يبقى الشكل الثلاثي الأبعاد، هو اللي له تلات أبعاد: طول، وعرض، وارتفاع. زيّ متوازي المستطيلات، والمكعب، والمنشور الثلاثي، والهرم، والمخروط، والأسطوانة، وأخيرًا الكرة. دي كلها أشكال ثُلاثية الأبعاد.

بعد ما سميناها، وعرفنا كل شكل اسمه إيه. دلوقتي هناخد المكعب. ونعرف عدد أوجُهه، وأحرُفه، ورؤوسه. أول حاجة هي الوجه. الوجه هو سطح مستوي. يعني إيه سطح مستوي؟ لو خدنا المكعب ده كمثال. كل جزء من الأجزاء المظلّلة، اللي موجودة قدامنا، اسمه وجه.

يعني لو تخيّلنا إن فيه فيل فوق الصندوق ده. كده الفيل بيكون واقف على وجه من أوجُه الصندوق. يبقى الوجه هو سطح مستوي، ممكن أحطّ عليه حاجات. وده شكله. باين في الصورة عندنا تلات أوجُه. ولو قَلَبنا المكعب أو دوّرناه، وبصّينا عليه من الناحية التانية. هنلاقي فيه كمان وجهين.

يبقى كده عدد الأوجُه اللي عدّيناها لحدّ دلوقتي … الأوجُه اللي في الجنب: واحد، اتنين، تلاتة، أربعة. والوجه اللي فوق رقم خمسة. فيه وجه زيّ الوجه اللي فوق، بس موجود تحت. يعني زيّ ما بنتخيل إن الصندوق ليه سقف، الصندوق كمان ليه أرضية. الأرضية دي هي الوجه رقم ستة. إحنا مش شايفينها في المكعب ده، لكن لازم نتخيّلها.

الأرضية أو الوجه رقم ستة، هو اللي موجود تحت. ولو بصّينا عليها في المكعب ده، هنلاقي إن الجزء المظلل ده، هو الوجه رقم ستة. ولو جينا نعدّ الأوجُه هنا من الأول … ده الوجه رقم واحد. وده الوجه رقم اتنين. وده الوجه رقم تلاتة. وده الوجه رقم أربعة. وده الوجه رقم خمسة. اللي إحنا كنا بنقول عليه سطح المكعب، أو الجزء اللي الفيل كان واقف عليه. أمّا ده الجزء السادس والأخير. واللي كنا بنقول عليه الأرضية، أو القاعدة بتاعة المكعب.

يبقى كده المكعب له ست أوجُه. كده إحنا عرفنا يعني إيه وجه. والمكعب له كام وجه. تاني حاجة هنعرفها هي الحرف. كل وجهين بيتقابلوا مع بعض في حرف. الحرف هو الخط اللي بيتقاطع فيه الوجهين مع بعض. يعني الخط الأخضر ده، اسمه حرف.

ولو جينا نشوف عدد الحروف في المكعب، هنلاقيهم … واحد، اتنين، تلاتة، أربعة، خمسة، ستة، سبعة، تمنية، تسعة، عشرة، حداشر، اتناشر. يبقى المكعب … يبقى المكعب له اتناشر حرف.

وآخر حاجة هنعرفها هي الرأس. كل حرفين بيتقاطعوا في نقطة، النقطة دي اسمها رأس. فعدد الرؤوس اللي موجودة في المكعب هي … واحد، اتنين، تلاتة، أربعة، خمسة، ستة، سبعة، تمنية. يبقى عدد الرؤوس تساوي تمنية. وعدد الأوجُه تساوي ستة. وعدد الأحرف يساوي اتناشر.

لو جينا نبصّ على علبة المناديل دي، هنلاقي إن ليها ست أوجُه، واتناشر حرف، وتمن رؤوس. وواخدة شكل متوازي مستطيلات. ولو جينا نشوف قطعة الجبنة دي، هنلاقيها على شكل منشور ثلاثي. وليها خمس أوجُه، وتسع أحرُف، وست رؤوس.

وبكده في الفيديو ده، نكون عرفنا إيه هي الأشكال الثلاثية الأبعاد. وإيه هو الوجه. وإزّاي نعرف نعدّه في الشكل الثلاثي الأبعاد. وإيه هو الحرف، وكمان الرأس.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.