فيديو: تمثيل البيانات بالقطاع الدائري

يوضح الفيديو كيفية تمثيل البيانات بالقطاع الدائري، وكيفية إيجاد نسب البيانات لتمثيلها بالقطاع الدائري.

٠٦:٠٣

‏نسخة الفيديو النصية

في الفيديو ده هنتكلّم عن تمثيل البيانات بالقطاع الدائري. إزّاي نمثّل البيانات بالقطاع الدائري؟ لو عندنا إحصائية، وعايزين نمثّلها بالقطاع الدائري، بيكون شكلها كالشكل ده. بيبقى عبارة عن قطاع دائري كده؛ دايرة متقسّمة على حسب البيانات. كل مجموعة بيانات واخدة قطاع. يعني فيه قطاع اللي هنا ده اللون الأخضر. فيه القطاع اللي هو هنا ده الموف. والقطاع ده اللون الأحمر.

يعني لو عندنا مجموعة من الناس بيحبوا الخيار، بيمثلوا خمسين في المية من العدد الكلي. ومجموعة ناس بتحب الجذر، بيمثلوا خمسة وعشرين في المية من العدد الكلي. وناس بتحب الطماطم، بيمثلوا خمسة وعشرين في المية من العدد الكلي. نقدر نمثّل البيانات دي في قطاع دائري. بإن إحنا هنقول مثلًا إن الخمسين في المية دي، بتمثّل خمسين في المية، يعني نص القطاع الدائري. طيب والخمسة وعشرين ده ربع القطاع الدائري. والخمسة وعشرين دي بتمثّل ربع القطاع الدائري.

طيب هيبقى الشكل عامل إزّاي؟ دايرة هنقسم نصها للخيار. وهناخد ربع منها للجزر. والربع الباقي هنعمله للطماطم. الزوايا الداخلية دي للقطاع الدائري، قياسها تلتمية وستين درجة. يعني الخمسين في المية بتمثّل جزء من التلتمية وستين درجة. نص التلتمية وستين درجة، اللي هو مية وتمانين درجة. طيب الربع بتاع التلتمية وستين درجة، بيبقى كام؟ هيبقى تسعين درجة. والربع الباقي هيبقى تسعين درجة.

طيب معنى كده إن أنا لو عندي نِسَب للمجموعات اللي أنا همثّلها بالقطاع الدائري … لو عندي النسب دي، أقدر أجيب النسب من الزوايا. وبالتالي أقدر أرسم القطاع الدائري. ودي أول طريقة لرسم القطاع الدائري، بمعلومية النسب لمجموعة البيانات. نقلب الصفحة، ونشوف هنعمل الكلام ده إزّاي، في جدول.

أول حاجة لازم نتأكّد إن البيانات دي مجموعها مية في المية. إحنا كان عندنا الخيار خمسين في المية. والجزر خمسة وعشرين في المية. والطماطم خمسة وعشرين في المية. مجموعهم يساوي مية في المية. عشان نجيب النسب دي، هنعمل جدول بالشكل التالي.

الخيار خمسين في المية، يبقى بيمثّل كام من التلتمية وستين درجة؟ يبقى هنكتب خمسين على مية، في تلتمية وستين درجة؛ هتساوي مية وتمانين درجة. الخمسة وعشرين في المية بتاعة الجذر، يبقى خمسة وعشرين على مية، في تلتمية وستين درجة؛ هتساوي تسعين درجة. خمسة وعشرين في المية، يبقى خمسة وعشرين على مية، في تلتمية وستين درجة؛ هتساوي تسعين درجة. نقلب الصفحة، ونشوف طريقة تانية لمجموعة البيانات، إزّاي هنمثّلها بالقطاع الدائري.

عندنا مجموعة من الميداليات: ذهبية وفضية وبرونزية. هتتوزع على عدد من الناس. الأعداد بتاعتهم كالتالي. طالما مدّيلنا الأعداد، يبقى لازم نجيب النسب زيّ المسألة اللي فاتت. طيب علشان نجيب النسب، لازم أعرف نسبة كل عدد من الميداليات. يعني الذهبية دول تمنية وسبعين ميدالية، عايزين نعرف نسبتها كام من العدد الكلي للميداليات. يبقى لازم نجيب المجموع.

لمّا نيجي نجمع عدد الميداليات دي، هنلاقي إن مجموعها ميتين وتمنتاشر ميدالية. نسبة التمنية وسبعين على الميتين وتمنتاشر، هتساوي تقريبًا ستة وتلاتين في المية. طيب الواحد وتمانين على الميتين وتمنتاشر، هنلاقي إنها تساوي تقريبًا سبعة وتلاتين في المية. التسعة وخمسين على الميتين وتمنتاشر، هنلاقيها تقريبًا هتساوي سبعة وعشرين في المية. لازم النسب دي، لمّا نقرّبها ونجمعها، لازم تدّينا مية في المية.

بعد كده ناخد النسبة دي، ونضربها في الزاوية اللي هي التلتمية وستين درجة بتاعة القطاع الدائري. زيّ ما عملنا في المسألة اللي فاتت. يبقى النسب هتبقى بقيم الزوايا. ستة وتلاتين في المية، هتبقى ستة وتلاتين عَ المية. هيطلع لنا الزاوية قيمتها مية وتلاتين درجة. وزاوية الفضية هتبقى مية تلاتة وتلاتين درجة. وزاوية البرونزية هتبقى سبعة وتسعين درجة.

مجموع الزوايا دي، لازم يساوي تلتمية وستين درجة. لو جمعناهم، هنلاقيهم فعلًا يساووا تلتمية وستين درجة. بعد كده هنرسمهم على القطاع الدائري للزوايا بالشكل ده. هنِرْكَز في نص الدايرة. وبعدين نرسم الزوايا بتاعة كل ميدالية. الذهبية مية وتلاتين درجة. الفضية مية تلاتة وتلاتين درجة. والبرونزية سبعة وتسعين درجة.

كده في الفيديو ده عرفنا إزّاي نمثّل البيانات بالقطاع الدائري.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.