فيديو: مقارنة درجات الحرارة وترتيبها

يوضح الفيديو كيفية المقارنة بين درجات الحرارة المختلفة، وترتيبها من البارد إلى الساخن، والعكس، ويوضح الكلمات المستخدمة للتعبير عن درجات الحرارة.

٠٦:٢١

‏نسخة الفيديو النصية

مقارنة درجات الحرارة وترتيبها.

هنعرف إزّاي نقارن بين درجات الحرارة، بعد كده هنرتّبهم. لمّا نيجي نتكلم عن الحرارة، بنستخدم كلمة ساخن، أو كلمة بارد. ولو هنقارن بين حاجتين، نقدر نقول إن فيه حاجة أَسْخن من حاجة تانية. أو إن الحاجة دي أَبْرد من حاجة تانية. طب لو هنقارن بين أشياء كتير؟ نقدر نقول إن حاجة واحدة بس هي الأَسْخن. أو إن حاجة واحدة بس هي الأَبْرد.

يبقى كده عرفنا الكلمات اللي بنستخدمها، عشان نعبّر عن الحرارة. بمعنى لو عندنا أيس كريم وكوب شاي ساخن بالشكل ده. هنلاقي إن كوب الشاي بيطلّع دخان، يعني واضح إن الشاي ساخن. وبالتالي نقدر نقول على الشاي إنه ساخن. لكن الأيس كريم بيبقى بارد. يبقى كده عرفنا إزّاي نستخدم الكلمات اللي بنعبّر بيها عن الحرارة. هنبدأ نجيب صفحة جديدة، ونتكلم عن أمثلة أخرى.

لو عندنا كوب برتقال فيه تلج، وعندنا طبق شوربة بيطلّع دخان. عايزين نقارن بينهم من حيث درجة الحرارة. عشان نقارن بين كوب البرتقال اللي فيه تلج، وطبق الشوربة اللي بيطلّع دخان. هنلاقي إن كوب البرتقال أَبْرد من طبق الشوربة. وهنلاقي إن طبق الشوربة أَسْخن من كوب البرتقال. عشان درجة حرارة كوب البرتقال قليلة، ودرجة حرارة طبق الشوربة عالية.

يبقى لمّا تبقى درجة الحرارة عالية، بنقول على الحاجة ساخنة. لكن لمّا تبقى درجة الحرارة قليلة، بنقول على الحاجة إنها باردة. بعد ما عرفنا إزّاي نقارن بين الأشياء من حيث درجة الحرارة. وعرفنا إمتى نقدر نقول على الحاجة إنها أَبْرد من، وإمتى نقدر نقول على الحاجة إنها أَسْخن من. هنبدأ نجيب صفحة جديدة، ونبدأ نتكلم عن ترتيب الأشياء من حيث درجة الحرارة.

لو عندنا بوتاجاز، وشمس، ووجبة فراخ ساخنة. عايزين نرتّبهم من حيث درجة السخونة. معنى إننا نرتّب من حيث درجة السخونة، يعني عايزين نعرف مين ليه أعلى درجة حرارة، ومين ليه أقل درجة حرارة. هنلاحظ إن الشمس ليها أعلى درجة حرارة. يبقى هنكتب عند الشمس رقم واحد. بعد كده هنقارن بين البوتاجاز، وبين وجبة الفراخ الساخنة.

هنلاقي إن البوتاجاز درجة حرارته أعلى من درجة حرارة وجبة الفراخ. يبقى هنكتب اتنين عند البوتاجاز. وهنكتب تلاتة عند وجبة الفراخ. معنى كده إن إحنا عشان نرتّب التلات أشكال من حيث درجة السخونة. أعلى درجة سخونة هي الشمس، وبعديها هي البوتاجاز، وأقل درجة سخونة في التلات أشكال هي وجبة الفراخ.

هنجيب صفحة جديدة، وعايزين نقارن بين التلاجة، وكوب العصير، والفراولة من حيث درجة البرودة. معنى إننا نقارن من حيث درجة البرودة، يعني عايزين نعرف مين ليه أقلّ درجة حرارة. ومين ليه أكبر درجة حرارة في التلات أشكال الموجودين قدامنا. هنلاحظ إن التلاجة ليها أقل درجة حرارة. عشان لمّا بنحطّ حاجة في التلاجة، الحاجة بتبقى باردة. يبقى هنكتب واحد عن التلاجة.

هنقارن بعد كده بين كوب العصير وبين الفراولة. هنلاقي إن كوب العصير فيه تلج، معنى كده إن كوب العصير بارد. يبقى كوب العصير هيبقى درجة حرارته، أقلّ من درجة حرارة الفراولة. يبقى هنكتب اتنين عند كوب العصير. وهنكتب تلاتة عند الفراولة.

يبقى عشان نرتّب التلات أشكال من حيث درجة البرودة … يبقى الحاجة اللي ليها أقل درجة برودة هي التلاجة. وبعد كده كوب العصير. وآخر حاجة الفراولة. يبقى كده عرفنا إزّاي نرتّب الأشياء من حيث درجة البرودة. هنجيب صفحة جديدة، ونشوف مثال كمان.

لو عندنا تلج، ومكواة، ونار. عايزين نعرف مين الأَسْخن، ومين الأَبْرد، ومين درجة حرارته موجودة بين الأَبْرد وبين الأَسْخن. لو جينا نبصّ على التلات أشكال، عشان نحدّد الأَسْخن والأَبْرد. هنلاقي إن التلج أقلّ درجة حرارة، فنقدر نقول على التلج هو الأَبْرد. وهنلاقي إن النار هي أكبر درجة حرارة، فنقدر نقول على النار هي الأَسْخن. يبقى كده هنلاقي إن المكواة هي اللي درجة حرارتها موجودة بين الأَبْرد وبين الأَسْخن.

يبقى كده عرفنا الكلمات اللي بنعبّر بيها عن الحرارة. وعرفنا إزّاي نقارن بين درجات الحرارة. وعرفنا نرتّبهم من حيث درجة البرودة، ومن حيث درجة السخونة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.