فيديو: التنبؤ في الإحصاء

يتناول الفيديو مفاهيم إحصائية مهمة؛ مثل الدراسة الاستقصائية والمجتمع الإحصائي، كما يوضح شروط اختيار العينة الجيدة.

٠٥:٣٨

‏نسخة الفيديو النصية

هنتعلّم في الدرس ده إزاي نقدر نتنبّأ، أو نتوقّع سلوك مجموعة كبيرة، من خلال دراسة عيّنة منها. وهنتعرّف على مصطلح مهم، بنستخدمه كتير في علم الإحصاء. وهو الدراسة الاستقصائية والمجتمع الإحصائي. هنبدأ أول حاجة بمفهوم الدراسة الاستقصائية.

الدراسة الاستقصائية هي طريقة بنجمّع بيها البيانات؛ عشان نقدر ندرس مجموعة ما. اللي بنسميها المجتمع الإحصائي. المجتمع الإحصائي ده، دايمًا بيبقى كبير. زيّ لو حبّينا نعمل دراسة مثلًا على السكان. فتعداد السكان بيبقى كبير جدًّا. فلتوفير الوقت والمال، بنبتدي ندرس جزء من المجتمع الإحصائي اللي عندنا ده. وبنسميه عيّنة. وعندنا مواصفات، المفروض نراعيها عند اختيار العيّنة. هنشوف مع بعض إيه هي المواصفات اللي بتميّز العيّنة الجيدة.

وأول مواصفات العيّنة الجيدة، هي إن يتمّ اختيارها عشوائيًّا. يعني بدون تحيُّز لفئة معيّنة، أو لاتجاه معيّن. تاني صفة من صفات العيّنة الجيدة، إنها تكون معبّرة عن المجتمع الإحصائي. وتالت صفة إنها تكون كبيرة نوعًا ما، بمقدار يكفي للحصول على بيانات سليمة. عشان هي لو كانت قليلة أوي، مش هتبقى ذات دلالة حقيقية للمجتمع محل الدراسة.

ودايمُا العيّنة، البيانات اللي بنجمّعها منها بتبقى متناسبة مع البيانات الكاملة للمجتمع الإحصائي. عشان نقدر نعرف من خلالها، نوصل لنتايج نقدر نعمّمها على المجتمع محل الدراسة. وهنشوف ده من خلال المثال اللي جاي.

في أحد الفصول، طلب مدرس من المدرسين، إنّ كل طالب من الطلاب يجيب معاه صورة من الصور التي الْتقطها في الأجازة الصيفية. وقام بتجميع البيانات دي، وصنّفهم بحسب المكان الذي تمّ الْتقاط الصور فيه. جمّعهم وحطّهم في الجدول اللي قدامنا ده. محطوط المكان اللي تمّ الْتقاط الصورة فيه. وعدد الطلاب المُناظر للمكان ده. مطلوب منّنا نحسب احتمال إن الصورة يكون تمّ الْتقاطها عند الشاطئ.

نقدر نحسب احتمال إن الصورة قد تمّ الْتقاطها بجوار الشاطئ، من العلاقة دي. عدد صور الطلاب على الشاطئ، على عدد الصور الكلي. طيب من الجدول هنشوف. عدد صور الطلاب على الشاطئ، كان ستة. يبقى البسط هيبقى فيه ستة. المقام المفروض يمثّل عدد الصور الكلي. هنجمّعهم دلوقتي مع بعض. ستة زائد أربعة، عشرة. زائد سبعة، سبعتاشر. زائد حداشر، يبقوا تمنية وعشرين. يبقى المقام هنحطّ فيه تمنية وعشرين. يبقى دلوقتي احتمال إن الصورة تمّ الْتقاطها بجوار الشاطئ، هي ستة على تمنية وعشرين.

طب لو عرفنا إن عدد الطلاب الكلي في المدرسة، هو خمسمية وستين طالب. مطلوب منّنا نتنبأ بعدد الطلاب اللي هيبقوا أحضروا صور، تمّ الْتقاطها بجوار الشاطئ. هنفترض إن ن هيمثّل عدد صور الطلاب على الشاطئ. كل طلاب المدرسة اللي أحضروا صور الْتقطوها بجوار الشاطئ. لو أخدنا النسبة اللي أوجدناها من خلال العيّنة الاستقصائية. اللي هي ممثّلة بالفصل، اللي هي ستة على تمنية وعشرين. نقدر نقول إنها بتمثّل المجتمع الإحصائي. عشان الفصل ده، بيمثّل عيّنة من المدرسة، اللي هي المجتمع الإحصائي. ونقدر نقول إن يوجد تناسُب بينهم.

لمّا نساوي النسبتين، نقدر نقول إن ستة على تمنية وعشرين. اللي هي نسبة الصور اللي على الشاطئ في الفصل، اللي تمّ إجراء الدراسة الاستقصائية عليه. هنساويها بنسبة كل عدد الطلاب اللي الْتقطوا صور على الشاطئ من المدرسة، إلى كل طلاب المدرسة. بعد ما نساوي النسبتين دول ببعض، إحنا عايزين نوجد قيمة ن. فهنشوف المقام. التمنية وعشرين دي، عشان تبقى خمسمية وستين، تمّ ضربها في عشرين. يبقى هنعمل نفس الشيء مع البسط. هنضرب الستة في عشرين؛ عشان نحصل على قيمة ن.

كده نقدر نستنتج قيمة ن. هتبقى بتساوي ستة في عشرين. اللي هي هتساوي مية وعشرين. وبكده نقدر نستنتج إن من بين خمسمية وستين طالب. اللي هم بيمثّلوا كل طلاب المدرسة. نقدر نتوقّع أن يكون فيه مية وعشرين طالب الْتقطوا صور على الشاطئ.

عرفنا في الدرس ده مفاهيم إحصائية مهمة. زيّ يعني إيه دراسة استقصائية. وما هو المجتمع الإحصائي. وإزاي إن إحنا بنقدر نستخدم النتائج اللي بنحصل عليها، من دراسة عيّنة من المجتمع ده. عشان نقدر نتنبأ، أو نتوقّع النتايج بتاعة المجتمع كله. واتعرّفنا على أهمّ الشروط اللي بتميّز العيّنة الجيدة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.