فيديو: النموذج التجريبي الأول • الإستاتيكا • ٢٠١٩ • السؤال السادس عشر

النموذج التجريبي الأول • الإستاتيكا • ٢٠١٩ • السؤال السادس عشر

٠٢:٣٣

‏نسخة الفيديو النصية

القوتان متجه ق واحد ومتجه ق اتنين متوازيتان. وتؤثِّران في النقطتين أ وَ ب على الترتيب. حيث أ ب يساوي ستين سنتيمتر. وَ ب ج يساوي عشرين سنتيمتر. أوجد المحصِّلة ح بالنيوتن.

عندنا قوتين ق واحد وَ ق اتنين، بيؤثِّروا في النقطتين أ وَ ب على الترتيب. وعندنا طول أ ب ستين سنتيمتر. وطول ب ج عشرين سنتيمتر. والمحصِّلة ح بتؤثّر في النقطة ج. ومطلوب منّنا إيجاد قيمة المحصِّلة دي.

دلوقتي إحنا عندنا القوتين ق واحد وَ ق اتنين عكس بعض في الاتجاه. والمحصِّلة في اتجاه القوة ق اتنين. فده معناه إن القوة الكبيرة هي ق اتنين؛ لأن المحصِّلة بتكون في اتجاه القوة الأكبر. فيبقى عندنا ق اتنين أكبر من ق واحد. وقيمة المحصِّلة بتكون الفرق بين القوتين؛ القوة الكبيرة ناقص القوة الصغيرة. يعني مقدار المحصِّلة بيساوي ق اتنين ناقص ق واحد.

مطلوب عندنا في السؤال إيجاد قيمة المحصِّلة. يعني مطلوب منّنا نعرف قيمة ق اتنين وَ ق واحد ونطرحهم. إحنا عندنا قيمة ق اتنين معروفة؛ ستاشر نيوتن. وباقي لنا نوجد قيمة ق واحد. إحنا قلنا: إن نقطة تأثير المحصِّلة هي النقطة ج. ومجموع عزوم القوى حوالين النقطة ج بيساوي صفر. ده لأن مجموع عزوم القوى حوالين نقطة تأثير المحصِّلة بيساوي صفر.

فمن هنا نقدر نقول: إن القوة ق واحد مضروبة في البُعد بين خطّ عملها والنقطة ج، اللي هو طول أ ج. هتساوي القوة ق اتنين مضروبة في البُعد بين خطّ عملها والنقطة ج، اللي هو طول ب ج. ق واحد عندنا مجهولة، وَ أ ج بيساوي ستين زائد عشرين، يعني تمانين سنتيمتر. يبقى نقول: تمانين ق واحد بتساوي ق اتنين، اللي هي ستاشر نيوتن، مضروبة في ب ج، اللي هو عشرين سنتيمتر. نقسم الطرفين على تمانين، من هنا تبقى ق واحد بتساوي ستاشر في عشرين على تمانين، يعني أربعة نيوتن.

كده إحنا عندنا قيم ق اتنين وَ ق واحد. نقدر بسهولة نوجد قيمة ح. المحصِّلة ح بتساوي ق اتنين، اللي هي ستاشر، ناقص ق واحد، اللي هي أربعة. يعني هتساوي اتناشر نيوتن. وهو ده المطلوب عندنا في السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.