تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تقدير الكميات

نهال عصمت

يوضح الفيديو كيفية تقدير مجموعة من الأشياء، عن طريق مقارنة مجموعة من ١٠ أشياء بمجموعة أخرى.

٠٤:٠٦

‏نسخة الفيديو النصية

تقدير الكميات.

هنتعلّم إزاي لو عندنا مجموعة من الأشياء نقدر نتنبَّأ بعددها من غير ما نعدّها واحدة واحدة. بمعنى لو عندنا مجموعتين بالشكل ده. عندنا المجموعة الأولى مكوّنة من عشر حبات فراولة. والمجموعة التانية عايزين نوجد عدد تقديري ليها؛ يعني عايزين نعرف عددها كام من غير ما نعدّها.

أول حاجة هنبدأ نبصّ على المجموعة الأولى، وهي مجموعة مكوّنة من عشر حبات فراولة. بعد كده هنبدأ نقارنها بالكمية الغير معروفة اللي إحنا عايزين نعرف عددها.

هنلاقي إن الكمية الغير معروفة هي عبارة عن تلات مجموعات تقريبًا من عشرة. يعني عشر حبات فراولة زائد عشر حبات فراولة زائد عشر حبات فراولة. يبقى تلات مجموعات من العشرة؛ يعني تلاتين حبة فراولة.

يبقى كده قدِرنا نوجد قيمة تقريبية للعدد من خلال التقدير. يعني عرفنا إن عدد حبات الفراولة الموجودة قدّامنا هي تلاتين حبة من غير ما نعدّهم. هنبدأ نجيب صفحة جديدة، ونشوف مثال آخَر.

عندنا مجموعتين من الأزرار. المجموعة الأولى مكوّنة من عشر أزرار. والمجموعة التانية عايزين نعرف، أو عايزين نقدّر عددها.

هنلاقي بالمقارنة بين المجموعتين إن الكمية اللي عايزين نعرف عددها، اللي هي الكمية الغير معرّفة. هي عبارة تقريبًا عن تمن مجموعات من العشرة. يبقى نقدر نقول إن المجموعة الغير معرّفة هي عبارة عن تمانين زرار.

يبقى كده قدِرنا نوجد عدد تقريبي لعدد الأزرار من خلال التقدير. هنجيب صفحة جديدة، ونشوف مثال يوضّح أكتر.

عندنا مجموعتين من الأقلام. المجموعة الأولى هي عبارة عن عشر أقلام. والمجموعة التانية غير معرّفة، وعايزين نوجد عدد تقريبي أو عدد تقديري للأقلام.

نفس الكلام؛ هنبدأ نقارن بين المجموعتين. هنلاقي إن الكمية الغير معرّفة هي عبارة تقريبًا عن مجموعتين من العشرة؛ يعني عشرة زائد عشرة. وبالتالي نقدر نقول إن المجموعة الغير معرّفة هي عبارة عن عشرين قلم. هنبدأ نجيب صفحة تانية، ونشوف مثال آخَر.

في آخِر مثال عندنا مجموعتين من العنب. المجموعة الأولى غير معرّفة، والمجموعة التانية مكوّنة من عشر حبات عنب. عايزين نوجد عدد تقديري أو تقريبي لمجموعة العنب الأولى.

هنبدأ نقارن بين المجموعتين، هنلاقي إن الكمية الغير معرّفة هي عبارة تقريبًا عن عشر مجموعات من عشرة. يعني عبارة عن مية حبة عنب. يعني العشرة متكرّرة عشر مرات. يبقى كده عرفنا نوجد عدد تقديري لمجموعة العنب.

وبكده اتكلّمنا عن تقدير الكميات، وقدِرنا نوجد قيمة تقريبية للعدد من خلال التقدير.