فيديو: الضرائب على المبيعات والتخفيضات: تطبيقات على النسبة المئوية

يوضح الفيديو مفهوم ضريبة المبيعات، والتخفيضات كتطبيقات على حساب النسب المئوية، ويبين كيفية حساب السعر النهائى للسلعة من خلال مجموعة من الأمثلة.

١٠:٤٠

‏نسخة الفيديو النصية

الضرائب على المبيعات والتخفيضات.

هنتكلم على تعريف الضرائب على المبيعات. وإزاي إنها بتزوّد سعر السلعة الأصلي، بمقدار الضريبة اللي بتُفرض عليها. وهنشوف إيه هي التخفيضات. وإزاي إن هي بتبقى عبارة عن خصم في سعر السلعة، بتنزّل سعر السلعة بمقدار الخصم ده.

أول حاجة هنبتدي نعرّف ضريبة المبيعات. ضريبة المبيعات هي قيمة ماليّة معيّنة، بتُضاف على السعر الأصلي للسلعة، اللي بيشتريها الناس. فيصبح سعرها الجديد هو سعرها الأصلي، زائد الضريبة. يعني في الحالة دي، السعر الكلّي هيبقى بيساوي السعر الأصلي، زائد الضريبة. هنشوف دلوقتي مثال على إزاي نقدر نحسب سعر السلعة، بعد إضافة الضريبة.

لو عرفنا إن سعر جهاز التسجيل ربعمية جنيهًا. والنسبة المئوية للضريبة المقرّرة عليه هي خمسة وخمسة وسبعين من مية في المية. ما السعر الكلي للجهاز، بعد إضافة الضريبة؟

دلوقتي عندنا طريقتين نقدر نحلّ بيهم المسألة دي. أول طريقة إن إحنا هنجيب مقدار الزيادة. يعني إحنا هنشوف النسبة المئوية دي تُمثّل مبلغ قدّ إيه. ونضيفها على السعر الأصلي للجهاز. هنبتدي بأول طريقة. وهنشوف خمسة وخمسة وسبعين من مية في المية، من المبلغ الأصلي اللي هو الربعمية، هتساوي كام.

عايزين نكتب الأول النسبة المئوية، على هيئة عدد عشري. أو هنكتبها على شكل العدد العشري المكافئ ليها. اللي هو هيبقى عبارة عن خمسمية خمسة وسبعين من عشرة آلاف. وبعدين عايزين نعرف هو ده بيُمثّل قدّ إيه من الربعمية، فهنضرب في ربعمية. وبعدين لو عملنا عملية الضرب دي على الآلة الحاسبة. هنلاقي إن الناتج هو تلاتة وعشرين جنيهًا. ده مقدار الزيادة، أو مقدار الضريبة.

وبعدين السعر الكلي بيبقى عبارة عن السعر الأصلي، زائد الزيادة اللي هي الضريبة. السعر الأصلي كان ربعمية جنيه. زائد الضريبة اللي هي تلاتة وعشرين جنيه. فهيبقى الناتج ربعمية تلاتة وعشرين جنيهًا. ده كده السعر الكلي، بعد إضافة الضريبة.

فيه طريقة تانية، ممكن نستخدمها عشان نوجد السعر الكلي، بعد إضافة الضريبة. هنضيف النسبة المئوية للزيادة، على مية في المية اللي هي بتمثّل السعر الأصلي للجهاز. وبعدين نشوف النسبة المئوية دي، عبارة عن كام، مقدارها كام. كده هيبقى في خطوة واحدة، هنجيب السعر الكلي بعد إضافة الضريبة. يعني هنفترض إن مية في المية دي، بتُمثّل السعر الأصلي. هنضيف عليها النسبة المئوية للزيادة. يبقى كده بقى عندنا مية وخمسة، وخمسة وسبعين في المية.

النسبة دي، النسبة المئوية دي، بتُمثّل السعر الكلي بعد إضافة الضريبة. فده معناه إن السعر الكلي هيبقى بيساوي مية وخمسة، وخمسة وسبعين في المية، من السعر الأصلي. يعني نقدر نحسبها مية وخمسة، وخمسة وسبعين من مية، في المية من السعر الأصلي اللي هو ربعمية.

عايزين نكتب النسبة المئوية دي، على صورة العدد العشري المكافئ. النسبة المئوية كأننا بناخد العدد اللي عندنا ده، بنقسمه على مية. وده معناه إن إحنا هنحرّك العلامة العشرية، مكانين جهة اليسار. فهيبقى العدد العشري المكافئ، هو واحد وخمسمية خمسة وسبعين من عشرة آلاف. وبعدين نضرب في السعر الأصلي، اللي هوالربعمية. وبعدين بعد إجراء عملية الضرب دي على الآلة الحاسبة. هنلاقي إن الناتج هو ربعمية تلاتة وعشرين. اللي هو نفس الناتج اللي حصلنا عليه في الطريقة الأولى.

هنشوف دلوقتي مع بعض مفهوم الخصم أو التخفيضات. إيه هو الخصم؟ الخصم هو القيمة التي تُخصَم من سعر السلعة. فيصبح سعرها الجديد بعد الخصم، مُساوي للسعر الأصلي ناقص الخصم. يعني نقدر نقول إن السعر النهائي بعد الخصم، بيبقى أقلّ من السعر الأصلي بمقدار الخصم. طب لو شُفنا المثال ده، هنشوف دلوقتي إزاي نقدر نحسب السعر بعد الخصم.

لو عرفنا إن سعر زجاجة الزيت كان تسعة وستين جنيهًا. وأُجرِيَت تخفيضات نسبتها خمسة وتلاتين في المية. فما سعر البيع الجديد؟ يعني إحنا دلوقتي محتاجين نعرف سعر زجاجة الزيت، بعد التخفيض أو بعد الخصم.

ممكن نحلّ المثال ده بطريقتين. أول طريقة إن إحنا نحسب مقدار الخصم. وبعدين نطرح مقدار الخصم من السعر الأصلي للسلعة. فنجيب كده السعر النهائي بتاعها بعد الخصم. هنبتدي في أول طريقة. مقدار الخصم هو خمسة وتلاتين في المية، من أصل السعر اللي هو تسعة وستين. هحوّل النسبة المئوية للعدد العشري المكافئ. يعني كأننا بنقسم الخمسة وتلاتين على مية.

يعني لو افترضنا إن فيه علامة عشرية بعد الخمسة، فإحنا كده هنحرّك العلامة العشرية دي مكانين جهة اليسار. فيبقى الناتج، بعد القسمة على مية، هو خمسة وتلاتين من مية. من تسعة وستين يعني عايزين نضرب الخمسة وتلاتين من مية دي، في تسعة وستين. بعد إجراء العملية بتاعة الضرب دي على الآلة الحاسبة. هنلاقي إن حاصل الضرب هيساوي أربعة وعشرين وخمستاشر من مية. يعني معناها إن مقدار الخصم هو أربعة وعشرين وخمستاشر من مية جنيهًا.

كده نقدر نحسب السعر بعد الخصم. إن إحنا هنطرح مقدار الخصم، من السعر الأصلي. السعر الأصلي اللي هو تسعة وستين جنيهًا. والخصم كان أربعة وعشرين وخمستاشر من مية. فيبقى بعد إجراء عملية الطرح، هنلاقي إن السعر بعد الخصم هو أربعة وأربعين وخمسة وتمانين من مية جنيهًا.

الطريقة التانية اللي ممكن نستخدمها في الحلّ. هي إن إحنا نطرح النسبة المئوية للخصم، من مية في المية اللي هي بتُمثّل السعر الأصلي للزجاجة. فهيبقى كده عندنا، السعر بعد الخصم عبارة عن خمسة وستين في المية من السعر الأصلي. يعني نقدر نكتبها بالشكل ده. إن السعر بعد الخصم عبارة عن خمسة وستين في المية، من السعر الأصلي اللي هو تسعة وستين.

هنحوّل النسبة المئوية اللي هي خمسة وستين في المية دي، للعدد العشري المكافئ. فهتبقى خمسة وستين من مية، في تسعة وستين. بعد ما نجري عملية الضرب دي، هنلاقي إن الناتج أربعة وأربعين وخمسة وتمانين من مية جنيهًا. اللي هو نفس الناتج اللي حصلنا عليه، باستخدام الطريقة الأولى. يبقى كده اتأكّدنا إن السعر بتاع زجاجة الزيت بعد الخصم، هو أربعة وأربعين وخمسة وتمانين من مية جنيهًا.

هنشوف في صفحة جديدة، مثال آخر. لو عرفنا إن أُجرِيَت تخفيضات مقدارها تلاتين في المية، على أحد الهواتف المحمولة. لو كان سعره بعد الخصم ميتين تسعة وتلاتين وتسعة وتمانين من مية جنيهًا. فما سعره الأصلي؟ يعني محتاجين دلوقتي نعرف السعر الأصلي.

نقدر نقول إن السعر بعد الخصم، هيبقى بيساوي السعر الأصلي، اللي هو عبارة عن مية في المية. ناقص نسبة الخصم، اللي هي تلاتين في المية. اللي هو هيبقى بيساوي سبعين في المية. ده معناها إن السعر بعد الخصم، عبارة عن سبعين في المية من السعر الأصلي.

إحنا مش عارفين السعر الأصلي كان كام. فهنفترض إن ك هي السعر الأصلي. ومعطى عندنا إن السعر بعد الخصم، هو ميتين تسعة وتلاتين وتسعة وتمانين من مية. ده هيبقى بيساوي سبعين في المية من السعر الكلي، يعني من ك. يعني بتساوي سبعين في المية في ك. هنحوّل النسبة المئوية اللي عندنا، للعدد العشري المكافئ. يعني كأننا بنقسم على مية، وبنحرّك العلامة العشرية مكانين جهة اليسار. بنفترض إن فيه علامة عشرية هنا، وبنحرّكها مكانين جهة اليسار.

فهيبقى في الحالة دي، العدد العشري المكافئ هو سبعة من عشرة. هنضربه في ك. عشان نقدر نوجد قيمة ك، يبقى محتاجين نقسم الطرفين على سبعة من عشرة. بعد الاختصار أو التبسيط، هنوصل لإنّ ك هيبقى عبارة عن تلتمية اتنين وأربعين وسبعة من عشرة. وكده قدرنا نحسب السعر الأصلي. اللي هو هيبقى عبارة عن تلتمية اتنين وأربعين وسبعة من عشرة جنيهًا.

اتعرّفنا في الدرس ده على الضرائب على المبيعات والتخفيضات. وعلى تعريف كلٍّ منهم. وإزاي نقدر نحسبه. وإزاي هم الاتنين بيُعتبروا تطبيقات على النسبة المئوية. الضرائب على المبيعات بترفع سعر السلعة، بمقدار الضريبة. اللي هي بتبقى زيادة في السعر بنسبة مئوية محدّدة. أمّا التخفيضات، فبتنزّل سعر السلعة بمقدار الخصم.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.