فيديو: امتحان الفزياء للعام السابق • ٢٠١٨/٢٠١٧ • السؤال السادس والثلاثون

امتحان الفزياء للعام السابق • ٢٠١٨/٢٠١٧ • السؤال السادس والثلاثون

٠٢:٥٠

‏نسخة الفيديو النصية

مقاومة مقدارها ستة. ومكثِّف مفاعلته السعويَّة تمانين أوم. وملفّ حثّ عديم المقاومة معامل الحثّ الذاتي له تمنية وعشرين من المية هنري. تمَّ توصيله على التوالي مع مصدر تيَّار متردِّد جهده عشرين فولت وتردُّده خمسين هرتز. أوجد القيمة العظمى لشدة التيار المارّ في الدائرة باعتبار أن 𝜋 تساوي تلاتة وأربعتاشر من المية بالضبط.

ففيه دايرة فيها مقاومة مقدارها ستة أوم، ومكثِّف مفاعلته السعويَّة تمانين أوم. وملفّ حثّ عديم المقاومة معامل الحثّ الذاتي بتاعه تمنية وعشرين من المية هنري. وكل دول متوصَّلين بمصدر تيار متردِّد جهده عشرين فولت. وده معناه إن القيمة الفعَّالة لفرق الجهد هو عشرين فولت. وتردُّد المصدر خمسين هرتز. والمطلوب منّنا نعرف القيمة العظمى لشدة التيار اللي ماشي في الدايرة.

فلو طبَّقنا قانون أوم على دايرة تيَّار متردِّد، فهنلاقي إن القيمة العظمى لفرق الجهد بتساوي القيمة العظمى للتيَّار مضروبة في المعاوقة الكلِّيَّة للدايرة. وبما إن الدايرة فيها مكثِّف وملفّ حثّ، فالمعاوقة الكلِّيَّة للدايرة هتساوي الجذر التربيعي لقيمة المقاومة تربيع زائد المفاعلة الحثِّيَّة ناقص المفاعلة السعويَّة الكل تربيع. فمعطى في الدايرة قيمة الـ 𝑅 وقيمة الـ 𝑋 𝑐 وناقص الـ 𝑋 𝐿. فنقدر نجيب قيمة 𝑋 𝐿 عن طريق إننا نضرب اتنين 𝜋 في قيمة التردُّد في معامل الحثّ الذاتي للملفّ.

يعني لمَّا نعوَّض بالقيم، هنلاقي إن 𝑋 𝐿 بتساوي اتنين في تلاتة وأربعتاشر من المية اللي هي قيمة 𝜋. في خمسين هرتز اللي هي قيمة التردُّد. في تمنية وعشرين من المية هنري اللي هي قيمة معامل الحثّ الذاتي. يعني 𝑋 𝐿 بتساوي سبعة وتمانين واتنين وتسعين من المية أوم.

ونقدر دلوقتي نعوَّض بقيمتها عشان نجيب المعاوقة الكلِّيَّة للدايرة، ونطلَّع إن 𝑍 بتساوي الجذر التربيعي لستة أوم تربيع. زائد سبعة وتمانين واتنين وتسعين من المية أوم. ناقص تمانين أوم الكل تربيع. ولمَّا نحسبها هنطلَّع إن قيمة المعاوقة الكلِّيَّة بتساوي تسعة وتسعمية ستة وتلاتين من الألف أوم.

ونقدر دلوقتي نعوَّض بيها في قانون أوم، ولكن محتاجين الأول نطلَّع القيمة العظمى لفرق الجهد. فاللي معطى في المسألة هو القيمة الفعَّالة لفرق الجهد. والعلاقة بين القيمة الفعَّالة والقيمة العظمى لفرق الجهد إن القيمة الفعَّالة بتساوي القيمة العظمى مضروبة في سبعمية وسبعة من الألف. يعني القيمة العظمى لفرق الجهد بتساوي القيمة الفعَّالة على سبعمية وسبعة من الألف. والقيمة الفعَّالة لفرق الجهد بتساوي عشرين فولت. وعشرين على سبعمية وسبعة من الألف بتساوي تمنية وعشرين وألفين تمنمية خمسة وتمانين من العشرة آلاف فولت.

نقدر دلوقتي نجيب القيمة العظمى للتيَّار عن طريق قانون أوم بإننا نقسم القيمة العظمى لفرق الجهد على المعاوقة الكلِّيَّة للدايرة. وده هيدِّينا إن القيمة العظمى للتيَّار بتساوي اتنين وتمنمية سبعة وأربعين من الألف أمبير.

وبكده نبقى عرفنا نطلَّع القيمة العظمى للتيَّار عن طريق معرفة مكوِّنات الدايرة والقيمة الفعَّالة لفرق الجهد.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.