فيديو: حل المسائل الكلامية التي تتضمَّن المضاعف المشترك الأصغر

تستضيف إحدى مدارس المحافظة كل ٣ سنوات مسابقة المحافظة للألعاب الرياضية. وتستضيف أيضًا كل ٧ سنوات مسابقة المحافظة للرياضيات. إذا كانت آخر مرة استضافت فيها المدرسة كلتا المسابقتين في سنة واحدة كانت سنة ٢٠٠٣، ففي أيّ سنة ستستضيف المدرسة كلتا المسابقتين في نفس السنة مرة أخرى؟

٠٢:٥٥

‏نسخة الفيديو النصية

تستضيف إحدى مدارس المحافظة كل تلات سنوات مسابقة المحافظة للألعاب الرياضية. وتستضيف أيضًا كل سبع سنوات مسابقة المحافظة للرياضيات. إذا كانت آخر مرة استضافت فيها المدرسة كلتا المسابقتين في سنة واحدة كانت سنة ألفين وتلاتة، ففي أيّ سنة ستستضيف المدرسة كلتا المسابقتين في نفس السنة مرة أخرى؟

يعني معطى عندنا إن فيه مدرسة بتستضيف كل تلات سنوات مسابقة المحافظة للألعاب الرياضية. وبتستضيف أيضًا كل سبع سنوات مسابقة المحافظة للرياضيات. والمطلوب إننا نعرف في أنهي سنة المدرسة هتستضيف المسابقتين في نفس السنة مرة أخرى.

فزيّ ما عرفنا من السؤال إن المدرسة بتستضيف مسابقة الألعاب الرياضية كل تلات سنوات. وفي نفس الوقت بتستضيف مسابقة الرياضيات كل سبع سنوات. فمعنى كده علشان نعرف في أنهي سنة هتستضيف المدرسة المسابقتين في نفس السنة، يعني عايزين نشوف مضاعفات العدد تلاتة، ومضاعفات العدد سبعة. ونشوف هم الاتنين هيشتركوا في أنهي عدد. والعدد ده بنسمّية المضاعف المشترك الأصغر. وبنرمز له بـ م م أ. فمعنى كده إننا عايزين نوجد المضاعف المشترك الأصغر للعددين تلاتة وسبعة.

فأول حاجة هنعملها إننا هنكتب مضاعفات العددين تلاتة وسبعة. فهنلاحظ إن مضاعفات العدد تلاتة هي: تلاتة، وستة، وتسعة، واتناشر، وخمستاشر، وتمنتاشر، وواحد وعشرين، وأربعة وعشرين، وهكذا. وأمّا مضاعفات العدد سبعة، فهي: سبعة، وأربعتاشر، وواحد وعشرين، وتمنية وعشرين، وهكذا.

بعد كده هنحدّد المضاعفات المشتركة بين مضاعفات العددين تلاتة وسبعة. فهنلاحظ عندنا إن العدد واحد وعشرين من المضاعفات المشتركة بين مضاعفات العددين، وفي نفس الوقت هو أصغر مضاعف مشترك. فبالتالي هيبقى المضاعف المشترك الأصغر للعددين تلاتة وسبعة هو واحد وعشرين.

وبما إن معطى عندنا في السؤال إن آخر مرة استضافت فيها المدرسة المسابقتين في سنة واحدة كانت في سنة ألفين وتلاتة. وزيّ ما عرفنا إن المضاعف المشترك الأصغر للعددين تلاتة وسبعة هو واحد وعشرين. فمعنى كده إن المدرسة هتستضيف المسابقتين في نفس السنة مرة أخرى بعد واحد وعشرين سنة. يعني هنيجي عند ألفين وتلاتة، وهنجمع عليها واحد وعشرين؛ لأن المسابقتين هييجوا تاني مع بعض في نفس السنة بعد واحد وعشرين سنة من سنة ألفين وتلاتة. فلمّا نجمع ألفين وتلاتة زائد واحد وعشرين هتبقى بتساوي ألفين أربعة وعشرين.

فبالتالي هتبقى السنة اللي هتستضيف فيها المدرسة المسابقتين في نفس السنة مرة أخرى هي: سنة ألفين أربعة وعشرين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.