فيديو: قسمة عدد عشري على آخَر

احسب ٠٫٧٧٢ ÷ ٠٫٤.

٠٤:١٨

‏نسخة الفيديو النصية

احسب سبعمية اتنين وسبعين من ألف، على أربعة من عشرة.

يعني عايزين نقسم عدد عشري على عدد عشري. وعلشان نقسم أعداد عشرية، أول حاجة بنعملها إننا بنحوّل العدد المقسوم عليه إلى عدد صحيح، فنقدر نكتبهم بالشكل ده. وعشان نحوّل العدد المقسوم عليه إلى عدد صحيح هنضربه في عشرة. وبالتالي هنضرب العدد العشري ده برضو في عشرة. فلمّا نضرب البسط والمقام في العدد نفسه، فكأننا ضربنا في واحد، يعني مش هنغير حاجة من قيمة الناتج. فهنبدأ نحسب. فهنيجي عند البسط وهنضرب سبعمية اتنين وسبعين من ألف في عشرة. فلمّا نضرب سبعمية اتنين وسبعين من ألف في عشرة، هتساوي سبعة واتنين وسبعين من مية.

بعد كده هنحسب اللي في المقام، فهنضرب أربعة من عشرة في عشرة. فأربعة من عشرة في عشرة هتساوي أربعة.

فنقدر بعد كده إننا نقسم سبعة واتنين وسبعين من مية على أربعة باستخدام القسمة المطوّلة. فهنكتبهم بالشكل ده؛ يعني سبعة واتنين وسبعين من مية هنا، والعدد المقسوم عليه اللي هو أربعة هنا. بعد كده هنبدأ نقسم، فهنبدأ نقسم سبعة على أربعة. يعني عايزين نشوف سبعة موجود فيها كام أربعة. فيبقى عندنا أربعة واحدة؛ فبالتالي هيبقى سبعة على أربعة بتساوي واحد، وهنكتب واحد فوق سبعة. بعد كده هنضرب واحد في أربعة. وهنكتب حاصل الضرب هنا. فواحد في أربعة هتساوي أربعة. بعد كده هنبدأ نطرح سبعة ناقص أربعة. فسبعة ناقص أربعة هتساوي تلاتة. بعد كده هنقسم تلاتة على أربعة. لكن هنلاحظ إن تلاتة هنا أقل من أربعة؛ فما ينفعش نقسمها. فبالتالي هنيجي عند سبعة اللي موجودة في الخانة اللي بعدها اللي هي خانة العشرات، وهنكتبها تحت جنب تلاتة. فهيبقى عندنا العدد سبعة وتلاتين.

فنقدر دلوقتي نقسم سبعة وتلاتين على أربعة. فهنشوف سبعة وتلاتين موجود فيها كام أربعة. ومن جدول الضرب إحنا عارفين إن حاصل ضرب أربعة في تسعة بتساوي ستة وتلاتين. فبالتالي لمّا نقسم سبعة وتلاتين على أربعة هتساوي تسعة. وهنكتب تسعة هنا فوق سبعة. وهناخد بالنا من حاجة مهمة؛ إن هنا كان عندنا علامة عشرية، فهنكتبها فوق في نفس المكان بالشكل ده. بعد كده هنضرب تسعة في أربعة. وتسعة في أربعة بتساوي ستة وتلاتين. وهنكتبها تحت بالشكل ده. بعد كده هنطرح سبعة وتلاتين ناقص ستة وتلاتين. فلمّا نطرح سبعة وتلاتين ناقص ستة وتلاتين هتساوي واحد. بعد كده هيبقى عندنا هنا واحد. لو جينا نقسم واحد على أربعة مش هينفع؛ لأن واحد أقل من أربعة. فبالتالي بنفس الطريقة هنيجي عند اتنين اللي موجودة في الخانة اللي بعدها، اللي هي خانة المئات، وهنكتبها تحت جنب واحد. فهيبقى عندنا العدد اتناشر.

فنقدر نقسم دلوقتي اتناشر على أربعة. فاتناشر على أربعة بتساوي تلاتة. بعد كده هنضرب تلاتة في أربعة. وتلاتة في أربعة بتساوي اتناشر. وهنكتبها تحت. وبعد كده آخر خطوة عندنا هنطرح اتناشر ناقص اتناشر. فاتناشر ناقص اتناشر هتساوي صفر.

فبكده طالما وصلنا لصفر يبقى خلصت عندنا القسمة المطولة. فبالتالي هيبقى واحد وتلاتة وتسعين من مية هو خارج القسمة. فمعنى كده إن سبعمية اتنين وسبعين من ألف، على أربعة من عشرة، بتساوي واحد وتلاتة وتسعين من مية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.