تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: المدرَّجات التَّكرارية

أحمد مدحت

يوضح الفيديو المدرج التكراري، وكيفية إنشائه باستخدام البيانات الموجودة في الجدول التكراري، وكيفية تفسير بيانات معطاة في مدرج تكراري وتحليلها، مع أمثلة توضيحية.

٠٦:٢٧

‏نسخة الفيديو النصية

هنتكلم عن المدرجات التكرارية، في الفيديو ده هنعرف إيه هو المدرج التكراري وكمان هنعرف إزاي ننشئ مدرج تكراري علشان يمثل البيانات اللي موجودة في الجدول التكراري، وكمان هنعرف إزاي نحلل ونفسر البيانات لو عندنا مدرج تكراري. بالنسبة للبيانات اللي بتكون موجودة في الجدول التكراري، بنقدر نمثلها باستخدام المدرج التكراري، وهو نوع من التمثيل بالأعمدة، والمدرج التكراري عبارة عن تمثيل بياني بيعرض بيانات عددية منظّمة في فترات متساوية، كده إحنا عرفنا إيه هو المدرج التكراري بعد كده هنشوف مثال نعرف بيه إزاي ننشئ مدرج تكراري.

عندنا في المثال البيانات اللي في الجدول المقابل بتوضح الزمن اللي بيستغرقه كل طالب من طلاب فصلٍ ما في ممارسة الأنشطة الرياضية في مركز للّياقة البدنية خلال عطلة نهاية الأسبوع، ومطلوب إننا نختار فترات مناسبة علشان نكوّن جدول تكراري، وكمان مطلوب إننا ننشئ مدرج تكراري بيمثل البيانات اللي عندنا. هنبدأ الأول نكون الجدول التكراري، وعلشان نكوّنه فإحنا هنحدد أقصر مدة تدريب وأطول مدة تدريب، فمن خلال الجدول اللي عندنا هنلاقي أقصر مدة تدريب هي تسعة وتمانين دقيقة، وأطول مدة تدريب هي ميتين وتسعتاشر دقيقة. بعد كده علشان نختار الفترات المناسبة لتكوين الجدول التكراري، فإحنا هنبدأ بمدة تكون أقل من أقصر مدة تدريب، وهننهي بمدة تكون أكبر من أطول مدة تدريب؛ فمثلًا المدة اللي هنبدأ بيها هي واحد وتمانين دقيقة، والمدة اللي هتبقى أكبر من أطول مدة تدريب هي ميتين وتلاتين دقيقة. بعد كده هنقسّم البيانات اللي عندنا على فترات بحيث يكون طول كل فترة هو تلاتين دقيقة، فهيظهر لنا جدول، هنلاحظ من خلال الجدول اللي عندنا إن إحنا قسمنا مدة التدريب الرياضي لخمس فترات متساوية في الطول، وطول كل فترة تلاتين دقيقة، بعد كده هنوجد التكرار لكل فترة، وعلشان نوجد التكرار مثلًا للفترة من واحد وتمانين دقيقة لمية دقيقة، فإحنا نرجع للجدول المعطى، وهنشوف المدد التدريبية اللي موجودة في الفترة من واحد وتمانين دقيقة لمية وعشرة دقيقة، وهنمثل كل مدة بإشارة وفي الآخر عدد الإشارات هيمثل التكرار. فلما هنرجع للجدول المعطى هنلاقي تَمن مُدد تدريبية موجودة في الفترة من واحد وتمانين دقيقة لمية وعشرة دقيقة، معنى كده إن التكرار بتاع الفترة دي هيبقى تمنية، وبنفس الطريقة هنكمل الجدول زي ما هيظهر لنا.

بكده يبقى إحنا كوّنّا الجدول التكراري بعد كده هنشوف المطلوب التاني واللي هو إنشاء مدرج تكراري بيمثّل البيانات اللي عندنا. أول خطوة هنرسم محورين واحد أفقي والتاني رأسي، وبعد كده هنسمي كل واحد فيهم، وكمان هنكتب عنوان مناسب للشكل اللي عندنا زي ما هيظهر لنا. تاني خطوة هنقسّم المحور الأفقي على حسب الفترات اللي موجودة في الجدول التكراري، زي ما هيظهر لنا، وبالنسبة للمحور الرأسي فهيمثّل التكرار، بعد كده في الخطوة التالتة والأخيرة هنرسم عمود لكل فترة؛ بحيث إن ارتفاع العمود هيساوي التكرار بتاع الفترة، فهنرسم العمود بتاع كل فترة زي ما هيظهر لنا، كده إحنا أنشأنا مدرج تكراري بيمثل البيانات اللي عندنا، هنلاحظ إن المدرج التكراري مفهوش فراغات بين الأعمدة، وكمان الأعمدة ليها نفس العرض؛ وده لأن الفترات ليها نفس الطول، كمان هنلاحظ إن ارتفاع العمود بتاع الفترة من مية واحد وسبعين دقيقة لميتين دقيقة هو صفر؛ وده لأن إحنا لما هنرجع للجدول التكراري اللي عندنا هنلاقي إن التكرار بتاع الفترة من مية واحد وسبعين دقيقة لميتين دقيقة هو صفر؛ معنى كده إن الفترات اللي تكرارها صفر بيكون ارتفاع أعمدتها صفر، وبنسميها فجوات.

بكده يبقى إحنا عرفنا إزاي ننشئ مدرج تكراري، بعد كده هنشوف من خلال مثال إزاي لما يبقى عندنا مدرج تكراري نحلل البيانات ونفسرها.

عندنا في المثال مُعطى مدرج تكراري بيوضح مدة الإبحار لعدد من القوارب، وعندنا مطلوبين هما أ و ب، وعايزين نستخدم المدرج التكراري المعطى علشان نوجدهم. فبالنسبة للمطلوب أ عايزين نوجد عدد القوارب اللي أبحر كل منها ربعمية دقيقة على الأقل، يعني عدد القوارب اللي أبحرت ربعمية دقيقة أو أكتر. فلما هنستخدم المدرج التكراري اللي عندنا هنلاقي خمس قوارب، أبحر كل واحد فيهم ما بين ربعمية لربعمية تسعة وتسعين دقيقة، وكمان هنلاقي إن فيه قاربين أبحر كل واحد فيهم ما بين خمسمية لخمسمية تسعة وتسعين دقيقة؛ بالتالي عدد القوارب اللي أبحرت ربعمية دقيقة على الأقل يساوي خمسة زائد اتنين يعني يساوي سبع قوارب. بعد كده المطلوب ب والمطلوب هو إيجاد النسبة المئوية للقوارب اللي أبحرت مية تسعة وتسعين دقيقة على الأكثر. أول حاجة هنوجد العدد الكلي للقوارب، واللي هيساوي مجموع عدد القوارب بتاع كل فترة من الفترات اللي عندنا، فبالنسبة للفترة من صفر لتسعة وتسعين دقيقة، عدد القوارب هو سبعتاشر، أما الفترة من مية لمية تسعة وتسعين دقيقة؛ فعدد القوارب هو أربعة، أما الفترة من ميتين لميتين تسعة وتسعين دقيقة؛ فعدد القوارب هو واحد، أما الفترة من تلتمية لتلتمية تسعة وتسعين دقيقة فهنلاقي عندها فجوة؛ معنى كده إن عدد القوارب هو صفر، وبالنسبة للفترة من ربعمية لربعمية تسعة وتسعين دقيقة هنلاقي عدد القوارب هو خمسة، أما الفترة من خمسمية لخمسمية تسعة وتسعين دقيقة فهنلاقي عدد القوارب هو اتنين؛ بالتالي العدد الكلي للقوارب يساوي سبعتاشر زائد أربعة زائد واحد زائد خمسة زائد اتنين، يعني يساوي تسعة وعشرين قارب. بعد كده هنوجد عدد القوارب اللي أبحرت مية تسعة وتسعين دقيقة أو أقل، فهنلاقيها بتساوي عدد القوارب بتاع الفترة من صفر لتسعة وتسعين دقيقة زائد عدد القوارب بتاع الفترة من مية لمية تسعة وتسعين دقيقة؛ يعني هيساوي سبعتاشر زائد أربعة، يعني يساوي واحد وعشرين قارب. بالتالي نسبة القوارب اللي أبحرت مية تسعة وتسعين دقيقة على الأكثر، هتساوي واحد وعشرين على تسعة وعشرين، يعني تقريبًا هتساوي اتنين وسبعين من مية، ده معناه إن حوالي اتنين وسبعين في المية من القوارب أبحرت مية تسعة وتسعين دقيقة على الأكثر.

بكده يبقى إحنا في الفيديو ده عرفنا إن إحنا بنستخدم المدرج التكراري علشان نمثل البيانات اللي موجودة في الجدول التكراري، وعرفنا كمان إن هو نوع من التمثيل بالأعمدة، وهو عبارة عن تمثيل بياني بيعرض بيانات عددية منظمة في فترات متساوية، كمان عرفنا إزاي ننشئ مدرج تكراري، وعرفنا كمان إزاي نحلل أو نفسر البيانات لو عندنا مدرج تكراري.