فيديو: تمثيل الأعداد من ١١ حتى ١٩ باستخدام العشرات والآحاد لعناصر من الواقع

أماني يوسف

يريد آدم أن يشتري ١٧ برتقالة. اختر طريقة لشراء ١٧ برتقالة. [أ] الشكل ١ [ب] الشكل ٢ [ج] الشكل ٣

٠٦:٠٠

‏نسخة الفيديو النصية

يريد آدم أن يشتري سبعتاشر برتقالة. اختر طريقة لشراء سبعتاشر برتقالة. عندنا تلات اختيارات، أو التلات صور اللي قدامنا دول. عاوزين نعرف أي صورة فيهم اللي بتوضح السبعتاشر برتقالة اللي آدم اشتراهم أو عاوز يشتريهم.

طيب هو آدم عاوز يشتري كام برتقالة؟ سبعتاشر. تعالوا نفهم الأول سبعتاشر ده يعني إيه. يعني إيه العدد سبعتاشر ده؟ سبعتاشر مكوّن من رقمين؛ السبعة والواحد. السبعة آحاد، يعني وحدات. أما الواحد عشرات، يعني مجموعة فيها عشرة. طيب دلوقتي السبعتاشر مكوّنة عندنا من سبع آحاد، يعني سبع برتقانات مفرّطين لوحدهم. وواحد عشرات، يعني شنطة واحدة فيها عشر برتقانات. ده تفسيرنا للعدد سبعتاشر. تعالوا بقى نشوف أي اختيار هو اللي بيمثّل السبعتاشر.

لو جينا نبص لأول اختيار، هنلاقي فيه إيه؟ واحد، اتنين، تلاتة، أربعة، خمسة، ستة، سبعة؛ سبع آحاد، برتقانات أهم، كل برتقانة بوحدة أو بواحد. تمام جدًّا. طب بالنسبة للواحد عشرات؟ هل دي بعشرة؟ لأ، فمعنى كده الاختيار الأول ده مش هو اللي بيمثّل السبعتاشر. لكن ده هو بيمثل تمنية عادي؛ لأنهم كلهم تمن برتقانات عاديين، ما فيهومش مجموعات عشرات.

طيب تعالوا كده نشوف الاختيار اللي بعده. كيس فيه عشرة، عشرة برتقانات بحالهم. وكمان عشرة، عشرين. وكمان عشرة، تلاتين. وكمان عشرة، أربعين. خمسين، ستين، سبعين عشرة، يعني سبعة في العشرات. وواحدة آحاد. ده معناه إن الاختيار ده بيمثّله العدد واحد وسبعين؛ لأن عندنا واحدة بس في الآحاد، وسبعة في العشرات. بس ده مش الاختيار الصح. إحنا عاوزين سبعتاشر مش واحد وسبعين.

نيجي نشوف آخر اختيار. عندنا كام آحاد؟ واحد، اتنين، تلاتة، أربعة، خمسة، ستة، سبعة؛ سبع برتقانات في الآحاد. وكام عشرات؟ كيس واحد عشرات. كيس واحد فيه سبعة [عشرة]. فده معناه إن الاختيار التالت هو اللي بيمثل لنا السبعتاشر برتقانة اللي آدم عاوز يشتريهم. تبقى الإجابة هي الصورة دي.

نيجي لتاني جزء من السؤال: أي جزء من الصورة يطابق الرقم واحد في العدد سبعتاشر؟

مش إحنا اخترنا الصورة دي؟ وقلنا الصورة دي هي اللي بتمثّل العدد سبعتاشر؟ السؤال عندنا هنا: أي جزء من الصورة؛ الجزء ده، ولّا الجزء ده، هو اللي بيمثل الواحد اللي في العدد سبعتاشر؟ مش إحنا قلنا الواحد ده عشرات؟ معناها إن اللي بيمثل الواحد هو الجزء ده؛ الشنطة أو الحقيبة اللي فيها عشر برتقانات؟ تبقى الإجابة عندنا إيه؟ حقيبة واحدة من عشر برتقالات. هو ده الجزء اللي بيمثّل الإيه؟ الواحد.

لأن لو شفنا الاختيار اللي بعده، حقيبة واحدة من سبع برتقالات. هو إحنا عندنا حقيبة أو شنطة كده فيها سبع برتقالات؟ لأ. طب عندنا سبع حقائب من عشر برتقالات؟ لأ. ده هي حقيبة واحدة بس اللي عندنا. يبقى كده الإجابة الصح هي حقيبة واحدة من عشر برتقالات. كده إحنا جاوبنا تاني جزء من السؤال، واللي إجابته حقيبة واحدة من عشر برتقالات.

نيجي للجزء التالت والأخير في السؤال: أي جزء من الصورة يطابق الرقم سبعة في العدد سبعتاشر. سبع برتقالات إضافية ليست في الحقيبة. سبع حقائب من عشر برتقالات. سبعين برتقالة إضافية ليست في حقيبة.

السؤال المرة دي بيسأل عن الرقم سبعة اللي موجود في العدد سبعتاشر. يعني بيسأل عن الرقم سبعة ده اللي موجود في العدد سبعتاشر اللي مثّلناه في الصورة اللي قدامنا. طيب مش سبعة ده اللي هو الجزء الآحاد، يعني الجزء ده؟ السبع برتقانات دول؟ السبع برتقانات دول بقى، اللي بيمثّلهم أي اختيار؟ سبع برتقالات إضافية ليست في الحقيبة. يعني همّ سبع برتقالات زيادة مش موجودين في الحقيبة. يبقى هو ده الاختيار الصح؛ سبع برتقالات إضافية ليست في الحقيبة.

تعالوا نشوف الاختيارين التانيين؛ علشان نتأكد إن همّ غلط. الاختيار التاني بيقول لنا إيه؟ سبع حقائب من عشر برتقالات. هو إحنا قدامنا هنا فيه سبعة شنط، كل شنطة فيها عشرة برتقانات؟ لأ طبعًا. طب الاختيار اللي بعده؟ سبعين برتقانة مش موجودين في حقيبة؟ هل دول سبعين، ولا سبعة؟ لأ دول سبعة. يبقى برضو الاختيار ده مش هو اللي صح.

ومعنى كده إن إجابة السؤال: سبع برتقالات إضافية ليست في الحقيبة. وبكده نكون حلّينا السؤال بالتلات أجزاء بتوعه. أول جزء إجابته الصورة دي. وتاني جزء إجابته حقيبة واحدة من عشر برتقالات. وتالت جزء إجابته سبع برتقالات إضافية ليست في الحقيبة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.