فيديو: امتحان الديناميكا • ٢٠١٧/٢٠١٦ • السؤال الخامس عشر

امتحان الديناميكا • ٢٠١٧/٢٠١٦ • السؤال الخامس عشر

٠٢:٣١

‏نسخة الفيديو النصية

إذا أثّرت القوة المتجه ق بتساوي تلاتة في اتجاه متجه الوحدة س، زائد أربعة في اتجاه متجه الوحدة ص داين على جسيم. فكانت إزاحته المتجه ف بتساوي ن في اتجاه متجه الوحدة س؛ زائد، ن تربيع زائد ن في اتجاه متجه الوحدة ص. فأوجد قدرة المتجه ق عند ن بتساوي أربعة ثانية؛ بالداين سنتيمتر لكل ثانية.

مطلوب نوجد قدرة المتجه ق. والقدرة هتكون بتساوي ناتج الضرب القياسي بين المتجهين؛ متجه القوة ق، ومتجه السرعة ع. معطى عندنا متجه القوة، لكن غير معطى متجه السرعة.

اللي معطى هو متجه إزاحة الجسيم. فعلشان نقدر نوجد متجه السرعة من متجه إزاحة الجسيم، محتاجين علاقة بين متجه السرعة ومتجه الإزاحة. واللي هتكون إن متجه السرعة هيساوي المشتقّة الأولى لمتجه الإزاحة بالنسبة للزمن.

يعني متجه السرعة هيساوي … اشتقاق ن بالنسبة للزمن هيساوي واحد، يعني هيكون عندنا متجه الوحدة س. واشتقاق ن تربيع زائد ن بالنسبة لِـ ن، هيكون بيساوي اتنين ن زائد واحد في اتجاه متجه الوحدة ص. ويبقى كده قدِرنا نوجد متجه السرعة اللي بيتحرّك بيها الجسيم، ووحدتها هتكون سنتيمتر عَ الثانية.

وبالتالي نقدر نوجد قدرة متجه القوة ق. واللي هتكون بتساوي متجه القوة ق؛ اللي هو تلاتة في اتجاه متجه الوحدة س، زائد أربعة في اتجاه متجه الوحدة ص. ومتجه ع اللي هيكون متجه الوحدة س؛ زائد، اتنين ن زائد واحد في اتجاه متجه الوحدة ص. فناتج الضرب القياسي هيكون بيساوي تلاتة مضروبة في واحد، زائد أربعة مضروبة في اتنين ن زائد واحد.

تلاتة في واحد هتساوي تلاتة. وهنضرب أربعة في اتنين ن، وهنضرب أربعة في واحد؛ فهيكون عندنا تمنية ن زائد أربعة. يعني القدرة هتساوي سبعة زائد تمنية ن، ووحدتها هتكون داين سنتيمتر على الثانية.

وبما إن مطلوب نوجد قدرة متجه القوة ق عند ن بتساوي أربع ثواني، فهنعوّض عن ن بأربعة. يعني القدرة هتكون بتساوي سبعة زائد، تمنية مضروبة في أربعة. يعني القدرة هتساوي تسعة وتلاتين داين سنتيمتر على الثانية.

ويبقى كده قدِرنا نوجد قدرة متجه القوة ق عند ن بتساوي أربع ثواني، وكانت بتساوي تسعة وتلاتين داين سنتيمتر على الثانية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.