فيديو: قسمة الأعداد المكونة من أربعة أرقام أو أكثر

يتناول الفيديو خطوات قسمة الأعداد المكونة من أربعة أرقام أو أكثر على عدد من رقم واحد، وأمثلة عليها.

٠٩:١٠

‏نسخة الفيديو النصية

قسمة الأعداد المكوّنة من أربعة أرقام أو أكثر. هنتعلّم إزّاي نقدر نقسم أيّ عدد بيتكوّن من أربعة أرقام أو أكثر على عدد مكوّن من رقم واحد.

لو عرفنا إن في أحد المسابقات كانت جائزة المركز الأول قدرها خمسة آلاف تمنمية وتمنية جنيهًا، وفاز بالمركز الأول تلات أشخاص. ده معناه إن هم هيتقاسموا الجائزة. عايزين نعرف ما نصيب كل شخص من الجائزة.

عشان نقدر نجيب نصيب كل شخص من الجائزة، هنقسم الجائزة على تلاتة، أو قيمة الجائزة على تلاتة. يعني محتاجين نجيب ناتج قسمة خمسة آلاف تمنمية وتمنية على تلاتة. هنعملها باستخدام القسمة المطوّلة. هنبتدي من العدد؛ عفوًا من أكبر قيمة مكانية في المقسوم، هنا اللي هي الآلاف.

هنبتدي نقسم الخمسة، اللي في الآلاف، على المقسوم عليه، اللي هو تلاتة. والناتج هنبتدي نحطّه في الآلاف، في المكان ده اللي بنحطّ فيه ناتج القسمة. خمسة على تلاتة؛ محتاجين نشوف في جدول الضرب إيه العدد اللي لو ضربناه في تلاتة يدّينا أقرب ناتج للخمسة. ما ينفعش يبقى أزيد. هنلاقي إن العدد هو: واحد.

نفتكر الخطوات اللي بنطبّقها دايمًا في القسمة المطوّلة. بنبتدي أول خطوة بنعملها: اقسم، وبعدين اضرب، وبعدين اطرح. وبعدين أنزل؛ يعني ننزّل الرقم اللي عليه الدور في المقسوم. ونكرّر الخطوات دي تاني لغاية ما ننزّل آخِر رقم في المقسوم. وأول ما نخلّص عملية القسمة يبقى كده حصلنا على ناتج القسمة.

دلوقتي إحنا عملنا أول خطوة اللي هي اقسم. قسمنا الخمسة على التلاتة، طلع ناتج القسمة واحد. الخطوة اللي بعد كده هي اضرب؛ هنضرب الواحد في تلاتة، ونحطّ حاصل الضرب هنا. واحد في تلاتة بتلاتة. الخطوة اللي بعد كده هي اطرح؛ هنطرح خمسة ناقص تلاتة هيساوي اتنين. الخطوة اللي بعد كده هي أنزل؛ عايزين ننزّل الرقم اللي بعد كده اللي عليه الدور في المقسوم، اللي هو: التمنية. ونبتدي نعيد الخطوات تاني.

عايزين نقسم تمنية وعشرين على التلاتة. هنشوف في جدول الضرب العدد اللي لو ضربناه في تلاتة يدّينا أقرب ناتج لتمنية وعشرين. هنلاقي إن العدد ده هو: تسعة، هنحطّه في خانة المئات. الخطوة اللي بعد كده هي اضرب؛ هنضرب تسعة في تلاتة هيبقى الناتج سبعة وعشرين. الخطوة اللي بعد كده اطرح؛ تمنية وعشرين ناقص سبعة وعشرين، هيبقى الناتج واحد. الخطوة اللي بعد كده أنزل؛ هننزّل الرقم اللي عليه الدور في المقسوم، اللي هو: الصفر.

نبتدي نعيد نفس الخطوات. هنقسم دلوقتي عشرة على التلاتة. هنشوف أقرب … العدد اللي لو ضربناه في تلاتة يدّينا أقرب ناتج للعشرة. هنلاقي إن العدد ده هو: تلاتة. الخطوة اللي بعدها هنضرب؛ تلاتة في تلاتة هيبقى الناتج تسعة. بعد كده الخطوة اللي بعدها هنطرح؛ عشرة ناقص تسعة يساوي واحد. الخطوة اللي بعد كده أنزل؛ هننزّل الرقم اللي عليه الدور في المقسوم، اللي هو: تمنية، ونكرّر الخطوات تاني.

هنقسم تمنتاشر على التلاتة، هيبقى الناتج ستة. الخطوة اللي بعد كده هنضرب؛ ستة في تلاتة هيساوي تمنتاشر. الخطوة اللي بعدها هنطرح؛ تمنتاشر ناقص تمنتاشر يساوي صفر. دلوقتي ما عادش فيه أيّ رقم موجود في المقسوم ما استخدمناهوش. نزّلنا آخِر رقم في المقسوم، ووصلنا لناتج القسمة، وباقي قسمة عبارة عن: صفر. ده معناه إن نصيب كل شخص من الجائزة هو: ألف وتسعمية ستة وتلاتين جنيهًا. هنجيب صفحة جديدة، ونشوف مثال كمان.

ذهب أحمد لشراء خاتم الزفاف قبل حفلة زفافه، فوجد أن سعر الخاتمين هو: سبعة آلاف خمسمية خمسة وتمانين جنيهًا. فما سعر الخاتم الواحد؟

عشان نقدر نجيب سعر الخاتم الواحد، هنقسم السعر اللي هو بتاع الاتنين على اتنين. يبقى نقدر نقول إن إحنا دلوقتي محتاجين نجيب … دلوقتي هنستخدم القسمة المطوّلة عشان نجيب ناتج قسمة سبعة آلاف خمسمية خمسة وتمانين على اتنين. نفتكر مع بعض الخطوات اللي بنستخدمها دايمًا في القسمة المطوّلة. هي: اقسم، اضرب، اطرح، أنزل. بنكرّر الخطوات دي لكل رقم من أرقام المقسوم لغاية ما نخلّص كل الأرقام اللي بيتكوّن منها المقسوم.

بنبتدي دايمًا القسمة من أكبر قيمة مكانية في المقسوم، اللي هي هنا الآلاف، ونبدأ نقسم سبعة على اتنين. عايزين نشوف في جدول الضرب إيه العدد اللي لو ضربناه في اتنين يدّينا أقرب ناتج للسبعة. ما ينفعش يبقى أزيد من سبعة. هنلاقي إن العدد هو: تلاتة. دلوقتي الخطوة اللي عليها الدور إن إحنا هنضرب؛ تلاتة في اتنين هيبقى الناتج ستة. الخطوة اللي بعد كده هنطرح؛ سبعة ناقص ستة هيبقى الناتج واحد. الخطوة اللي بعد كده أنزل؛ هننزّل الرقم اللي عليه الدور في المقسوم، اللي هو: خمسة، ونكرّر نفس الخطوات تاني.

دلوقتي عايزين نقسم خمستاشر على اتنين. هنشوف إيه العدد اللي لو ضربناه في اتنين يدّينا خمستاشر، أو أقل. هنلاقي إن العدد هو: سبعة. الخطوة اللي بعد كده هنضرب السبعة في الاتنين، هيبقى الناتج أربعتاشر. الخطوة اللي بعدها هنطرح؛ خمستاشر ناقص أربعتاشر هيبقى الناتج واحد. الخطوة اللي بعد كده هننزّل الرقم اللي عليه الدور في المقسوم، اللي هو: تمنية، ونكرّر نفس الخطوات تاني.

هنقسم تمنتاشر على الاتنين. هنشوف إيه العدد اللي لو ضربناه في اتنين هيدّينا تمنتاشر، هنلاقي إن العدد ده هو: تسعة. الخطوة اللي بعدها هنضرب التسعة في الاتنين، هيبقى الناتج تمنتاشر. الخطوة اللي بعد كده هنطرح؛ هيبقى الناتج صفر. الخطوة اللي بعد كده هننزّل الرقم اللي عليه الدور في المقسوم، اللي هو: الخمسة.

وبعد كده هنقسم؛ نقسم الخمسة على الاتنين. إيه العدد اللي لو ضربناه في اتنين هيدّينا أقرب ناتج للخمسة؟ هيبقى العدد ده هو: اتنين. الخطوة اللي بعدها هنضرب اتنين في اتنين، هيبقى الناتج أربعة. الخطوة اللي بعد كده هنطرح؛ خمسة ناقص أربعة يساوي واحد.

المفروض الخطوة اللي بعد كده هي أنزل، بس ما فيش أيّ رقم باقي في المقسوم عشان ننزّله. فكده إحنا خلّصنا كل الأرقام اللي بيتكوّن منها المقسوم. بالتالي إحنا خلّصنا عملية القسمة بناتج قسمة: تلات آلاف سبعمية اتنين وتسعين، وباقي قسمة: واحد. ده معناه إن سعر الخاتم الواحد: تلات آلاف سبعمية اتنين وتسعين جنيهًا.

عرفنا في الدرس ده إزّاي نقدر نقسم أيّ عدد بيتكوّن من أربعة أرقام على عدد مكوّن من رقم واحد. وبنستخدم القسمة المطوّلة، والخطوات اللي بنتّبعها في القسمة المطوّلة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.