فيديو: إعادة تجميع العشرات باعتبارها آحادًا

يوضح الفيديو كيفية استخدام إعادة التجميع بشكل عكسي من العشرات للآحاد لإيجاد الفرق، مع التوضيح باستخدام قِطَع العد، وأمثلةً عليها.

٠٤:٠٥

‏نسخة الفيديو النصية

إعادة تجميع العشرات كآحاد.

في الفيديو ده هنتعلم إزاي بنستخدم إعادة التجميع لإيجاد الفرق. باستخدام قطع العد وإعادة التجميع، عاوزين نوجد أربعة وعشرين ناقص تمنية.

أول حاجة هنعبر عن أربعة وعشرين باستخدام قطع العَدّ بالشكل ده. بعدين نشطب على تمن قطع عَدّ من الآحاد للدلالة على الطرح. بس هنلاحظ إن عدد قطع العَدّ في الآحاد أقل من تمنية. فإزاي هنطرح منهم تمنية؟

عشان نحل المشكلة دي، هنعيد تجميع مجموعة قطع عَدّ من العشرات، ونفكها لعشر آحاد بالشكل ده. فهيبقى في الآحاد أربعتاشر قطعة عَدّ. دلوقتي نقدر نشطب منهم تمن قطع عَدّ؛ عشان نطرح بالشكل ده. فهيتبقى ست قطع عَدّ في الآحاد، ومجموعة قطع عَدّ في العشرات. يعني ستاشر قطعة عَدّ، وده معناه إن أربعة وعشرين ناقص تمنية هيساوي ستاشر.

نتنقل لصفحة تانية ونحل مثال تاني.

عاوزين نوجد واحد وتلاتين ناقص أربعة، باستخدام قطع العَدّ وإعادة التجميع.

بنفس الطريقة هنعبر عن واحد وتلاتين باستخدام قطع العَدّ بالشكل ده. بعدين نشطب على أربع قطع عَدّ من الآحاد للدلالة على الطرح. فهنلاقي إن ما فيش غير قطعة واحدة بس في الآحاد. فهنعيد تجميع مجموعة قطع عَدّ من العشرات، ونفكها لعشر آحاد بالشكل ده. يبقى كده في الآحاد فيه حداشر قطعة عَدّ. فنقدر نطرح أو نشطب منهم أربع قطع عَدّ بالشكل ده. فهيتبقى قدامنا سبع قطع عَدّ في الآحاد، ومجموعتين قطع عَدّ في العشرات. يعني سبعة وعشرين قطعة عَدّ وده معناه إن واحد وتلاتين ناقص أربعة هيساوي سبعة وعشرين.

نتنقل لصفحة تانية.

عاوزين نوجد اتنين وأربعين ناقص ستة، باستخدام قطع العَدّ وإعادة التجميع.

فأول حاجة هنعبّر عن اتنين وأربعين باستخدام قطع العَدّ بالشكل ده. بعدين نشطُب على ست قطع من الآحاد للدلالة على الطرح. فهنلاقي إن ما فيش غير قطعتين. فهنعيد تجميع مجموعة قطع عَدّ من العشرات، ونفكها لعشر قطع عَدّ في الآحاد، بالشكل ده. يبقى كده في الآحاد فيه اتناشر قطعة عَدّ، فهنشطب منهم ست قطع بالشكل ده. فهيتبقى ست قطع عَدّ في الآحاد وتلات مجموعات قطع عَدّ في العشرات؛ يعني ستة وتلاتين قطعة عَدّ. وده معناه إن اتنين وأربعين ناقص ستة هيساوي ستة وتلاتين.

وبكده نبقى خلّصنا الفيديو ده، اللي اتعلمنا فيه إزاي بنستخدم إعادة التجميع لإيجاد الفرق.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.