فيديو: تحليل التمثيل بالأعمدة

يوضح الفيديو كيفية تحليل البيانات الممثَّلة بالأعمدة، وأمثلة عليها.

٠٦:٠٦

‏نسخة الفيديو النصية

تحليل التمثيل بالأعمدة.

في الفيديو ده هنتعلّم إزّاي بنحلّل البيانات الممثَّلة بالأعمدة. البيانات هي مجموعة من المعلومات، اللي بنحتاجها عشان نقيس حاجة معينة. وفيه طرق كتيرة لعرضها، عشان نسهّل على نفسنا قراءتها، والتعامل معاها. ومن الطرق دي، التمثيل بالأعمدة.

التمثيل بالأعمدة هو عرض للبيانات بالرسم. بحيث إننا نقدر نعرف البيانات المختلفة، بمجرد النظر. هنوضّح إزّاي بنحلّل البيانات الممثَّلة بالأعمدة، في المثال ده. سأل خالد زملاؤه في الفصل، عن نكهة الأيس كريم المفضّلة ليهم. ومثِّل البيانات في الشكل اللي هيظهر. والمطلوب نجاوب الأسئلة دي. واحد: ما النكهة التي اختارها أقلّ عدد من الطلبة؟

هنبصّ للشكل اللي قدامنا. كل مربع متلوّن، بيمثّل طالب واحد اختار النكهة اللي تحتيه. يبقى عشان نعرف أقلّ نكهة الطلاب اختاروها، يبقى هنشوف أقلّ نكهة فوقيها مربعات متلوّنة. بمجرد النظر، هنلاقي إن الفانيليا هي اللي فوقيها أقلّ عدد من المربعات. يبقى النكهة التي اختارها أقلّ عدد من الطلبة، هي الفانيليا.

اتنين: ما الفرق بين عدد الطلبة الذين فضّلوا نكهة الفراولة، ونكهة الشوكولاتة؟

عشان نعرف الفرق بين عدد الطلبة اللي اختاروا النكهتين، هنعدّ المربعات اللي فوق كل نكهة. وبعدين نطرح العدد الأصغر، من العدد الأكبر. من الشكل، هنلاقي عدد المربعات المتلوّنة فوق الشوكولاتة، خمسة. وعدد المربعات المتلوّنة فوق الفراولة، تلاتة.

يبقى الفرق هيساوي … خمسة، اللي هي عدد المربعات المتلوّنة فوق الشوكولاتة. ناقص تلاتة، اللي هي عدد المربعات المتلوّنة فوق الفراولة. هيساوي اتنين.

تلاتة: ما عدد الطلبة اللي سألهم خالد؟

عشان نعرف عدد الطلبة اللي سألهم خالد، هنعدّ المربعات في كل عمود، فوق كل نكهة. ونجمّعهم مع بعض. هنلاقي فوق الشوكولاتة، خمسة زيّ ما قُلنا. وفوق الفانيليا، فيه مربعين متلوّنين. وفوق الفراولة، فيه تلات مربعات متلوّنة. وفوق المانجو، فيه أربع مربعات متلوّنة. يبقى المجموع هيساوي خمسة زائد اتنين، زائد تلاتة، زائد أربعة؛ هيساوي أربعتاشر.

نتنقل لصفحة تانية، ونحل مثال تاني. سألت سعاد أصدقاءها في النادي عن مصيفهم المفضّل. وسجّلت اختياراتهم في الشكل اللي هيظهر. والمطلوب من الشكل، إجابة الأسئلة التالية. واحد: ما المصيف الذي اختاره ستة من أصدقاء سعاد؟

عشان نجاوب على السؤال ده، هنشوف العمود اللي فوقه ست مربعات متلوّنة. فهنبصّ على محور العدد على الشمال. ونشوف رقم ستة فين. ونشوف أيّ عمود واصل للخط اللي بيدلّ عليه. هنلاقي المصيف هو مرسى مطروح. يبقى المصيف هو مرسى مطروح.

اتنين: ما المصيفان اللذان اختارهما نفس العدد من أصدقاء سعاد؟

عشان نعرف المصيفين اللي اختارهم نفس العدد، هنعدّ المربعات اللي في كل عمود. هنلاقي العمود الأول، فيه أربع مربعات. والعمود التاني، فيه ست مربعات. والعمود التالت، فيه تلات مربعات. والعمود الرابع، فيه تلات مربعات. يبقى المصيفان اللي اختارهم نفس العدد من أصدقاء سعاد، هما: الغردقة، ودهب.

تلاتة: مجموع أصدقاء سعاد الذين اختاروا مرسى مطروح، والإسكندرية. المجموع هيساوي … ستة؛ اللي هو عدد اللي اختاروا مرسى مطروح. زائد أربعة؛ اللي هو عدد اللي اختاروا إسكندرية. هيساوي عشرة.

وبكده نبقى خلّصنا الفيديو ده. اللي اتكلمنا فيه عن تحليل البيانات، الممثَّلة بالأعمدة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.