فيديو: الأعداد العشرية والنقود

يوضح الفيديو كيفية التعبير عن العملات النقدية المعدنية بالأعداد العشرية وبالكسور، وأمثلةً عليها.

٠٦:٢١

‏نسخة الفيديو النصية

الأعداد العشرية والنقود.

في الفيديو ده هنشرح العلاقة بين العملات النقدية، والأعداد العشرية. هتظهر قدامنا مجموعة من العملات النقدية المعدنية. والرقم العشري المعبّر عنها، نسبة للجنيه. أول حاجة خمس قروش. وبنكتبها خمسة قروش. وبتساوي خمس أجزاء من مائة، من الجنيه. والعدد العشري المعبّر عنها، هو خمسة من مية. ولو عاوزين نعبّر عنها بكسر، هيبقى خمسة على مية.

العملة التانية: عشر قروش. ودي بنكتبها عشرة قروش. وبتساوي عشرة أجزاء من مائة، من الجنيه. والعدد العشري المعبّر عنها، هو عشرة من مية. والكسر المعبّر عنها، هو عشرة على مية.

العملة التالتة: خمسة وعشرين قرش. وبنكتبها خمسة وعشرون قرشًا. وبتساوي خمسة وعشرين جزء من مائة، من الجنيه. ولو عايزين نعبّر عنها بعدد عشري، هيبقى خمسة وعشرين من مية. أمّا لو عاوزين نعبّر عنها بكسر، فهيبقى خمسة وعشرين على مية.

نقسم الصفحة. العملة اللي بعديها هي خمسين قرش. وبنكتبها خمسون قرشًا. وبتساوي خمسين جزء من مائة، من الجنيه. ولو عايزين نعبّر عنها بعدد عشري، هيبقى خمسين من مية. أمّا لو عاوزين نعبّر عنها بكسر، فهيبقى خمسين على مية.

العملة المعدنية الأخيرة هي مية قرش، أو جنيه. وبنكتبها مائة قرش، أو جنيه. وبتساوي مية جزء من مائة، من الجنيه. والعدد العشري المعبّر عن، هو واحد صحيح. ولو عايزين نكتبها على شكل كسر، هيبقى مية على مية.

نقدر نكتب قيمة النقود كأجزاء من الجنيه. نتنقل لصفحة تانية، ونحلّ شويّة أمثلة. صَرف جمال خمسة وسبعين قرش، لشراء بعض الحلوى. فما مقدار ما صرفه، نسبةً للجنيه؟

أول حاجة نكتب مقدار النقود كعدد عشري. فخمسة وسبعين قرش، هيبقى خمسة وسبعين من مية. أو لو عاوزين نعبّر عنها بكسر، هيبقى خمسة وسبعين على مية. أمّا الجنيه فهيبقى واحد صحيح. أو لو هنعبّر عنه بكسر، هيبقى مية على مية.

والشكل اللي هيظهر، بيعبّر عن خمسة وسبعين قرش. يعني تلات عملات من فئة خمسة وعشرين قرش. أمّا الجنيه، بنعبّر عنه بأربع عملات من فئة خمسة وعشرين قرش. يبقى الخمسة وسبعين قرش عبارة عن تلات عملات. والجنيه عبارة عن أربع عملات من نفس الفئة. يبقى خمسة وسبعين قرش بتساوي تلاتة على أربعة من الجنيه.

نتنقل لصفحة تانية، ونحلّ مثال تاني. وجد أحمد عشرين قرش على الرصيف. فما مقدار ما وجده، نسبةً للجنيه؟

نكتب مقدار النقود، كعدد عشري. فعشرين قرش، هتبقى عشرين من مية. ولو عاوزين نكتبها على شكل كسر، هتبقى عشرين على مية. أمّا الجنيه، فهو بيساوي واحد صحيح. أو لو عاوزين نكتبه على شكل كسر، هيبقى مية على مية.

والشكل اللي هيظهر بيعبّر عن مقدار عشرين قرش. يعني عملتين من فئة العشر قروش. أمّا الجنيه، فبنعبّر عنه بعشر عملات، من فئة العشرة قروش. يعني عشرين قرش بتساوي عملتين. وجنيه بيساوي عشرة عملات من نفس الفئة. يبقى العشرين قرش بتساوي اتنين على عشرة من الجنيه. أو بتساوي واحد على خمسة من الجنيه.

نتنقل لصفحة تانية، ونحلّ مثال تاني. اشترت سارة برتقالة بخمسين قرش. فما مقدار ما صرفت، مقارنةً بالجنيه؟

أول حاجة هنكتب مقدار النقود، كعدد عشري. فخمسين قرش هيساوي خمسين من مية. ولو عاوزين نكتبها على شكل كسر، هيبقى خمسين على مية. أمّا الجنيه فهو بيساوي واحد صحيح. أو لو عاوزين نكتبه على شكل كسر، هيبقى مية على مية.

وممكن نعبّر عن خمسين قرش، بالشكل ده. يعني عملة واحدة من فئة الخمسين قرش. أمّا لو هنعبّر عن الجنيه، فهنعبّر عنه بعملتين من فئة الخمسين قرش. يعني الخمسين قرش بتساوي عملة واحدة. والجنيه يساوي عملتين من نفس الفئة. يبقى الخمسين قرش بتساوي واحد على اتنين من الجنيه.

وبكده نبقى خلّصنا الفيديو ده. اللي اتعلّمنا فيه العلاقة بين العملات النقدية، والأعداد العشرية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.