فيديو: استخدام الصور لإيجاد كل النواتج الممكنة في المسائل الحياتية

يوضح الفيديو كيفية تحديد كل النواتج الممكنة لإحدى التجارب باستخدام طريقتَي الجدول والرسم الشجري، مع حل أمثلة توضيحية.

٠٨:٤٩

‏نسخة الفيديو النصية

استخدام الصور لإيجاد كل النواتج الممكنة في المسائل الحياتية.

في الفيديو ده هنتعلم إزاي نقدر نحدّد كل النواتج الممكنة لتجربة ما قبل إجرائها. وده بيتم باستخدام طريقتين؛ طريقة الجدول، وطريقة الرسم الشجري. وكمان هنحل أمثلة للتوضيح.

وهنبدأ أول حاجة بتعريف الناتج. تعريف الناتج هو كل نتيجة ممكنة يمكن أن تحدث في تجربة. ولتحديد النواتج الممكنة لتجربة ما، نستخدم الجدول أو الرسم الشجري.

عشان نفهم أكتر، نتخيل لو إحنا رمينا عملة معدنية لأعلى. وبكده يبقى إحنا أجرينا تجربة ما. النواتج اللي ممكن تنتج من التجربة دي إما كتابة أو إما صورة. وبالتالي بنقول على كل نتيجة ممكن تحصل بعد إجراء تجربة ما، بنسميها ناتج.

يبقى إحنا عندنا ظهور الكتابة ناتج، أو ظهور الصورة ناتج. هنحل مثال عشان نفهم أكتر.

بنقرا المثال التالي: في مباراة كرة سلة، إذا صوب خالد رميتين في اتجاه السلة، حدد النواتج الممكنة لرميتي خالد باستخدام الجدول.

للتوضيح أكتر لمّا خالد بيصوّب الكرة على السلة، ممكن أول رمية تيجي في السلة، وممكن تيجي خارج السلة. بعد كده تاني رمية برضو ممكن تيجي في السلة، وممكن تيجي خارج السلة.

مطلوب مننا نحدّد النواتج الممكنة لرميتي خالد مع بعض، مش كل رمية لوحدها. لأ، ناتج الرميتين في الآخر خالص هيكون إيه، باستخدام الجدول.

من خلال الجدول اللي رسمناه ده، هنقدر نحدد النواتج الممكنة لرميتي خالد. بنلاقي عندنا أول حاجة الرمية الأولى والرمية الثانية.

بنلاقي إن الرمية الأولى نتيجتها ممكن تكون في السلة أو خارج السلة. لو كانت في السلة بنشوف الرمية الثانية هيكون نتيجتها إيه. الرمية الثانية هيكون نتيجتها إما في السلة أو خارج السلة. لو كانت في السلة بنلاقي عندنا إن أول ناتج إن الرمية الأولى كانت في السلة، والرمية الثانية كانت برضو في السلة.

أما لو كانت الرمية الثانية خارج السلة، فبنلاقي عندنا إن أحد نواتج رميتي خالد، إن الرمية الأولى كانت في السلة، والرمية التانية كانت خارج السلة.

هنرجع مِ الأول بقى للرمية الأولى، ونشوف لو كانت الرمية الأولى خارج السلة إيه اللي هيحصل. فبنلاقي إن الرمية الثانية هتكون يا إما في السلة أو خارج السلة، بعد ما كانت الرمية الأولى خارج السلة.

وبكده بيكون أحد نواتج رميتي خالد، إن الرمية الأولى كانت خارج السلة، والرمية الثانية كانت في السلة.

أما لو كانت الرمية الثانية خارج السلة، بعد ما كانت الرمية الأولى خارج السلة. فبنلاقي إن آخر ناتج من النواتج الممكنة لرميتي خالد، هو إن الكرة الأولى خارج السلة، والكرة الثانية خارج السلة أيضًا.

وبكده يبقى إحنا أوجدنا كل النواتج الممكنة لرميتي خالد باستخدام الجدول. يبقى لو راجعنا عَ النواتج بنلاقي عندنا أربع نواتج ممكنة لرميتي خالد. يبقى بنكتب عدد النواتج الممكنة لرميتي خالد أربع نواتج.

نراجع بسرعة عَ النواتج كده. بنلاقي عندنا ناتج رميتي خالد؛ يا إما الرمية الأولى في السلة والرمية الثانية أيضًا في السلة. أو الرمية الأولى في السلة والرمية الثانية خارج السلة. إما الرمية الأولى خارج السلة والثانية في السلة. وآخر ناتج إن الرميتين هيكونوا خارج السلة.

هنكمل بعد كده ونحل مثال آخر. بنكمل ونقرا المثال التالي: يقوم طالب بتدوير المؤشرين على القرصين التاليين. حدد عدد النواتج الممكنة لتلك التجربة باستخدام الرسم الشجري.

بنلاقي عندنا قرصين زي ما إحنا شايفين. آدي القرص الأول، وآدي القرص الثاني. بنلاقي إن القرص الأول بيحتوي على تلات ألوان؛ بنفسجي، وبرتقالي، وأصفر. وبنلاقي إن القرص الثاني بيحتوي على لونين فقط؛ وهما الأحمر، والأزرق.

عاوزين نعرف لمّا طالب يحرك المؤشر على القرص الأول، وبعد كده يحرك المؤشر على القرص الثاني. إيه هي النواتج الممكنة لتلك التجربة.

هنبدأ دلوقتي نشوف إزاي نقدر نوجد عدد النواتج باستخدام الرسم الشجري. بنلاقي إن نتيجة تدوير الطالب للمؤشر على القرص الأول. بنلاقي إن المؤشر ممكن ييجي على اللون البرتقالي، أو اللون البنفسجي، أو اللون الأصفر.

بعد ما عرفنا نتيجة المؤشر الأول وهي التلات ألوان اللي إحنا شايفينهم. فلو كانت نتيجة المؤشر الأول اللون البرتقالي، بنلاقي إن نتيجة المؤشر الثاني إما أحمر أو أزرق. فبنرسم أسهم زي ما إحنا شايفين كده.

بعد النتيجة الأولى بنلاقي إن من النتيجة الأولى فيه نتيجتين؛ إما أحمر، وإما أزرق. ومن هنا اتسمّى بالرسم الشجري؛ لأن زي ما إحنا شايفين كده أول نتيجة بتتفرع لأكتر من نتيجة. ولو كان فيه مؤشر تالت هنلاقي إن فيه تفريعات أخرى أيضًا.

بنرجع تاني للمثال بتاعنا. يبقى لو المؤشر الأول على البرتقالي، فالمؤشر التاني هيكون على أحمر أو أزرق. وبكده بتكون النتيجة الممكنة برتقالي أحمر، وبرتقالي أزرق.

بنشوف بعد كده لو كانت نتيجة المؤشر الأول اللون البنفسجي، ونتيجة المؤشر التاني بعدها هتكون أحمر أو أزرق. وبالتالي النواتج الممكنة هتكون بنفسجي أحمر، وبنفسجي أزرق.

آخر حاجة عندنا لو المؤشر الأول أشار إلى اللون الأصفر، والمؤشر الثاني هيشير للون الأحمر أو الأزرق. وبكده بنلاقي إن النواتج هتكون عبارة عن أصفر وأحمر، وأصفر وأزرق.

يبقى عدد النواتج الممكنة عندنا: واحد، اتنين، تلاتة، أربعة، خمسة، ستة. فبنكتب: عدد النواتج الممكنة لهذه التجربة ست نواتج.

يبقى من خلال المثال ده اتعلمنا إزاي نقدر نحدد عدد النواتج الممكنة لتجربة باستخدام الرسم الشجري.

زي ما إحنا شايفين بنلاقي إن التجربة بتتم على مرحلتين؛ أول حاجة المؤشر الأول، تاني حاجة المؤشر الثاني. بنبدأ نحدد نواتج المؤشر الأول زي ما إحنا شايفين، التلات ألوان اللي شُفناهم. وبعد كده بنكتب نواتج المؤشر الثاني قصاد كل ناتج من نواتج المؤشر الأول. بنرسم أسهم زي ما إحنا شايفين كده زي الشجرة. بعد كده بنحدّد النواتج النهائية، ونشوف عددهم كام. زي ما إحنا شايفين طلع إن عدد النواتج الممكنة ست نواتج.

يبقى في الفيديو ده اتعلّمنا إزاي نقدر نحدّد كل النواتج الممكنة لتجربة ما قبل إجرائها. وده تم باستخدام طريقتين؛ طريقة الجدول، وطريقة الرسم الشجري. وحلينا أمثلة لتوضيح الفكرة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.