فيديو: تمثيل الكسور على خط الأعداد

يوضح الفيديو كيفية تمثيل الكسور على خط الأعداد، وأمثلةً عليها.

٠٢:٤٧

‏نسخة الفيديو النصية

تمثيل الكسور على خط الأعداد.

في الفيديو هنتعلم إزاي بنمثّل الكسور على خط الأعداد. خط الأعداد هو خط نقدر نمثّل الأعداد الطبيعية بنقط عليه. وبرضو ممكن نمثّل الكسور عليه. وهنشوف هنعمل ده إزاي.

لعب أحمد في النص الأول من مباراة لكرة القدم. فإذا مثّلنا المباراة على خط الأعداد التالي، فأيّ نقطة بتعبّر عن الفترة اللي لعبها أحمد؟

الخط الظاهر قدامنا، عليه تلات نقط. أ، وهي نقطة الصفر. وَ ج، وبتعبّر عن الواحد. وهي المباراة الكاملة. وَ ب، في منتصف المسافة ما بين أ، وَ ج. يعني ممكن نعبّر عن ب، بنُص. اللي هي بتعبّر عن نص المباراة اللي لعبها أحمد. نص بتدلّ على جزء واحد من جزئين متساويين. وبالتالي نقطة ب بتعبّر عن منتصف المباراة.

نتنقل لصفحة تانية، ونحل مثال تاني. هيظهر قدامنا خط للأعداد. وعاوزين نعرف الكسر اللي بتعبّر عنه نقطة أ.

نفتكر إن لو كسر، البسط بتاعه بيساوي صفر، فالكسر بيساوي الصفر. يعني مثلًا صفر على أربعة، هيساوي صفر. وإذا كان البسط والمقام متساويين، فالكسر بيكافئ الواحد. يعني مثلًا أربعة على أربعة، هيساوي واحد. من الشكل، هنلاحظ إن كل نقطة بتزيد عن النقطة اللي على شمالها، بمقدار واحد على أربعة. يعني الفترة ما بين كل نقطتين، بتساوي واحد على أربعة.

يبقى الكسر المعبّر عن نقطة أ، بيساوي … نبصّ في الشكل على النقطة اللي على الشمال الـ أ، هنلاقيها اتنين على أربعة. يبقى اتنين على أربعة، زائد واحد على أربعة. هيساوي تلاتة على أربعة. يعني نقطة أ بتعبّر عن تلاتة على أربعة.

وبكده نبقى خلّصنا الفيديو ده. اللي اتعلّمنا فيه إزاي بنمثّل الكسور على خط الأعداد.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.