فيديو: العمليات على المصفوفات

أوجد المصفوفة الملحَقة للمصفوفة أ = (٢، −٧، ٢ و −٩، −٧، −٩ و −٨، ٥، −٤).

٠٢:٥٦

‏نسخة الفيديو النصية

أوجد المصفوفة الملحَقة للمصفوفة: أ تساوي اتنين سالب سبعة اتنين، سالب تسعة سالب سبعة سالب تسعة، سالب تمنية خمسة وسالب أربعة.

طيب علشان نجيب المصفوفة الملحَقة، هنيجي عند كل عنصر ونحذف الصف والعمود اللي فيهم العنصر ده. ونحسب المحدِّد اللي هيظهر من العناصر المتبقية. وقيمة المحدّد ده هنحطّه في المصفوفة الملحَقة. مع الأخذ في الاعتبار إن العناصر اللي محطوط تحتيها خط قدامنا، بعد ما نحسب قيمة المحدّد، هنضربه في سالب واحد. وكمان مع الأخذ في الاعتبار تدوير المصفوفة. يعني مثلًا المحدّد اللي هيتحسب للعنصر سالب سبعة، اللي محطوط تحتيه خط في الصف الأول، هيتحطّ مكان سالب تسعة اللي هي في الصف التاني والعمود الأول. والعكس صحيح. وهكذا لبقية العناصر.

طيب لو بدأنا بالصف الأول والعمود الأول، هنحذف الصف الأول والعمود الأول. يتفضّل لنا سالب سبعة في سالب أربعة، اللي هي بتمنية وعشرين. ناقص سالب تسعة في خمسة، اللي هي سالب خمسة وأربعين. يبقى زائد خمسة وأربعين. بعد كده لو خدنا العنصر التاني في الصف الأول، فهنحذف الصف الأول والعمود التاني. فهيتفضّل لنا سالب تسعة في سالب أربعة، اللي هي ستة وتلاتين. ناقص سالب تسعة في سالب تمنية، اللي هي اتنين وسبعين. وما ننساش إننا هنضرب في سالب واحد.

لو أخدنا العنصر التالت في الصف الأول، فهنحذف الصف الأول والعمودي التالت. هيتفضّل لنا سالب تسعة في خمسة، اللي هي سالب خمسة وأربعين. ناقص سالب سبعة في سالب تمنية، اللي هي ستة وخمسين. وهكذا ممكن نكمّل بنفس الخطوات دي للصف التاني والصف التالت، علشان نكوّن العمود التاني والعمود التالت في المصفوفة الملحَقة. فلو عملنا كده، المصفوفة الملحَقة هتبقى زيّ ما ظاهرة قدامنا.

دلوقتي فاضل إننا نحسب الكميات دي. فلو حسبنا الكميات دي، المصفوفة الملحَقة هتبقى عبارة عن: تلاتة وسبعين، سالب تمنتاشر، سبعة وسبعين. ستة وتلاتين، تمنية، صفر. سالب مية وواحد، ستة وأربعين، وسالب سبعة وسبعين. ويبقى كده إحنا جِبنا المصفوفة الملحَقة للمصفوفة المعطاة في السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.