فيديو: التعرُّف على المضلعات من بين أشكال ثنائية الأبعاد

سوزان فائق

يوضح الفيديو مفهوم الأشكال الثنائية الأبعاد، والأشكال المستوية، والمضلعات، وكيفية التعرف عليها من بين أشكال ثنائية الأبعاد.

٠٧:٠١

‏نسخة الفيديو النصية

في الفيديو ده هنتكلّم عن التعرُّف على المضلّعات، من بين أشكال ثُنائية الأبعاد. هنعرف إيه هو مفهوم الشكل المستوي، والمضلّع. وإزّاي نعرف المضلّعات، من بين الأشكال الثُّنائية الأبعاد. أول حاجة الشكل المستوي هو شكل ثنائي الأبعاد، له طول وعرض. يعني الشكل اللي قدامنا ده، شكل ثنائي الأبعاد؛ لأن له طول وعرض.

عرفنا إيه هو الشكل المستوي، هنعرف يعني إيه مضلّع. المضلّع هو شكل مستوي مغلق، مكوّن من ثلاث زوايا أو أكتر، وثلاث قطع مستقيمة أو أكتر. يعني إيه زوايا؟ ويعني إيه قطع مستقيمة أو أكتر؟ الشكل اللي قدامنا ده مضلّع. يعني إيه؟ أول حاجة هو مستوي، ومغلق، ومكوّن من ثلاث زوايا.

الخط ده مع الخط ده، عاملين رُكن هنا كده. الخط ده مع الخط ده، عاملين رُكن تاني هنا. الخط ده مع الخط ده، عاملين رُكن تالت هنا. دي بنقول عليها زاوية. والخطوط اللي اتقاطعت دي، وعملت الزوايا، بنسميها قِطَع مستقيمة، اللي هي أضلاع. يبقى الشكل اللي قدامنا ده، بيحتوي على ثلاث قطع مستقيمة، وثلاث زوايا.

والشكل اللي بيحتوي على ثلاث أضلاع وثلاث زوايا، بنسميه مثلث. لمّا بيزيد عدد الأضلاع، بتزيد عدد الزوايا. وبنسمي كل شكل على حسب عدد أضلاعه، وزواياه. الشكلين اللي قدامنا دول، كل واحد فيهم بيحتوي على أربع أضلاع، وأربع زوايا. فبنسميه شكل رُباعي. يبقى الشكل الرباعي بيحتوي أربع أضلاع، وأربع زوايا.

الشكل اللي قدامنا ده، بيحتوي على … واحد، اتنين، تلاتة، أربعة، خمسة؛ خمس أضلاع، وخمس زوايا. بنسميه شكل خُماسي، اللي بيحتوي على خمس أضلاع، وخمس زوايا. الشكل اللي قدامنا، بيحتوي على … واحد، اتنين، تلاتة، أربعة، خمسة، ستة؛ ست أضلاع، وست زوايا. بنقول عليه شكل سُداسي. ويحتوي على ست أضلاع، وست زوايا.

الشكل الأخير اللي هنتكلّم عنه، بيحتوي على … واحد، اتنين، تلاتة، أربعة، خمسة، ستة، سبعة، تمنية؛ تمن أضلاع. وبيحتوي على تمن زوايا. فبنقول عليه شكل ثُماني. كده عرفنا المثلث، والشكل الرباعي، والشكل الخماسي، والشكل السداسي، والشكل الثماني.

الأشكال اللي قدامنا دي، ليست مضلّعات. الأشكال اللي قدامنا دي … الأولاني ده ليس مضلّع؛ لأنه لا يوجد به قطعة مستقيمة. وبالتالي لا يوجد أضلاع. وده كمان زيّه. وده كمان زيّه. وده كمان. ده في قطعتين مستقيمتين بس، والباقي منحنى. يبقى ليس مضلّع. الشكل ده ليس مغلق. وده كمان ليس مغلق. يبقى مش مضلّعات. لأن زيّ ما قلنا، المضلّع هو شكل مستوي مغلق، يحتوي على زوايا وقطع مستقيمة. والقطع المستقيمة مش أقل من تلاتة.

في الأشكال اللي قدامنا دي، ما فيش غير رقم أ بس، هو اللي مضلّع. ده منحنى، وما فيهوش قطع مستقيمة. دي قطعة مستقيمة، لكن عددها واحد بس، لا تكوّن مضلّع. هي، ودي، ودي. يبقى رقم أ بس، هي اللي مضلّع.

حدّد أسماء المضلّعات في الأشكال الآتية. أول واحد ده عدده: واحد، اتنين، تلاتة، أربعة، خمسة، ستة؛ ست أضلاع، وست وزوايا. يبقى اسمه شكل سُداسي. الشكل اللي بعده فيه أربع أضلاع، وأربع زوايا. يبقى شكل رُباعي. اللي بعده فيه واحد، اتنين، تلاتة، أربعة، خمسة؛ خمس أضلاع، وخمس زوايا. يبقى شكل خُماسي. الشكل اللي بعده فيه تلات أضلاع، بنقول عليه مثلث.

في صورة المهرج اللي قدامنا دي، عايزين نعرف إيه عدد المضلّعات. هنعدّهم: واحد، اتنين، تلاتة، أربعة، خمسة. ستة، سبعة، تمنية، تسعة، عشرة، حداشر. اتناشر، تلتاشر، أربعتاشر، خمستاشر، ستاشر، سبعتاشر. تمنتاشر، تسعتاشر، عشرين، واحد وعشرين. والباقي دواير، دي ما بتبقاش مضلّعات. طيب كم مضلّعًا به ستة أضلاع؟ هندوّر على المضلّع اللي فيه ستة أضلاع. هنلاقي واحد هنا، وكمان واحد أهو. يبقى هم مضلّعين فقط.

اتكلمنا في الفيديو ده عن التعرُّف على المضلّعات، من بين أشكال ثُنائية الأبعاد. وعرفنا يعني إيه شكل مستوي. اللي هو بيبقى الشكل ثُنائي الأبعاد. وعرفنا منه المضلّع. اللي بيبقى شكل مستوي مغلق، مكوّن من تلات زوايا أو أكتر، وثلاث قطع مستقيمة أو أكتر. وعرفنا إن الشكل اللي بيحتوي على التلات أضلاع، والتلات زوايا؛ اسمه مثلث. أربع أضلاع، وأربع زوايا؛ اسمه شكل رُباعي. خمس أضلاع، وخمس زوايا؛ اسمه شكل خُماسي. والست أضلاع، وست الزوايا؛ اسمه شكل سُداسي. والتمن أضلاع، وتمن زوايا؛ اسمه شكل ثُماني. وعرفنا إزّاي بنطلّعهم من الرسم.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.