فيديو: كتابة كسر في صورة نسبة مئوية

اكتب ٢/١ ٦ في صورة نسبة مئوية.

٠٢:٠٤

‏نسخة الفيديو النصية

اكتب ستة وواحد على اتنين في صورة نسبة مئوية.

يعني مُعطى عندنا العدد الكسري ستة وواحد على اتنين. والمطلوب إننا نكتبه في صورة نسبة مئوية. وخلينا نفتكر إن النسبة المئوية هي عبارة عن كسر مقامه مية. فمعنى كده إننا عايزين نكتب العدد الكسري ده في صورة كسر مقامه مية.

وأول حاجة هنعملها إننا هنحوّل العدد الكسري اللي عندنا إلى كسر. وبنعمل كده عن طريق إننا بنضرب المقام في العدد الصحيح. وبعد كده بنجمع حاصل ضربهم على البسط. فلمّا نضرب المقام اتنين في العدد الصحيح ستة، هتبقى بتساوي اتناشر. واتناشر زائد واحد بتساوي تلتاشر. فهنكتب تلتاشر في البسط. وأما المقام فهيفضل نفس المقام اتنين. فبالتالي هيبقى العدد الكسري ستة وواحد على اتنين، بيساوي الكسر تلتاشر على اتنين.

بعد كده علشان نكتب الكسر ده في صورة نسبة مئوية، يبقى عايزين نكتب كسر مكافئ للكسر تلتاشر على اتنين، ويكون مقامه مية. فهنلاحظ إن اتنين اللي في المقام عندنا علشان تبقى مية يبقى عايزين نضربها في خمسين. وبنفس الطريقة زي ما ضربنا المقام في خمسين، يبقى هنضرب البسط في خمسين. فهنضرب في الأول تلتاشر في خمسين وهنكتبها في البسط. فلمّا نحسبها هتبقى بتساوي ستمية وخمسين. وأما في المقام فلمّا نضرب اتنين في خمسين هتبقى بتساوي مية.

فبكده يبقى إحنا قدرنا نكتب كسر مكافئ والكسر ده مقامه مية. بعد كده نقدر نكتب ستمية وخمسين على مية في صورة نسبة مئوية، واللي هتبقى بتساوي ستمية وخمسين في المية. لأن الشكل ده اللي هو الكسر ستمية وخمسين على مية، هو هو نفس الشكل ده اللي هو ستمية وخمسين في المية واللي هي نسبة مئوية. وبالتالي هتبقى إجابة السؤال هي ستمية وخمسين في المية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.