فيديو: كتابة معادلات من متغير واحد وحلها

إذا كان ق⦣١ = ١٢٠°‎، ق⦣٢ = (ﺱ + ٣٤)°‎، فأوجد قيمة ﺱ.

٠١:٤٨

‏نسخة الفيديو النصية

إذا كان قياس الزاوية واحد يساوي مية وعشرين درجة، وقياس الزاوية اتنين يساوي س زائد أربعة وتلاتين درجة، فاوجد قيمة س. ومعطى عندنا الشكل اللي قدامنا ده، وعندنا هنا الزاوية واحد، وهنا زاوية اتنين. فمن الشكل هنلاحظ إن الزاوية واحد والزاوية اتنين بيشكّلوا زاوية مستقيمة. والزاوية المستقيمة هي الزاوية اللي قياسها مية وتمانين درجة؛ فبالتالي هيبقى الزاوية واحد والزاوية اتنين زوايتين متكاملتين. والزوايا المتكاملة هي الزاويا اللي مجموع قياسهم مية وتمانين درجة، فمعنى كده إن قياس الزاوية واحد زائد قياس الزاوية اتنين هيبقى بيساوي مية وتمانين درجة.

ومعطى عندنا في السؤال إن قياس الزاوية واحد مية وعشرين درجة، وقياس الزاوية اتنين س زائد أربعة وتلاتين درجة؛ فهنعوّض عن قياس الزاوية واحد بمية وعشرين، وهنعوّض عن قياس الزاوية اتنين بـ س زائد أربعة وتلاتين؛ فبالتالي هيبقى مية وعشرين زائد س زائد أربعة وتلاتين يساوي مية وتمانين.

والمطلوب في السؤال إننا نوجد قيمة س، فأول حاجة هنعملها إننا هنجمع الحدود المتشابهة، فهيبقى عندنا الطرف الأيمن للمعادلة هنجمع مية وعشرين زائد أربعة وتلاتين، واللي هتساوي مية أربعة وخمسين؛ فبالتالي هتبقى المعادلة هي س زائد مية أربعة وخمسين بتساوي مية وتمانين. بعد كده عشان نوجد قيمة س، يبقى هنطرح مية أربعة وخمسين من طرفَي المعادلة؛ فهيبقى الطرف الأيمن للمعادلة س زائد مية أربعة وخمسين ناقص مية أربعة وخمسين، فهيبقى مية أربعة وخمسين ناقص مية أربعة وخمسين بتساوي صفر، فيبقى الطرف الأيمن هو س؛ وأمّا الطرف الأيسر للمعادلة فهيبقى مية وتمانين ناقص مية أربعة وخمسين، فلمّا نحسبها هتبقى بتساوي ستة وعشرين؛ وبالتالي هتبقى قيمة س هي ستة وعشرين، وهو ده المطلوب في السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.