فيديو: ضرب الأعداد المكونة من رقمين

يوضِّح الفيديو كيفية إيجاد حاصل ضرب عدد مكون من رقمين في عدد آخر مكون من رقم واحد، باستخدام النماذج أو باستخدام حواصل الضرب الجزئية وطرق أخرى، وأمثلةً.

٠٧:٣٤

‏نسخة الفيديو النصية

ضرب الأعداد المكوّنة من رقمين.

هنتعلّم في الدرس ده إزّاي نضرب عدد مكوّن من رقمين في عدد مكوّن من رقم واحد. أول طريقة هنستخدمها عشان نقدر نجيب حاصل الضرب هو باستخدام النماذج.

يعني لو عندنا مثلًا محتاجين نجيب حاصل ضرب أربعة في تلتاشر. نفتكر إن الضرب ما هو إلا عملية جمع متكرّر؛ يعني كأننا بنجمع أربع مجموعات من التلتاشر. هنمثّل الكلام ده بالنماذج.

الخطوة اللي بعد كده إن إحنا هنعمل دمج وإعادة تجميع؛ يعني هنجمّع العشرات مع بعض، والآحاد مع بعض. فهيبقى عندنا دلوقتي أربع مجموعات من عشرة، وأربع مجموعات من تلاتة. جمّعنا العشرات مع العشرات؛ فبقى عندنا أربع مجموعات كل واحدة منها عشرة. وعندنا أربع مجموعات فيها كل واحدة فيها تلاتة.

لو جينا نشوف مجموعة الآحاد دي، اللي هي أربع مجموعات من تلاتة، هنلاقيها عبارة عن اتناشر في الآحاد. اتناشر في الآحاد دي ممكن نرسمها باستخدام النماذج بالشكل ده. يعني واحد في العشرات، واتنين في الآحاد. دلوقتي هنجمّع حواصل الضرب الجزئية؛ هنجمّع العشرات مع العشرات، والآحاد مع الآحاد.

دلوقتي عندنا خمس عشرات يعني خمسين، وعندنا اتنين في الآحاد. يبقى دلوقتي نجمع اتنين زائد خمسين، هيبقى عندنا النتيجة: اتنين وخمسين. يبقى نقدر نقول إن أربعة في تلتاشر هتساوي اتنين وخمسين. وبكده يبقى استخدمنا طريقة النماذج للحصول على حاصل الضرب. في صفحة جديدة هنشوف طرق أخرى.

لو مطلوب منّنا نعرف حاصل ضرب ستة في تمنية وتلاتين. أول حاجة هنعملها هنستخدم التقدير عن طريق التقريب. هنشوف العدد الأكبر اللي عندنا، اللي هو التمنية وتلاتين، نشوف أكبر قيمة مكانية فيه، اللي هي العشرات، ونقرّبه لأقرب عشرة. فيبقى ستة في أربعين؛ ستة في أربعين هتبقى بتساوي ميتين وأربعين. دي كده التقدير لحاصل الضرب.

هنستخدم أكتر من طريقة عشان نجيب حاصل الضرب الدقيق. نقدر نكتب ستة في تمنية وتلاتين بالشكل ده: ستة في، تمنية زائد تلاتين. وبعدين نستخدم خاصية التوزيع؛ هتبقى بتساوي ستة في تمنية، زائد ستة في تلاتين. ستة في تمنية بتمنية وأربعين، زائد … تلاتين في ستة؛ تلاتة في ستة بتمنتاشر، ونحطّ الصفر على يمين النتيجة؛ يبقى مية وتمانين.

نجمّع دلوقتي؛ هيبقى مية وتمانين زائد تمنية وأربعين. تمنية زائد صفر تمنية، نبتدي من الآحاد، وبعدين أربعة زائد تمنية هيبقى اتناشر. اتنين، وعندنا واحد هنضيفه على الواحد اللي في المئات؛ هتبقى اتنين. يبقى النتيجة: ميتين تمنية وعشرين.

الطريقة التانية اللي ممكن نستخدمها هي: الضرب باستخدام حواصل الضرب الجزئية. يعني هنبدأ نضرب ستة في تمنية، يعني نبدأ من الآحاد، ستة في تمنية هتدّينا تمنية وأربعين. العملية اللي بعد كده هنبتدي نضرب ستة في … التلاتة اللي عندنا في العشرات دي هي تُعتبر تلاتين، فهنضرب ستة في تلاتين؛ اللي هي هتدّينا مية وتمانين.

دلوقتي هنبدأ نجمع حواصل الضرب اللي حصلنا عليها الجزئية دي. تمنية زائد صفر بتمنية، تمنية زائد أربعة هيبقى بيساوي اتناشر؛ اتنين، وبعدين معانا واحد، واحد زائد واحد هيساوي اتنين. يبقى النتيجة: ميتين تمنية وعشرين.

الطريقة اللي استخدمناها هتوضح أكتر من خلال الرسم اللي قدّامنا ده. إحنا دلوقتي عايزين نجيب حاصل ضرب ستة في تمنية وتلاتين. هنكتب الستة على اليمين، وهنكتب تمنية وتلاتين على شكل تمنية زائد تلاتين؛ يعني الآحاد زائد العشرات.

هنبدأ نضرب الآحاد في الآحاد؛ ستة في تمنية هيدّينا تمنية وأربعين، ونحطّها في المستطيل بتاع الآحاد. وبعدين نضرب ستة في تلاتين، يعني نضرب في العشرات؛ هتدّينا مية وتمانين. دلوقتي هنجمّع حواصل الضرب الجزئية، يعني تمنية وأربعين زائد مية وتمانين؛ هتدّينا: ميتين تمنية وعشرين.

هنستخدم دلوقتي في آخِر طريقة عندنا الورقة والقلم؛ إن إحنا نجري عملية الضرب. هنبتدي نضرب ستة في تمنية؛ ستة في تمنية هتدّينا تمنية وأربعين. التمنية وأربعين دي عبارة عن تمنية في الآحاد، وأربعة في العشرات. هنكتب الآحاد بتاع النتيجة دي يبقى تمنية، والعشرات هنكتبها فوق خانة العشرات.

نبتدي نعمل عملية الضرب اللي بعد كده. هنضرب ستة في تلاتة؛ ستة في تلاتة هتدّينا تمنتاشر. كان عندنا أربعة، كنا مرحّلينها من عملية الضرب اللي فاتت، هنجمعها على التمنتاشر اللي لسّه حاسبينها دلوقتي. هيبقى تمنتاشر زائد أربعة؛ هتبقى بتساوي اتنين وعشرين.

عايزين نتأكّد من معقولية الإجابات اللي حصلنا عليها. دلوقتي التلات طرق اللي استخدمناهم طلّعوا لنا نفس النتيجة، اللي هي: ميتين تمنية وعشرين.

أول طريقة كنا مستخدمينها كنا بنجيب فيها عن طريق التقدير حاصل الضرب، اللي هي طلّعت لنا ميتين وأربعين، ده نتيجة تقديرية لحاصل الضرب. عايزين نقارنها بالنتائج اللي حصلنا عليها باستخدام عمليات الضرب الدقيق. النتائج اللي حصلنا عليها كلها كانت: ميتين تمنية وعشرين. ميتين تمنية وعشرين هو عدد قريب من الميتين وأربعين، وبكده اتأكّدنا من معقولية الإجابة اللي حصلنا عليها.

اتعلّمنا في الدرس ده إزّاي نضرب عدد مكوّن من رقمين في عدد مكوّن من رقم واحد. واتعلّمنا أكتر من طريقة نقدر نوصل بيها لحاصل الضرب المطلوب.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.