فيديو: حل المسائل الكلامية التي تتضمَّن النسب المئوية

العام الماضي، الْتحق ٣٣٦ طالبًا بإحدى المدارس. هذا العام، الْتحق ٤٣٠ طالبًا بالمدرسة نفسها. أوجد نسبة التغيُّر في عدد الطلاب، لأقرب نسبة مئوية صحيحة. ثم حدّد هل التغيُّر في النسبة بالزيادة أم بالنقصان.

٠٣:١٤

‏نسخة الفيديو النصية

العام الماضي الْتحق تلتمية ستة وتلاتين طالبًا بإحدى المدارس. هذا العام الْتحق ربعمية وتلاتين طالبًا بالمدرسة نفسها. أوجد نسبة التغيُّر في عدد الطلاب، لأقرب نسبة مئوية صحيحة. ثم حدّد هل التغيُّر في النسبة بالزيادة أم بالنقصان.

يعني معطى عندنا عدد الطلاب في إحدى المدارس، السنة اللي فاتت، تلتمية ستة وتلاتين. والسنة دي نفس المدرسة الْتحق فيها ربعمية وتلاتين طالب. والمطلوب إننا نوجد نسبة التغيُّر في عدد الطلاب. ومطلوب برضو إننا نحدّد هل التغيُّر في النسبة بالزيادة أم بالنقصان.

وخلينا في الأول نفتكر إننا عشان نوجد نسبة التغيُّر في عدد الطلاب، لازم الأول نعرف إيه هو مقدار التغيُّر. ومقدار التغيُّر هو الفرق بين العدد الجديد، والعدد الأصلي. فالعدد الأصلي هو عدد الطلاب العام الماضي في المدرسة، واللي كان تلتمية ستة وتلاتين. بعد كده العام اللي بعده، زاد عدد الطلاب علشان يبقوا ربعمية وتلاتين، في نفس المدرسة. فمعنى كده إن التغيُّر اللي حصل هو زيادة؛ لأن العدد الجديد اللي هو ربعمية وتلاتين، أكبر من العدد الأصلي اللي هو كان تلتمية ستة وتلاتين في العام الماضي. فمعنى كده إن مقدار التغيُّر هيبقى بيساوي ربعمية وتلاتين ناقص تلتمية ستة وتلاتين. فلمّا نحسبها هتبقى بتساوي أربعة وتسعين.

بعد كده عشان نوجد نسبة التغيُّر، فخلينا في الأول نفتكر إن النسبة المئوية للتغير بتساوي مقدار التغيُّر، على الكمية الأصلية أو العدد الأصلي. يعني هيساوي أربعة وتسعين، اللي هو مقدار التغيُّر؛ على تلتمية ستة وتلاتين، اللي هو العدد الأصلي للطلاب اللي الْتحقوا في المدرسة العام الماضي. والمطلوب في السؤال إننا نوجد نسبة التغيُّر في عدد الطلاب لأقرب نسبة مئوية صحيحة.

فعشان نوجد النسبة المئوية، يبقى هنضرب الناتج في مية. بعد كده هنستخدم الآلة الحاسبة، وهنحسب أربعة وتسعين على تلتمية ستة وتلاتين. وهنضرب الناتج في مية. فهيبقى بيساوي سبعة وعشرين وسبعة وتسعين من مية. وبما إننا بنحسب نسبة مئوية، فهيبقى نحطّ علامة النسبة المئوية.

لكن بما إن مطلوب مننا في السؤال نوجد النسبة لأقرب نسبة مئوية صحيحة. فبالتالي لمّا نقرب سبعة وعشرين وسبعة وتسعين من مية لأقرب نسبة مئوية صحيحة، هتبقى تقريبًا بتساوي تمنية وعشرين في المية.

وآخر جزء عندنا في السؤال كان مطلوب إننا نحدّد هل التغيير في النسبة بالزيادة أم بالنقصان. وزيّ ما شرحنا، إن العدد زاد من تلتمية ستة وتلاتين وبقى ربعمية وتلاتين. فبالتالي التغيُّر ده زيادة. وبكده يبقى جاوبنا على جميع مطاليب السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.