فيديو: امتحان الديناميكا للعام السابق • ٢٠١٨/٢٠١٧ • السؤال الثاني

امتحان الديناميكا للعام السابق • ٢٠١٨/٢٠١٧ • السؤال الثاني

٠٣:٤٦

‏نسخة الفيديو النصية

أثّرت قوة ثابتة مقدارها مية وخمسين نيوتن على جسم كتلته اتنين كيلوجرام لفترة زمنية مقدارها واحد على عشرة ثانية. فغيَّرت سرعته من ع واحد اللي ع اتنين. اوجد قيمة ع اتنين بالكيلومتر لكل ساعة، إذا كانت ع واحد بتساوي خمسة وأربعين كيلومتر عَ الساعة.

معطى ع واحد اللي بتعتبر السرعة الابتدائية للجسم. ومُعطى الزمن اللي أثّرت فيه القوة على الجسم. وبالتالي عشان نقدر نوجد ع اتنين اللي هي السرعة النهائية للجسم، نقدر نستخدم إن السرعة النهائية هتساوي السرعة الابتدائية زائد العجلة مضروبة في الزمن. السرعة النهائية هتكون هي ع اتنين، والسرعة الابتدائية هتكون ع واحد. وبالتالي ع اتنين هتساوي ع واحد زائد ج في ن. محتاجين نوجد ع اتنين. ومُعطى عندنا ع واحد، ومُعطى عندنا الزمن ن. فهنلاحظ إننا محتاجين نوجد أيضًا العجلة اللي بيتحرّك بها الجسم. معطى إن القوة اللي أثّرت على الجسم مقدارها مية وخمسين نيوتن، وإن كتلة الجسم كانت بتساوي اتنين كيلوجرام. فبالنسبة لمعادلة حركة الجسم باستخدام قانون نيوتن التاني، هيكون عندنا الكتلة مضروبة في العجلة، هتساوي القوة اللي بتأثّر على الجسم. هنعوّض عن الكتلة باتنين كيلوجرام، مضروبة في … العجلة اللي محتاجين نوجدها، هتساوي … القوة اللي بتأثر على الجسم هي مية وخمسين نيوتن. هنقسم الطرفين على اتنين فهيكون عندنا العجلة اللي بيتحرك بيها الجسم بتساوي مية وخمسين على اتنين؛ يعني هتساوي خمسة وسبعين متر عَ الثانية تربيع. يبقى كده قدرنا نوجد العجلة اللي بيتحرك بيها الجسم.

هنلاحظ إن عجلة الجسم وحدتها متر عَ الثانية تربيع. وإن الزمن وحداته ثانية. وبالتالي محتاجين نغير وحدات السرعة إلى متر عَ الثانية. بما إن معطى السرعة ع واحد، فَـ ع واحد بتساوي خمسة وأربعين كيلومتر على الساعة عشان نقدر نحوّلها إلى متر عَ الثانية، فهيكون عندنا خمسة وأربعين مضروبة في … كيلومتر عشان نقدر نحوّلها لمتر فهنضرب في ألف. وساعة عشان نقدر نحوّلها لثانية فهيكون عندنا ستين في ستين. يعني خمسة وأربعين في ألف على ستين في ستين … ألف على ستين في ستين ممكن نكتبها في صورة خمسة على تمنتاشر. وبالتالي ع واحد هتساوي خمسة وأربعين في خمسة على تمنتاشر؛ يعني هتساوي اتناشر وخمسة من عشرة متر على الثانية. وبكده نقدر نوجد السرعة ع اتنين.

فالسرعة ع اتنين هتساوي … ع واحد اللي هي السرعة الابتدائية، بتساوي اتناشر وخمسة من عشرة متر عَ الثانية، زائد … العجلة اللي بتتحرك بيها الجسم بتساوي خمسة وسبعين متر عَ الثانية تربيع، في … الزمن اللي بتأثر فيه القوة على الجسم اللي هو هيكون واحد على عشرة ثانية. فَـ ع اتنين هتساوي عشرين متر عَ الثانية. يبقى كده نكون قدرنا نوجد ع اتنين اللي هي السرعة النهائية للجسم، وكانت بتساوي عشرين متر عَ الثانية.

هنلاحظ إن المطلوب نوجد قيمة ع اتنين بالكيلو متر لكل ساعة؛ يعني عشان نحوّل ع اتنين من متر على ثانية إلى كيلومتر عَ الساعة، فهتكون بتساوي عشرين مضروبة في … عشان نحوّل من متر إلى كيلومتر، محتاجين نقسم على ألف. وعشان نحوّل من ثانية إلى ساعة، محتاجين نقسم على ستين في ستين، فهيكون عندنا عشرين في ستين في ستين، الكل مقسوم على ألف. ستين في ستين الكل مقسوم على ألف، ممكن نكتبها في صورة تمنتاشر على خمسة. يعني هيكون عندنا ع اتنين بتساوي عشرين في تمنتاشر على خمسة؛ يعني ع اتنين هتساوي اتنين وسبعين كيلومتر على الساعة. ويبقى كده قدرنا نوجد ع اتنين بالكيلومتر لكل ساعة، وكانت بتساوي اتنين وسبعين كيلومتر عَ الساعة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.