فيديو: امتحان الفزياء للعام السابق • ٢٠١٨/٢٠١٧ • السؤال الثامن والعشرون أ

امتحان الفزياء للعام السابق • ٢٠١٨/٢٠١٧ • السؤال الثامن والعشرون أ

٠٢:١٨

‏نسخة الفيديو النصية

ثلاث مقاومات مقدار كلٍّ منها 𝑅، متصلة بطرق مختلفة، كما هو موضَّح بالأشكال واحد لأربعة. في أيّ الأشكال تكون قيمة المقاومة بين 𝑋 وَ 𝑌 أقل ما يمكن؟

فإحنا هنجيب قيمة المقاومة المكافئة بين 𝑋 وَ 𝑌 للأربع أشكال. فأول شكل هو عبارة عن مقاومة 𝑅 متوصّلة بالنقطة 𝑋. وبعدين متوصّلة بمقاومتين متوصّلين على التوازي. والمقاومتين دول في الآخر متوصّلين بالنقطة 𝑌. أمّا الشكل التاني، ففيه تفريعة عند النقطة 𝑋. وفرع فيه مقاومتين كل واحدة قيمتها 𝑅. والفرع التاني فيه مقاومة واحدة قيمتها 𝑅. فالفرع اللي فيه المقاومتين 𝑅 اللي متوصّلين على التوالي، هنجيب المقاومة المكافئة ليهم، واللي هتبقى اتنين 𝑅. أمّا الشكل التالت، فهو عبارة عن مقاومة متوصّلة بين الفرعين 𝑋 وَ 𝑌. ومقاومتين متوصّلين بدايرة مفتوحة. وأخيرًا الشكل الرابع هو عبارة عن تلات مقاومات متوصّلين على التوالي. يعني المقاومة المكافئة بتاعتهم بتلاتة 𝑅.

فكده بقى معانا الشكل المبسّط للأربع دواير. وهنبدأ نجيب المقاومة المكافئة لكل دايرة منها. فأول شكل هو عبارة عن مقاومتين متوصّلين على التوازي. والمكافئ بتاعهم هيبقى متوصّل على التوالي مع مقاومة 𝑅. يعني المقاومة بين 𝑋 وَ 𝑌 هي 𝑅 زائد؛ 𝑅 في 𝑅، على اتنين 𝑅. اللي هي ممكن مكافئ مقاومتين متوصّلين على التوازي، وبيساووا بعض. هنقدر نختصر 𝑅 من البسط مع 𝑅 في المقام. ويبقى كده المقاومة بين 𝑋 وَ 𝑌 في الشكل الأول، تلاتة على اتنين 𝑅.

أمّا الشكل التاني، فهو عبارة عن المقاومة 𝑅 ومقاومة اتنين 𝑅، متوصّلين على التوازي. فالمكافئ بتاعهم هيبقى 𝑅 في اتنين 𝑅، على 𝑅 زائد اتنين 𝑅. يعني اتنين 𝑅 تربيع على تلاتة 𝑅. ونقدر نختصر التربيع مع 𝑅 اللي في المقام، ونطلّع إن 𝑅 𝑋 𝑌 اتنين على تلاتة 𝑅.

أمّا الشكل التالت، فهو عبارة عن مقاومتين متوصّلين بدايرة مفتوحة. وده معناه إن إحنا ممكن نعتبرهم مش موجودين أصلًا. وهيبقى فاضل مقاومة واحدة، اللي هي 𝑅 ما بين 𝑋 وَ 𝑌. وده معناه إن المقاومة ما بين 𝑋 وَ 𝑌 بتساوي 𝑅. وأخيرًا الشكل الرابع، فالمقاومة ما بين 𝑋 وَ 𝑌 بتساوي تلاتة 𝑅. فكده ممكن نستنتج إن أقل مقاومة في الأربع أشكال، هي الشكل اتنين. وكده نبقى طلّعنا أقل قيمة مقاومة مكافئة ما بين النقطتين 𝑋 وَ 𝑌.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.