فيديو: امتحان الفزياء الدور الثاني للعام السابق • ٢٠١٨/٢٠١٧ • السؤال الحادي والعشرون ب

امتحان الفزياء الدور الثاني للعام السابق • ٢٠١٨/٢٠١٧ • السؤال الحادي والعشرون ب

٠٢:٠٧

‏نسخة الفيديو النصية

ما قراءة الفولتميتر في الدائرة الكهربية الموضَّحة إذا كانت قراءة الأميتر واحد أمبير؟ والدايرة الكهربية فيها بطارية قوتها الدافعة الكهربية عشرة فولت. ومقاومتها الداخلية واحد أوم. متوصَّلة على التوالي مع أميتر ومقاومة تلاتة أوم ومقاومة مجهولة 𝑅. وفيه فولتميتر بيقيس فرق الجهد اللي على المقاومة 𝑅.

ومطلوب نعرف قراءة الفولتميتر بكام. وده باعتبار إن قراءة الأميتر، يعني التيار اللي ماشي في الأميتر، كان بيساوي واحد أمبير. وبما إن مقاومة الأميتر بتبقى صغيَّرة جدًّا، فممكن نعتبره سلك مقاومته بتساوي صفر. ومقاومة الفولتميتر بتبقى كبيرة جدًّا لدرجة إن التيار اللي ماشي فيه بيبقى صغيَّر أوي. فبنهمل التيار اللي ماشي فيه، وبنعتبر الفولتميتر دايرة مفتوحة. فده معناه إن التيار الواحد أمبير هيمشي في التلاتة أوم، وهيمشي في المقاومة 𝑅.

فعلشان نجيب فرق الجهد اللي على مقاومة، هنستخدم قانون أوم. اللي بيقول: إن فرق الجهد اللي على المقاومة بيساوي التيار اللي ماشي فيها في قيمة المقاومة. ففي المسألة معطى التيار 𝐼، وفاضل إن إحنا نعرف المقاومة 𝑅؛ علشان نحسب قراءة الفولتميتر. فنقدر نجيب المقاومة 𝑅 عن طريق إننا نستخدم قانون أوم برضو، ولكن على الدايرة كلها. فهنلاقي إن القوة الدافعة الكهربية للبطارية بتساوي شدَّة التيار الكلِّي اللي ماشي في الدايرة، مضروب في المقاومة المكافئة للدايرة. واللي عبارة عن مجموع المقاومة المجهولة والمقاومة الداخلية للبطارية والمقاومة التلاتة أوم. وده لأن التلات مقاومات متوصَّلين على التوالي.

ولمَّا نعوَّض بالقيم المعطاة، هنلاقي إن عشرة فولت بتساوي واحد أمبير في، 𝑅 زائد واحد أوم زائد تلاتة أوم. فكده المجهول الوحيد في المسألة هو 𝑅. ونقدر نجيبه عن طريق إننا نقسم طرفين المعادلة على واحد أمبير. وبعدين نطرح من طرفين المعادلة أربعة أوم. وده هيطلَّع إن 𝑅 بتساوي ستة أوم.

وعلشان نجيب قراءة الفولتميتر، هنطبَّق قانون أوم برضو. ولكن على المقاومة 𝑅 بس. فهنلاقي إن فرق الجهد اللي على المقاومة بيساوي واحد أمبير. اللي هو التيار اللي ماشي في المقاومة في قيمتها اللي بتساوي ستة أوم. يعني قراءة الفولتميتر بتساوي ستة فولت.

وبكده يبقى عرفنا نطلَّع قراءة الفولتميتر على المقاومة المجهولة 𝑅.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.