تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: استخدام ترتيب العمليات لإيجاد قيمة التعبيرات البسيطة

معاذ صالح

يوضح الفيديو ترتيب إجراء العمليات المختلفة، بإجراء العمليات داخل الأقواس في البداية، ثم عمليات الضرب والقسمة بالترتيب من اليمين إلى اليسار، ثم عمليات الجمع والطرح بالترتيب من اليمين إلى اليسار، وأهمية ذلك لإيجاد قيمة واحدة لكل تعبير، وتطبيق ترتيب العمليات على جداول الدوال.

٠٦:٤١

‏نسخة الفيديو النصية

استخدام ترتيب العمليات لإيجاد قيمة التعبيرات البسيطة.

في الفيديو ده هنعرف إيه هو ترتيب إجراء العمليات المختلفة، وإزاي بنستخدم الترتيب ده عشان نوجد قيم التعبيرات المختلفة.

الجدول الظاهر يبيّن عدد السعرات الحرارية اللي بيحرقها الجسم في دقيقة واحدة، بعد ممارسة رياضة السباحة أو رياضة الجري. فمثلًا السباحة لمدة أربع دقايق هتخلّي الجسم يحرق اتناشر في أربعة سعرة حرارية. والجري لمدة تمن دقايق بتخلي الجسم يحرق عشرة في تمنية سعر حراري.

فلو حد مارس السباحة لمدة أربع دقايق، والجري لمدة تمن دقايق. فهتبقى السعرات الحرارية اللي هيحرقها الجسم في الحالة دي، بتساوي اتناشر في أربعة، زائد عشرة في تمنية.

هنلاحظ إن التعبير بيحتوي على تلات عمليات. عمليتين ضرب، وعملية جمع. فلو عاوزين نحسب السعرات الحرارية، هنبدأ بأي عملية عشان نوجد السعرات الحرارية بشكل صحيح؟

هنلاقي إننا لو بدأنا بعمليات الضرب، فهيبقى التعبير اتناشر في أربعة، زائد عشرة في تمنية، بيساوي … اتناشر في أربعة بيساوي تمنية وأربعين، زائد … عشرة في تمنية بيساوي تمانين. وتمنية وأربعين زائد تمانين بيساوي مية تمنية وعشرين.

بينما لو بدأنا بعملية الجمع، فالتعبير هيساوي … أول حاجة نبدأ بعملية جمع فيبقى أربعة زائد عشرة بيساوي أربعتاشر؛ فالتعبير هيبقى اتناشر في أربعتاشر في تمنية. واتناشر في أربعتاشر في تمنية بيساوي ألف تلتمية أربعة وأربعين.

مش من المنطقي إن يبقى نفس التعبير ليه أكتر من قيمة. فبالتالي بنستخدم ترتيب العمليات عشان نحدد القيمة الصحيحة للتعبير.

ترتيب إجراء العمليات هو؛ واحد: إجراء العمليات بين الأقواس. يعني إذا كان التعبير بيحتوي على عمليات داخل أقواس، بنجريها في البداية.

اتنين: إجراء عمليات الضرب والقسمة بالترتيب من اليمين إلى اليسار. يعني بعد إجراء العمليات اللي بين الأقواس، بنشوف إذا كان التعبير بيحتوي على عمليات ضرب أو قسمة. فبنجريها بالترتيب من اليمين إلى اليسار. يعني نحل عملية الضرب أو القسمة اللي موجودة في اليمين الأول، وصولًا إلى العمليات اللي في اليسار.

تلاتة: إجراء عمليات الجمع والطرح بالترتيب من اليمين إلى اليسار. يعني بعد ما نخلص إجراء عمليات الضرب والقسمة اللي موجودة في التعبير. بندور إذا كان التعبير بيحتوي على عمليات جمع أو طرح. فبنجريها برضو بالترتيب من اليمين إلى اليسار.

يبقى في الحالة دي التعبير اتناشر في أربعة، زائد عشرة في تمنية، هيساوي مية تمنية وعشرين سعر حراري.

يبيّن الجدول المجاور الزمن الذي يستغرقه نادر في الدراسة خلال أيام الأسبوع بالدقائق. أوجد المدة الكلية التي استغرقها خلال هذه الأيام.

من الجدول هنلاقي إن نادر استغرق ستين دقيقة في يومين من أيام الأسبوع. وأربعين دقيقة في تلات أيام. فبالتالي هتبقى المدة الكلية بتساوي ستين في اتنين، زائد أربعين في تلاتة.

هنلاحظ إن التعبير بيحتوي على عمليتين ضرب، وعملية جمع. وحسب ترتيب العمليات، هنجري عمليات الضرب بالترتيب من اليمين إلى اليسار في الأول. وبعد كده نجري عملية الجمع.

فالمدة الكلية هتساوي … نجري عملية الضرب الأولى، ستين في اتنين بتساوي مية وعشرين، زائد … نجري عملية الضرب التانية، أربعين في تلاتة بتساوي مية وعشرين. ومية وعشرين زائد مية وعشرين بتساوي ميتين وأربعين.

يبقى نادر بيستغرق ميتين وأربعين دقيقة في الدراسة خلال أيام الأسبوع.

يؤجّر محل الدراجة الهوائية مقابل عشرة جنيهات لكل ساعة، بالإضافة إلى خمسة عشر جنيهًا تضاف كرسم اشتراك على المبلغ الكلي. أوجد قاعدة الدالة، ثم اوجد باستخدام جدول الدالة تكلفة استئجار دراجة هوائية لمدة أربع ساعات، وخمس ساعات، وست ساعات.

بما إن سعر إيجار الدراجة لمدة ساعة واحدة هو عشرة جنيهات، وبنضيف للمبلغ الكلي خمستاشر جنيه. فلو رمزنا لعدد الساعات بالرمز س، هتبقى قاعدة الدالة هي: عشرة اللي هو سعر إيجار الدراجة لمدة ساعة واحدة، في س اللي هو عدد الساعات اللي هنأجر فيها الدراجة، زائد خمستاشر اللي هو رمز الاشتراك. يعني عشرة س زائد خمستاشر.

نرسم جدول الدالة بالشكل ده، ونكتب في عمود المدخلات اللي بيدلّ على عدد الساعات أربع ساعات، وخمس ساعات، وست ساعات.

نطبق قاعدة الدالة على القيمة المدخلة الأولى اللي هي أربعة. فهتبقى عشرة في أربعة زائد خمستاشر. يعني عوّضنا عن قيمة س بأربعة. بما إن التعبير بيحتوي على عمليتين؛ عملية ضرب، وعملية جمع. فهنبدأ بعملية الضرب الأول. فهيبقى عشرة في أربعة بيساوي أربعين، زائد خمستاشر بيساوي خمسة وخمسين.

ونكرر نفس العملية للخمس ساعات. فهيبقى عشرة في خمسة، زائد خمستاشر. فيبقى عشرة في خمسة بيساوي خمسين، زائد خمستاشر بيساوي خمسة وستين.

وستة ساعات. عشرة في ستة، زائد خمستاشر. فهتبقى القيمة المخرجة بعد إجراء العمليات هي خمسة وسبعين.

يبقى تكلفة إيجار الدراجة الهوائية لمدة أربع ساعات هي خمسة وخمسين جنيهًا. ولمدة خمس ساعات هي خمسة وستين جنيهًا. ولمدة ست ساعات هي خمسة وسبعين جنيهًا.

يبقى في الفيديو ده عرفنا إيه هو ترتيب إجراء العمليات المختلفة، وإنه مهم عشان يبقى كل تعبير له قيمة واحدة مش أكتر. وإزاي بنستخدم ترتيب العمليات عشان نوجد قيمة التعبيرات المختلفة بإننا نجري العمليات اللي داخل الأقواس في الأول، وبعد كده بنجري عمليات الضرب والقسمة بالترتيب من اليمين إلى اليسار. وبعد كده عمليات الجمع والطرح بالترتيب من اليمين إلى اليسار برضو. وطبقنا ترتيب العمليات على جدول الدوال.