فيديو: الضرب في ٧

يوضح الفيديو كيفية إيجاد حاصل الضرب في العدد ٧ باستخدام النماذج وطريقة الجمع المتكرر، وكيفية إيجاد عامل الضرب المجهول في جملة الضرب، مع أمثلة توضيحية.

٠٧:٣٣

‏نسخة الفيديو النصية

هنعرف في الفيديو ده إزاي نقدر نوجد حاصل الضرب في العدد سبعة.

فيه طرق كتيرة بنقدر نستخدمها لإيجاد حاصل الضرب. زي مثلًا استخدام النماذج. أو استخدام الجمع المتكرر. أو حتى بالرجوع لجدول الضرب اللي بنتعلم منه حقائق الضرب للعدد المطلوب.

لو عرفنا إن عندنا خمس سيارات، وكل سيارة منهم بتحتوي على سبع مقاعد. كم شخص يمكنهم ركوب السيارات الموجودة؟

دلوقتي إحنا عندنا خمس سيارات. وزي ما قلنا كل سيارة منهم فيها سبع مقاعد. طب إحنا عارفين إن كل مقعد هيتّسع لشخص. يبقى لو عايزين نعرف عدد الأشخاص اللي يمكنهم ركوب السيارات كلها، يبقى هنجيب حاصل ضرب خمسة في سبعة. يعني حاصل ضرب عدد السيارات في عدد المقاعد في كل سيارة.

طب دلوقتي هنقدر نوجد حاصل الضرب بأكتر من طريقة.

أول حاجة هنستخدم النماذج. هنستخدم قطع العَدّ. إحنا محتاجين نعبر عن عدد المقاعد في كل سيارة بسبع قطع عَدّ. يبقى هنستخدم صف واحد فيه سبع قطع عَدّ، اللي هيمثلوا عدد المقاعد في أول سيارة. وهكذا سبع قطع عَدّ تانيين اللي بيمثلوا مقاعد السيارة التانية. وكده بقى عندنا أربعتاشر قطعة عَدّ بيمثلوا عدد المقاعد اللي موجودة في السيارتين الأولانيين.

وهنكمل بنفس الطريقة. سبع قطع عَدّ يمثلوا عدد المقاعد في كل سيارة. دلوقتي السيارة التالتة. يبقى كده بقى عندنا تمنية وعشرين قطعة عَدّ بيمثلوا عدد مقاعد السيارات الأربعة. بعد كده هنستخدم سبع قطع عَدّ تانيين عشان نمثل عدد المقاعد اللي موجودين في السيارة الخامسة. فكده استخدمنا خمسة وتلاتين قطع عد، اللي بيمثلوا عدد المقاعد الموجودة في الخمس سيارات. فبالتالي الأشخاص اللي يمكنهم ركوب مجموعة السيارات الموجودة عندنا همّ خمسة وتلاتين شخص.

وبكده يبقى قدرنا نحصل على حاصل ضرب خمسة في سبعة، اللي هو هيبقى بيساوي خمسة وتلاتين. وقدرنا نوجده باستخدام النماذج. رتّبنا قطع العَدّ اللي عندنا على شكل خمس صفوف، كل صف منهم بيحتوي على سبع قطع عَدّ. وعدد قطع العد اللي عندنا كله اللي هو خمسة وتلاتين، هو ده هيمثل حاصل الضرب اللي حصلنا عليه.

ممكن نحصل على حاصل الضرب اللي إحنا جبناه دلوقتي باستخدام النماذج، بطريقة أخرى؛ باستخدام عملية الجمع المتكرر. يعني إحنا عندنا كل سيارة فيها سبع مقاعد. طب إحنا هنجمع سبع خمسة مرات؛ عشان إحنا عندنا سبع مقاعد في كل سيارة، وهمّ خمس سيارات.

وبعملية الجمع المتكرر دي هنحصل على ناتج جمع عبارة عن خمسة وتلاتين، اللي برضو بيمثّل حاصل ضرب خمسة في سبعة.

هنشوف دلوقتي في المثال اللي جاي، إزاي نقدر نوجد العامل المجهول في جملة الضرب.

لو عرفنا إن عندنا تمنية وعشرين كرة، موزعين بالتساوي على أربع صناديق. يا ترى عدد الكرات بداخل كل صندوق هيبقى قد إيه؟

نقدر دلوقتي نكون جملة الضرب اللي بتمثّل المثال اللي عندنا ده. يعني لو ضربنا عدد الكرات في كل صندوق، اللي هو ده العدد المجهول المطلوب مننا. في عدد الصناديق اللي هو معطى عندنا بأربعة. المفروض إن حاصل الضرب هيطلع تمنية وعشرين، اللي هو عدد الكرات كلها اللي موجودة عندنا.

عشان نقدر نوجد العدد المجهول اللي موجود في جملة الضرب اللي عندنا ده، هنستخدم النماذج. هنستخدم قطع العَدّ اللي همّ المفروض يبقوا تمنية وعشرين؛ عشان يمثلوا عدد الكرات الكلية اللي موجودة معانا، ونوزعهم على أربع مجموعات متساوية.

هنوزع واحدة في كل مجموعة، يبقى كده استخدمنا لغاية دلوقتي أربع قطع عَدّ. وبعدين نوزع أربع قطع عد تانيين على المجموعات الأربعة، فيبقى وزّعنا لغاية دلوقتي تمن قطع عد. وهنفضل بنفس الطريقة نوزع قطعة عدّ على كل مجموعة من المجموعات اللي عندنا. وهكذا لغاية ما ننتهي من توزيع التمنية وعشرين قطعة عَدّ اللي عندنا على الأربع مجموعات.

بعد كده هنعدّ عدد قطع العَدّ الموجودة بداخل كل مجموعة، هنلاقي إن عندنا كل مجموعة بتحتوي على سبع قطع عَدّ. كده يبقى قدرنا نستنتج العامل المجهول في جملة الضرب اللي هيبقى سبعة.

يبقى عندنا سبع كرات في كل صندوق، وأربع صناديق، وعدد الكرات الكلية هيبقى عبارة عن حاصل الضرب اللي هو تمنية وعشرين.

في المثال اللي عندنا ده هنعرف إن فيه طفل بيأخذ سبعة جنيهات كل أسبوع، فكم جنيه يحصل عليها في خمسة أسابيع؟

عشان نقدر عدد الجنيهات الكلي اللي هيحصل عليه في الخمسة أسابيع، عايزين نوجد حاصل ضرب عدد الجنيهات كل أسبوع، في عدد الأسابيع.

هو بيحصل على سبعة جنيهات كل أسبوع. وعندنا خمس أسابيع. عايزين نعرف بعد خمس أسابيع هيكون حصل على كم من الجنيهات. فيبقى عايزين نوجد حاصل ضرب سبعة في خمسة.

هنبتدي نحل باستخدام النماذج. هنستخدم سبع قطع عَدّ اللي هيعبروا عن عدد الجنيهات اللي هيأخذهم الطفل في الأسبوع الأول. وبعدين هنستخدم سبع قطع عَدّ تانيين اللي هيمثّلوا عدد الجنيهات اللي يأخذهم في الأسبوع التاني. وبنفس الطريقة سبع قطع عَدّ اللي بيمثلوا الجنيهات اللي بيأخذها في الأسبوع التالت. وبالمِثل الأسبوع الرابع سبع قطع أخرى. وبرضو بنفس الطريقة سبع قطع عَدّ بيمثّلوا عدد الجنيهات اللي هياخدها في آخر أسبوع اللي هو الأسبوع الخامس.

لو عدّينا قطع العَدّ اللي استخدمناهم، هنلاقي عندنا خمسة وتلاتين قطعة عَدّ. يبقى باستخدام النماذج قدرنا نعرف إن حاصل ضرب سبعة في خمسة هيساوي خمسة وتلاتين. يبقى نقدر نقول سبعة في خمسة هيساوي خمسة وتلاتين. وده عدد الجنيهات الكلية اللي يأخذها الطفل في خمس أسابيع.

ونقدر نوجد برضو حاصل الضرب ده باستخدام طريقة أخرى غير النماذج، وهي طريقة الجمع المتكرر. الطفل ده بيأخذ سبعة جنيهات كل أسبوع. فهنجمع سبعة جنيهات بتوع الأسبوع الأول، زائد سبعة جنيهات الأسبوع التاني، زائد سبعة للأسبوع التالت، زائد سبعة للأسبوع الرابع، زائد سبعة للأسبوع الخامس.

هنلاقي إن ناتج الجمع هيبقى خمسة وتلاتين. وهو ده برضو حاصل الضرب اللي حصلنا عليه، وهو الناتج اللي حصلنا عليه برضو باستخدام النماذج.

عرفنا في الفيديو ده إزاي نقدر نوجد حاصل الضرب في العدد سبعة. وعرفنا كمان إزاي نقدر نوجد أحد العوامل المجهولة في جملة الضرب.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.