تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد الوسط الحسابي لمجموعة من البيانات

أحمد مدحت

يوضح الفيديو مفهوم الوسط الحسابي لمجموعة بيانات، وكيفية إيجاده، مع أمثلة توضيحية.

٠٣:٤٢

‏نسخة الفيديو النصية

هنتكلم عن إيجاد الوسط الحسابي لمجموعة من البيانات. في الفيديو ده هنعرف إيه هو الوسط الحسابي لمجموعة من البيانات، وإزاي نوجده.

بالنسبة للوسط الحسابي فهو عبارة عن مقياس من مقاييس النزعة المركزية، واللي هي عبارة عن أعداد بتوصف مركز تجمُّع مجموعة من البيانات. والوسط الحسابي عبارة عن مجموع القيم مقسومًا على عددها؛ يعني الوسط الحسابي يساوي مجموع القيم على عدد القيم. والوسط الحسابي بيكون مفيد أكتر لما مجموعة البيانات ما تحتويش على قيم متطرفة. كده يبقى إحنا عرفنا إيه هو الوسط الحسابي. بعد كده هنشوف مثال على إيجاد الوسط الحسابي لمجموعة من البيانات.

في المثال اللي عندنا عايزين نوجد الوسط الحسابي للأعداد: سبعة، وستة، وأربعة، وتلاتة. علشان نوجد الوسط الحسابي، فإحنا هنقسم مجموع القيم اللي عندنا على عدد القيم، وهو ده تعريف الوسط الحسابي؛ معنى كده إن الوسط الحسابي يساوي: سبعة، زائد ستة، زائد أربعة، زائد تلاتة، على أربعة. ولما هنجمع هنلاقي الوسط الحسابي يساوي عشرين على أربعة، يعني يساوي خمسة؛ معنى كده إن الوسط الحسابي للأعداد سبعة وستة وأربعة وتلاتة هو خمسة.

هنشوف مثال كمان، عندنا في المثال جدول بيوضح ساعات التدريب الشهرية لاتنين من الرياضيين، عايزين نوجد الوسط الحسابي لساعات تدريب الرياضي ب.

علشان نوجد الوسط الحسابي لساعات تدريب الرياضي ب، فإحنا هنقسم مجموع القيم اللي موجودة في الصف بتاع الرياضي ب على عدد القيم الموجود في نفس الصف؛ وده لأن الوسط الحسابي يساوي مجموع القيم على عدد القيم، بالتالي الوسط الحسابي يساوي: اتنين وخمسين، زائد سبعة وستين، زائد تلاتة وسبعين، زائد أربعة وسبعين، زائد سبعين، زائد تسعة وستين، زائد سبعة وخمسين، زائد أربعة وستين، زائد تمنية وأربعين، زائد تلاتة وسبعين، زائد تمنية وستين، زائد خمسة وستين، على اتناشر. ولما هنجمع هنلاقي الوسط الحسابي يساوي سبعمية وتمانين على اتناشر، يعني هيساوي خمسة وستين. معنى كده إن الوسط الحسابي لساعات تدريب الرياضي ب هو خمسة وستين ساعة.

هنشوف مثال كمان، عندنا في المثال إن الوسط الحسابي للقيم: أربعة، وس، وخمسة، وتمنية، وتمنتاشر، هو عشرة، ومطلوب إيجاد قيمة س.

من تعريف الوسط الحسابي، هنلاقي الوسط الحسابي يساوي مجموع القيم على عدد القيم. ومن خلال المعطيات اللي عندنا، هيبقى الوسط الحسابي، اللي هو عشرة، يساوي مجموع القيم، واللي هو عبارة عن أربعة زائد س زائد خمسة زائد تمنية زائد تمنتاشر، على عدد القيم، واللي هو خمسة. فلما هنجمع هنلاقي عشرة تساوي س زائد خمسة وتلاتين على خمسة، فهنضرب طرفَي المعادلة في خمسة، فهيبقى عندنا خمسين تساوي س زائد خمسة وتلاتين. بعد كده علشان نجيب قيمة س، فإحنا هنطرح من طرفَي المعادلة خمسة وتلاتين فهنلاقي س تساوي خمستاشر، وبكده يبقى إحنا أوجدنا قيمة س.

بكده يبقى إحنا في الفيديو ده عرفنا إن الوسط الحسابي مقياس من مقاييس النزعة المركزية، والوسط الحسابي لمجموعة القيم عبارة عن مجموع القيم مقسومًا على عددها، وعرفنا كمان إن إحنا بنستخدم الوسط الحسابي لما تكون مجموعة البيانات ما بتحتويش على قيم متطرفة، وكمان عرفنا إزاي نوجد الوسط الحسابي لمجموعة بيانات.