فيديو: تحديد القوة الكهروستاتية التي يؤثِّر بها جُسيمان مشحونان على جُسيم مشحون يقع بينهما

شحنتان كهربيتان ‎𝑞_1 = +50𝜇c و‎𝑞_2 = −25𝜇c المسافة بينهما 1.0m. ما مقدار القوة المؤثِّرة على شحنة ثالثة ‎𝑞_3 = +20𝜇c الموجودة في منتصف المسافة بين 𝑞_1 و𝑞_2؟

٠٢:٢٧

‏نسخة الفيديو النصية

شحنتان كهربيتان: 𝑞 واحد تساوي موجب خمسين ميكروكولوم. 𝑞 اتنين تساوي سالب خمسة وعشرين ميكروكولوم. المسافة بينهما واحد متر. ما مقدار القوّة المؤثّرة على شحنة ثالثة، 𝑞 تلاتة، بتساوي موجب عشرين ميكروكولوم الموجودة في منتصف المسافة بين 𝑞 واحد وَ 𝑞 اتنين؟

فإحنا عندنا شحنتين؛ واحدة بتساوي موجب خمسين ميكروكولوم. والتانية بتساوي سالب خمسة وعشرين ميكروكولوم. المسافة ما بين الشحنتين دول واحد متر. فلو حطّينا شحنة تالتة ما بينهم، شحنتها بتساوي موجب عشرين ميكروكولوم، هنلاقي الشحنتين بيأثّروا عليها بقوتين. الشحنة الأولانية بتأثّر عليها بقوة تنافُر. وده علشان الشحنتين موجبتين زيّ بعض. إنما القوة اللي بتأثّر بيها الشحنة التانية على التالتة هي قوة تجاذُب. وده عشان إشارات الشحنتين عكس بعض. وعلشان نجيب القوة المؤثّرة على الشحنة دي، هنستخدم قانون كولوم.

وقانون كولوم بيقول: إن القوة الكهربائية ما بين شحنتين بيساوي ثابت، اللي هو اسمه ثابت كولوم. مضروب في الشحنة واحد في الشحنة اتنين. مقسوم على المسافة اللي ما بين الشحنتين تربيع. وثابت كولوم ده هو عبارة عن رقم بيساوي تسعة في عشرة أُس تسعة، نيوتن متر تربيع على كولوم تربيع.

فإحنا عشان نجيب القوة اللي بتأثّر بيها الشحنة واحد عَ الشحنة تلاتة، هنعوّض في قانون كولوم. فكده هنلاقي إن 𝐹 واحد تلاتة بتساوي تسعة في عشرة أُس تسعة نيوتن متر تربيع على كولوم تربيع، مضروبة في خمسين ميكروكولوم، مضروبة في عشرين ميكروكولوم. كل ده مقسوم على نصّ متر تربيع. ومن هنا ممكن نطلّع إن 𝐹 واحد تلاتة بتساوي ستة وتلاتين نيوتن.

وعلشان نجيب القوة اللي بتأثّر بيها الشحنة اتنين على الشحنة تلاتة، هنعوّض برضو في قانون كولوم. ولكن ناخد بالنا إن إحنا في الشحنة التانية مش هنعوّض بالإشارة بتاعتها. وده عشان الإشارة بتدّينا معلومة اتجاه القوة. وإحنا فعلًا خلاص استخدمنا المعلومة دي، وعرفنا إن القوة اتجاهها كده.

فهنعوّض في قانون كولوم بالشحنة من غير إشارتها. فهنلاقي إن 𝐹 اتنين تلاتة بتساوي تسعة في عشرة أُس تسعة نيوتن متر تربيع على كولوم تربيع. مضروبة في خمسة وعشرين ميكروكولوم. مضروبة في عشرين ميكروكولوم. مقسومة على نصّ متر تربيع برضو. اللي هيدِّي لنا إن 𝐹 اتنين تلاتة بتساوي تمنتاشر نيوتن.

ونقدر نقول: إن محصّلة القوى المؤثّرة على الشحنة التالتة بتساوي 𝐹 واحد تلاتة زائد 𝐹 اتنين تلاتة. يعني نقدر نقول: إنها بتساوي ستة وتلاتين نيوتن زائد تمنتاشر نيوتن. يعني محصّلة القوى بتساوي أربعة وخمسين نيوتن. وبكده يبقى عرفنا نجيب محصّلة القوى المؤثّرة على شحنة موجودة ما بين شحنتين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.