فيديو: تحديد قيمة مقاومة من قياسات شدة التيار وفرق الجهد

وُصّلت مقاومة في دائرة كهربية مع مصدر جهد متغيّر. يوضّح الشكل التالي قياسات فرق الجهد عبر المقاومة، والتيار المارّ بها. أوجد مقدار المقاومة.

٠٢:١٦

‏نسخة الفيديو النصية

وُصّلت مقاومة في دائرة كهربية مع مصدر جهد متغيّر. يوضّح الشكل التالي قياسات فرق الجهد عبر المقاومة، والتيار المارّ بها. أوجد مقدار المقاومة.

ففيه مقاومة متوصّلة بمصدر جهد متغيّر. والرسم البياني ده بيوضّح العلاقة ما بين الجهد، وما بين التيار اللي ماشي في المقاومة. فلو جينا مثلًا بصّينا على النقطة دي، هنلاقي إن التيار كان بيساوي تمنية أمبير لمّا كان فرق الجهد بيساوي تمنمية فولت.

أمّا لو بصّينا على نقطة تانية في الرسم البياني، زيّ النقطة دي مثلًا. هنلاقي إن التيار كان بيساوي اتنين أمبير لمّا كان فرق الجهد ميتين فولت. والمطلوب منّنا إن إحنا نعرف المقاومة دي بتساوي كام.

فهنرجع هنا لقانون أوم اللي بيقول إن فرق الجهد بيساوي التيار مضروب في المقاومة. فلو جينا نقارن قانون أوم بالمعادلة بتاعة الخط المستقيم. اللي بتقول إن 𝑦 بتساوي الميل بتاع الخط في 𝑥، زائد 𝐶؛ اللي هي النقطة اللي قطع فيها الخط المحور 𝑦.

فلمّا نيجي نقارن قانون أوم بمعادلة الخط المستقيم هنلاقي إن فرق الجهد هو المحور 𝑦، والتيار اللي ماشي في المقاومة هو المحور 𝑥. وهنلاقي برضو إن النقطة، اللي تقاطع فيها الخط المستقيم اللي بيوصّل النقط دي كلها مع المحور 𝑦، كانت صفر. فده معناه إن الـ 𝐶 في حالة الخط المستقيم ده كانت بصفر.

فاللي فاضل في المعادلة عندنا دلوقتي هي الـ 𝑅، وهنلاقيها بتساوي ميل الخط. وميل الخط المستقيم نقدر نجيبه من نقطتين بإننا نطرح فرق قيم الـ 𝑦 بتاعة النقطتين، ونقسمهم على فرق قيم الـ 𝑥 بتاعة النقطتين.

ففي الحالة بتاعتنا دي لو خدنا القيم بتاعة النقطتين اللي إحنا طلّعناهم في الأول. هنلاقي إن ميل الخط، اللي هو زيّ ما قلنا هو المقاومة. بتساوي تمنمية فولت ناقص ميتين فولت، اللي هي قيم الـ 𝑦 في النقطتين بتوعنا. مقسومين على تمنية أمبير ناقص اتنين أمبير، اللي هي قيم الـ 𝑥 في النقطتين بتوعنا. فهنلاقي إن المقاومة بتساوي مية فولت على أمبير.

وعلشان إحنا بنتعامل مع مقاومة، فإحنا بنعبّر عن المقاومة دي بوحدة بتساوي فولت على أمبير، وبنسمّيها: «أوم». فنقدر نعوّض مكان الفولت على أمبير بـ أوم، ونبقى كده طلّعنا إن المقاومة بتساوي مية أوم.

وبكده نبقى عرفنا نطلّع قيمة المقاومة من رسم بياني بيوضّح العلاقة ما بين التيار اللي ماشي في المقاومة، وفرق الجهد اللي متوصّل بيها.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.