فيديو: تحويل الكسور إلى أعداد عشرية

حوِّل ٩٠/٤ إلى عدد عشري.

٠٦:٢٥

‏نسخة الفيديو النصية

حوّل أربعة على تسعين إلى عدد عشري.

طالما طلب منّنا في السؤال إننا نحوّل الكسر لعدد عشري، فالمفروض أول حاجة نفكّر فيها هي إزَّاي نغيّر شكل الكسر ده ونبسّطه. مثلًا إحنا ممكن نبسّط الكسر ده بإننا نضرب البسط والمقام في نفس العدد، بحيث إن الناتج يكون كسر نقدر نحوّله لعدد عشري بسهولة، أو إننا نقسم البسط والمقام على نفس العدد. علشان يدّي لنا كسر، ويكون برضو من السهل علينا إننا نحوّله لعدد عشري بسهولة. أو إننا نقسّم الكسر ده بنفس المقام لكسرين مجموعين أو كسرين مطروحين. وفي الآخر، نقدر نحوّلهم لعدد عشري بسهولة. بس ما فيش ولا طريقة من اللي قُلناهم دلوقتي هنعرف نحوّل بيها الكسر أربعة على تسعين إلى عدد عشري.

الطريقة اللي هنقدر نحوّل بيها الكسر أربعة على تسعين إلى عدد عشري هي طريقة القسمة المطوّلة. بس لازم ننتبه إن البسط هنا أصغر من المقام. وده معناه إن الناتج هيكون عدد عشري أقلّ من الواحد، مش عدد صحيح. وعلشان هنا البسط أصغر من المقام، فإحنا ممكن نكتب البسط بالصورة دي: أربعة، علامة عشرية، وقدامها أيّ عدد من الأصفار. وبكده مش هنبقى غيّرنا في قيمة الأربعة أيّ حاجة، والمقام هينزل زيّ ما هو.

دلوقتي هنقسم البسط والمقام باستخدام القسمة المطوّلة. بس الأول تعالوا نفتكر إيه هي خطوات القسمة المطوّلة، ونطبّق خطوة خطوة مع بعض. أول خطوة عندنا: القسمة. هنقسم الأربعة على التسعين، ونسأل نفسنا سؤال: هل ينفع نقسم الأربعة على التسعين؟ يعني ينفع نقسّم أربع تفاحات على تسعين طالب؟ مش هنعرف. وعلشان مش هنعرف، فهننزّل فوق في المكان اللي بنكتب فيه الناتج صفر. تاني خطوة عندنا: ضرب. هنضرب الصفر في تسعين. الصفر لو ضربناه في أيّ عدد هيدّي لنا صفر. الخطوة التالتة عندنا: الطرح. هنطرح أربعة ناقص صفر هيساوي أربعة.

رابع خطوة عندنا: ننزّل رقم. هنشوف أول رقم يقابلنا بعد الأربعة. هنلاقي إن أول حاجة بعد الأربعة هي العلامة العشرية. وعلشان إحنا عارفين إن الناتج عندنا هيكون عدد عشري، يعني لازم يكون فيه علامة عشرية. فهنطلّع العلامة العشرية اللي قدامنا دي فوق في الناتج، وبعدين ننزّل العدد اللي بعد العلامة العشرية جنب الأربعة.

الخطوة الخامسة تكرار الخطوات. هنرجع نكرّر أول خطوة تاني. هنقسم الأربعين على التسعين. هل هنعرف نقسم الأربعين على التسعين؟ الأربعين أصغر من التسعين. وعلشان كده هنحطّ فوق عند الناتج صفر. تاني خطوة: ضرب. هنضرب الصفر في تسعين. الصفر في تسعين هيدّي لنا صفر. وبعدين الخطوة التالتة: الطرح. هنطرح الأربعين ناقص صفر، هيدّي لنا أربعين. رابع خطوة: إننا ننزّل رقم. وهننزّل الصفر التاني بعد العلامة.

الخطوة الخامسة هي: تكرار الخطوات. هنقسم الربعمية على التسعين. هل هنعرف نقسم الربعمية على التسعين؟ طالما الربعمية أكبر من التسعين، فهنعرف نقسمهم عادي. تعالوا الأول نسأل نفسنا سؤال: كام في تسعين بيساوي ربعمية؟ ما فيش عدد صحيح نضربه في تسعين ويدّي لنا ربعمية. علشان كده هندوّر على عدد نضربه في تسعين ويدّي لنا عدد قريّب من الربعمية، بس لازم يكون أصغر منها. إحنا عارفين إن التسعة في أربعة بيساوي ستة وتلاتين. طب التسعين في أربعة بيساوي كام؟ تلتمية وستين. التلتمية وستين قريّبة للربعمية.

بس عايزين نشوف، يمكن يكون فيه عدد تاني قريّب للربعمية. تعالوا نجرّب التسعين في خمسة. التسعة في خمسة بخمسة وأربعين. والتسعين في خمسة بربعمية وخمسين. الربعمية وخمسين أكبر من الربعمية. وعلشان كده مش هناخد التسعين في خمسة معانا. كده إحنا اتأكّدنا إن التلتمية وستين هي أقرب حاجة للربعمية. كده يبقى الربعمية على التسعين هتدّي لنا أربعة. الخطوة اللي عليها الدور هي إننا نضرب الأربعة في تسعين. الأربعة في تسعين بتلتمية وستين. دلوقتي هنطرح الربعمية ناقص تلتمية وستين، هتدّي لنا أربعين.

دلوقتي هننزّل الرقم اللي عليه الدور. هننزّل الصفر. وهنكرّر الخطوات. ربعمية على التسعين فيها الأربعة. الأربعة في تسعين بتلتمية وستين. هنطرح. ربعمية ناقص تلتمية وستين فيها الأربعين. هنلاحظ إن إحنا بنكرّر عملية القسمة دي كل مرة. ده معناه إن القسمة دي غير منتهية. كل مرة هنقسم فيها ربعمية على التسعين هتدّي لنا أربعة. نقسم تاني ربعمية على التسعين هتدّي لنا أربعة، إلى ما لا نهاية. علشان القسمة غير منتهية، هنكتب فوق الأربعة اللي في الناتج نقطة. وده معناه إن الأربعة دي متكرّرة إلى ما لا نهاية.

وبكده يبقى ناتج أربعة على التسعين لو حوّلناها لعدد عشري وقرّبناها، هتدّي لنا أربعة من مية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.