تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد المدي لمجموعة من البيانات وتفسيره

أحمد مدحت

يوضح الفيديو مفهوم المدى لمجموعة بيانات، واستخدامه، وكيفية إيجاده، مع أمثلة توضيحية.

٠٢:٢٠

‏نسخة الفيديو النصية

هنتكلم عن إيجاد المدى لمجموعة بيانات. في الفيديو ده هنعرف معنى المدى لمجموعة البيانات، وإزاي نوجده. فبالنسبة للمدى فهو بيستخدم لوصف مجموعة بيانات، وهو عبارة عن الفرق بين القيمتين، العظمى والصغرى، لمجموعة البيانات دي. والمدى من خلال وصفه لمجموعة البيانات بيوضح قد إيه القيم اللي في مجموعة البيانات دي منتشرة أو متباعدة، وعلشان كده بنستخدمه لما بنوصف تشتت القيم في مجموعة البيانات، أو بمعنى تاني تباعدها عن بعض.

كده إحنا عرفنا إيه هو المدى لمجموعة بيانات، بعد كده هنشوف إزاي نوجده، وده هيكون من خلال مثال.

عندنا في المثال جدول بيوضح متوسط درجات الحرارة العظمى خلال شهر نوفمبر، وعايزين نوجد مدى البيانات اللي موجودة عندنا في الجدول.

من تعريف المدى، المدى هو الفرق بين القيمتين، العظمى والصغرى، لمجموعة البيانات؛ وبالتالي علشان نوجد المدى، فإحنا هنطرح أقل درجة حرارة من أكبر درجة حرارة. ومن خلال الجدول اللي عندنا، هنلاقي أقل درجة حرارة هي تسعتاشر درجة مئوية، وأكبر درجة حرارة هي تمنية وعشرين درجة مئوية؛ بالتالي المدى يساوي تمنية وعشرين ناقص تسعتاشر، يعني هيساوي تسع درجات مئوية، بكده يبقى إحنا أوجدنا المدى للبيانات اللي موجودة في الجدول اللي عندنا. هنشوف مثال كمان.

عندنا في المثال جدول بيمثل أطوال أربعين طالب بالسنتيمتر، عايزين نوجد المدى لأطوال الطلاب.

من تعريف المدى، المدى هو الفرق بين القيمتين، العظمي والصغرى، لمجموعة البيانات. ومن خلال الجدول، هنلاقي القيمة الصغرى هي مية ستة وتلاتين سنتيمتر، والقيمة العظمي هي مية ستة وتمانين سنتيمتر؛ يعني المدى لمجموعة البيانات اللي عندنا يساوي مية ستة وتمانين ناقص مية ستة وتلاتين، يعني يساوي خمسين سنتيمتر.

بكده يبقى إحنا في الفيديو ده عرفنا إن المدى لمجموعة بيانات هو الفرق بين القيمتين، العظمي والصغرى، لمجموعة البيانات دي، وبنستخدم المدى علشان نوصف مجموعة بيانات؛ وده لأنه بيوضح قد إيه القيم اللي في مجموعة البيانات منتشرة أو متباعدة، وعلشان كده بنستخدمه علشان نوصف تشتت القيم في مجموعة البيانات، أو بمعنى تاني تباعدها عن بعض. بعد كده عرفنا إزاي نوجد المدى لمجموعة بيانات.