تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: ضرب الأعداد الكسرية

أحمد لطفي

يوضح الفيديو كيفية ضرب الأعداد الكسرية عن طريق خطوتين: كتابة الأعداد الكسرية في صورة كسور غير فعلية، وإيجاد ناتج ضرب الكسور غير الفعلية.

٠٦:٣٣

‏نسخة الفيديو النصية

هنتكلّم عن ضرب الأعداد الكسرية، وهنعرف إيه هي الخطوات اللي يجب اتباعها عشان نقدر ضرب أعداد كسرية.

عشان نقدر نضرب الأعداد الكسرية، محتاجين ننفذ خطوتين. أول خطوة: كتابة العدد الكسري في صورة كسر غير فعلي. اللي هو الكسر اللي بيكون العدد اللي في البسط أكبر من العدد اللي في المقام. وبالنسبة للخطوة التانية: هي ضرب الكسور. ويبقى إحنا عشان نقدر نضرب الأعداد الكسرية من خلال خطوتين: أول خطوة كتابة العدد الكسري في صورة كسر غير فعلي. تاني خطوة ضرب الكسور.

لو عندنا مثال بالشكل ده: مطلوب نوجد ناتج واحد على أربعة، في أربعة وأربعة على خمسة.

في البداية تقدير عملية الضرب باستخدام الأعداد المتوافقة، هتكون عبارة عن واحد على أربعة، في أربعة هتساوي واحد. ويبقى قدرنا نستخدم الأعداد المتوافقة عشان نقدّر ناتج عملية الضرب. ولو عايزين نوجد ناتج عملية الضرب، عندنا واحد على أربعة في أربعة وأربعة على خمسة. محتاجين نكتب العدد الكسري في صورة كسر غير فعلي. يعني هتساوي واحد على أربعة، في … عشان نحوّل العدد الكسري لكسر غير فعلي، محتاجين نضرب العدد الصحيح في مقام الكسر، ونجمع عليه البسط، وهيكون هو العدد اللي موجود في البسط. يعني أربعة في خمسة هيساوي عشرين، زائد أربعة هيساوي أربعة وعشرين. وهنكتب المقام هو مقام الكسر اللي هو خمسة. وبالتالي أربعة وأربعة على خمسة هتساوي أربعة وعشرين على خمسة.

وبالتالي هيكون عندنا واحد على أربعة، في أربعة وعشرين على خمسة. عشان نقدر نضرب كسرين في بعض، بنضرب البسط في البسط والمقام في المقام. يعني هيساوي … في البسط هيكون عندنا واحد في أربعة وعشرين. وفي المقام هيكون عندنا أربعة في خمسة. هنلاحظ إن عندنا عامل مشترك بين الأربعة وعشرين والأربعة وهو الأربعة. فأربعة وعشرين على أربعة هيساوي ستة. وأربعة على أربعة هيساوي واحد. وبالتالي في البسط هيكون عندنا واحد في ستة، وفي المقام هيكون عندنا واحد في خمسة. يعني هيساوي ستة على خمسة. وستة على خمسة هو كسر غير فعلي، ممكن نكتبه في صورة عدد كسري. هيكون عبارة عن واحد وواحد على خمسة.

ويبقى كده قدرنا نوجد ناتج عملية ضرب واحد على أربعة في أربعة وأربعة على خمسة. وهنلاحظ إن التقدير هيكون مقبول.

لو عندنا مثال آخر بالشكل ده: عندنا وصفة لأكلة ما. وعشان نقدر نحضّر الأكلة محتاجين اتنين وواحد على أربعة كوب من الدقيق. وإذا كانت مريم تريد عمل واحد وواحد على اتنين مثل الوصفة. يعني عايزة تعمل الأكلة مرة ونص. فعايزين نشوف هتحتاج قد إيه من الدقيق.

يبقى هنقول: تحتاج مريم من الدقيق اتنين وواحد على أربعة كوب من الدقيق، اللي هي بتكفي لعمل وصفة واحدة، في الكمية اللي محتاجة تعملها مريم، اللي هي واحد وواحد على اتنين. وبالتالي هنكون محتاجين نوجد ناتج ضرب اتنين وواحد على أربعة، في واحد وواحد على اتنين.

في البداية هنحوّل الأعداد الكسرية إلى كسور غير فعلية. فهتساوي اتنين وواحد على أربعة، هتساوي تسعة على أربعة. في … واحد وواحد على اتنين هيساوي تلاتة على اتنين. هيكون عندنا تسعة على أربعة في تلاتة على اتنين. هنضرب البسط في البسط والمقام في المقام. يعني هيساوي سبعة وعشرين على تمنية.

أو ممكن نكتبها في صورة عدد كسري. تلاتة وتلاتة على تمنية كوب من الدقيق. ويبقى كده مريم هتحتاج سبعة وعشرين على تمنية أو تلاتة وتلاتة على تمنية كوب من الدقيق؛ عشان تقدر تعمل واحد وواحد على اتنين مثل الوصفة.

لو عندنا مثال آخر بالشكل ده: معطى م بتساوي واحد وسبعة على تمنية، وَ ن بتساوي تلاتة وواحد على تلاتة. ومطلوب نوجد قيمة م ن.

يبقى نقدر نقول إن م ن هتساوي … هنعوّض عن م بقيمتها اللي هي واحد وسبعة على تمنية، في … هنعوّض عن ن بقيمتها اللي هي تلاتة وواحد على تلاتة. وبالتالي هيكون عندنا واحد وسبعة على تمنية في تلاتة وواحد على تلاتة. هنحوّل الأعداد الكسرية إلى كسور غير فعلية. يعني هيساوي واحد وسبعة على تمنية هتساوي خمستاشر على تمنية. في … تلاتة وواحد على تلاتة هيساوي عشرة على تلاتة. هنختصر قبل إجراء عملية الضرب. عندنا عامل مشترك بين الخمستاشر والتلاتة، وهو التلاتة. وبالتالي خمستاشر على تلاتة هيساوي خمسة. وتلاتة على تلاتة هيساوي واحد. وهنلاحظ أيضًا إن عندنا عامل مشترك بين العشرة والتمنية، وهو الاتنين. وبالتالي عشرة على اتنين هيساوي خمسة. وتمنية على الاتنين هيساوي أربعة. يعني الناتج هيساوي خمسة وعشرين على أربعة.

ممكن نكتبه في صورة عدد كسري. فهيكون عبارة عن ستة وواحد على أربعة. ويبقى كده قدرنا نوجد قيمة م ن، وكانت بتساوي خمسة وعشرين على أربعة، أو ستة وواحد على أربعة.

وفي النهاية نكون عرفنا إيه هي الخطوات اللازمة اللي يجب اتّباعها؛ عشان نقدر نوجد ناتج ضرب أعداد كسرية. عن طريق خطوتين: أول خطوة تحويل الأعداد الكسرية إلى كسور غير فعلية. وتاني خطوة إجراء عملية الضرب على الكسور.