تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: مقارنة الكتل وترتيبها

نهال عصمت

يوضح الفيديو كيفية المقارنة بين الكُتَل المختلفة، وترتيبها من الأثقل إلى الأخف، والعكس، ويوضح الكلمات المستخدمة للتعبير عن الكُتَل.

٠٤:٥٠

‏نسخة الفيديو النصية

مقارنة الكتل وترتيبها.

هنعرف إزاي نقارن بين الكتل، بعد كده هنبدأ نرتبهم. لمّا نيجي نتكلم عن الكتل، بنستخدم كلمة ثقيل، أو كلمة خفيف. ولو جينا نقارن ما بين حاجتين، نقدر نقول إن الحاجة دي أثقل من، أو إن الحاجة دي أخفّ من. ولو حبينا نقارن ما بين أشياء كتير، نقدر نقول إن فيه حاجة منهم هي الأثقل، وإن فيه حاجة هي الأخفّ. يبقى كده عرفنا الكلمات اللي بنستخدمها عشان نعبّر عن الكتل.

بمعنى لو عندنا قلم رصاص وكتاب، وعايزين نقارن بينهم من حيث الكتلة. هنلاحظ إن لو مسكنا القلم، ومسكنا الكتاب، هنلاقي إن القلم أخفّ من الكتاب. لكن نقدر نقول على الكتاب أثقل من القلم. يبقى كده عرفنا إزاي نستخدم الكلمات اللي بتعبّر عن الكتل.

هنبدأ نجيب صفحة جديدة، ونبدأ نشوف أمثلة أخرى. لو عندنا مقص وكتاب، وعايزين نعرف أيهما أثقل. هنبدأ نمسك المقص، وهنمسك الكتاب. هنلاقي إن المقص أخفّ من الكتاب. وبالتالي نقدر نقول إن الكتاب أثقل من المقص.

طب لو عندنا برّاية وكوب عصير، وعايزين نعرف أيهما أخفّ. نفس الكلام هنبدأ نمسك البراية، ونمسك كوب العصير. هنلاقي إن البراية أخفّ من كوب العصير. وإن كوب العصير أثقل من البراية. يبقى نقدر نقول إن الأخفّ هو البراية.

يبقى بعد ما عرفنا نقارن ما بين الأشياء من حيث الكتل. وعرفنا إمتى نقدر نقول على الشكل ده أثقل، وإمتى نقدر نقول عليه أخفّ. هنبدأ نجيب صفحة جديدة، ونبدأ نتكلم عن ترتيب الكتل.

لو عندنا مجموعة كتب، وقلم، وممحاة. وعايزين نرتبهم من الأخفّ إلى الأثقل. هنبدأ نمسك الأشكال، ونقارن ما بينهم. هنلاقي إن أخفّ شكل موجود عندنا هو الممحاة. هنبدأ نكتب عندها رقم واحد، عشان هي أخفّ شكل. بعد كده هنقارن بين القلم والكتب، هنلاقي إن القلم أخفّ من الكتب. يبقى هنكتب عند القلم رقم اتنين. وهنلاقي إن الكتب هي أثقل شكل. يبقى هنكتب عندها تلاتة. يبقى لو حبينا نرتب الأشكال من الأخفّ إلى الأثقل. أخفّ شكل هو الممحاة. والشكل الذي يليه هو القلم. وأثقل شكل هو الكتب.

هنبدأ نجيب صفحة جديدة، ونبدأ نقارن بين السبورة، والمنبه، والمشط؛ من حيث الكتل، ونرتبهم من الأثقل إلى الأخفّ. لو جينا نبصّ على التلات أشكال، هنلاقي إن أثقل شكل هو السبورة. يبقى هنكتب عندها رقم واحد. بعد كده هنبدأ نقارن بين المنبه والمشط، هنلاقي إن المنبه أثقل من المشط. يبقى هنكتب عند المنبه رقم اتنين، وهنكتب عند المشط رقم تلاتة. يبقى لمّا نرتب الأشكال من الأثقل إلى الأخفّ، هيبقى أثقل شكل هو السبورة. والشكل الذي يليه هو المنبه. وأخفّ شكل هو المشط.

يبقى كده عرفنا الكلمات اللي بتعبّر عن الكتل. وقدرنا نقارن ما بين الكتل. وعرفنا إزاي نرتب الكتل من الأثقل إلى الأخفّ، ومن الأخفّ إلى الأثقل.