فيديو: الشغل المبذول في عملية تتم بثبوت الضغط

مصطفى عبد السلام

عندما يتعرض غاز لعملية انضغاط شبه ساكنة تتم بثبوت الضغط؛ بحيث يتغير حجمه من 12.00L إلى 5.50L فإنه يلزم لذلك 35J من الشغل من مصدر خارجي. ما مقدار ضغط الغاز أثناء عملية الانضغاط؟

٠٢:٠٤

‏نسخة الفيديو النصية

عندما يتعرَّض غاز لعملية انضغاط شبه ساكنة تتمّ بثبوت الضغط. بحيث يتغيّر حجمه من اتناشر لتر إلى خمسة وخمسين من المية لتر. فإنه يلزم لذلك خمسة وتلاتين جول من الشغل من مصدر خارجي. ما مقدار ضغط الغاز أثناء عملية الانضغاط؟

فإحنا عندنا غاز كان حجمه اتناشر لتر. وعلشان نصغّر حجم الغاز ده لخمسة ونصّ لتر، محتاجين نبذل شغل على الغاز بيساوي خمسة وتلاتين جول. وناخد بالنا إن إحنا حطّينا قيمة الشغل بالسالب؛ علشان الشغل ده بيأثّر على الغاز. والعملية دي كلّها هتتمّ بثبوت الضغط. والمطلوب منّنا إن إحنا نعرف الضغط ده بيساوي كام. فنقدر نطلّع الضغط ده بإننا نستخدم المعادلة بتاعة الشغل المبذول بواسطة الغاز عند ضغط ثابت. والمعادلة دي بتقول: إن الشغل بيساوي الضغط مضروب في فرق الحجم.

فعلشان نجيب الضغط، هنقسم طرفين المعادلة على فرق الحجم. فده هيطلّع لنا إن الضغط بيساوي الشغل مقسوم على فرق الحجم. ولمّا نعوّض بالقيم، هنلاقي إن الضغط بيساوي سالب خمسة وتلاتين جول على، خمسة ونصّ لتر ناقص اتناشر لتر. وناخد بالنا إن فرق الحجم بيبقى عبارة عن الحجم النهائي ناقص الحجم الابتدائي. فده كده هيدّينا إن الضغط بيساوي خمسة وأربعة من العشرة جول على لتر. فنقدر نحوّل اللتر لعشرة أُس سالب تلاتة متر مكعب. ونقدر نعوّض مكان الجول بالنيوتن متر. فده هيدّينا إن الضغط بيساوي خمسة وأربعة من العشرة نيوتن متر على عشرة أُس سالب تلاتة متر مكعب.

فلو ضربنا في البسط والمقام في عشرة أُس تلاتة، هنلاقي إن العشرة أُس سالب تلاتة اللي في المقام راحت مع العشرة أُس تلاتة اللي في المقام. فكده اللي هيتبقَّى لنا العشرة أُس تلاتة اللي في البسط بس. والمتر اللي في البسط هتخلّي المتر مكعب اللي في المقام متر مربع. فده هيخلّي الوحدة بتساوي نيوتن على متر مربع. والنيوتن على متر مربع ده هو الوحدة اللي بتعبّر عن الضغط، وبنسمّيها باسكال. فنقدر كده نقول: إن الضغط بيساوي خمسة وأربعة من العشرة كيلو باسكال.

وبكده نبقى عرفنا نجيب الضغط اللي بيحصل عنده عملية الانضغاط بواسطة شغل معيّن.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.