نسخة الفيديو النصية
في أيٍّ من الأعداد التالية يمثّل الرقم أربعة قيمة العدد أربعين ألف؟ في أربعة وعشرين ألف خمسمية تمنية وسبعين؟ ولّا تسعمية ستة وسبعين ألف وستة وأربعين؟ ولّا تسعمية أربعة وسبعين ألف وستة وخمسين؟ ولّا ربعمية ستة وسبعين ألف وستاشر؟ ولّا ميتين وأربعين ألف وخمسمية؟
عاوزين نعرف في أيّ عدد من الأعداد اللي قلناها دي الرقم أربعة بيمثّل أربعين ألف أو قيمته أربعين ألف. فهنمسك عدد عدد، ونشوف قيمة الرقم أربعة فيه تساوي إيه.
فنبدأ بأول عدد. نبدأ بأربعة وعشرين ألف خمسمية تمنية وسبعين. الرقم أربعة هنا أهو. شوفوا هنعمل إيه. هننزّل الأربعة تحت الأربعة هنا كده. وكل رقم جنبها هننزّل مكانه صفر. يعني مكان الخمسة صفر، ومكان السبعة صفر، ومكان التمنية صفر. فمعنى كده إن قيمة الرقم أربعة في العدد بتاعنا هو أربعة آلاف.
وفيه طريقة تانية ممكن نجيبها بيها، وهي إننا نعدّ القيم المكانية. يعني نقول إيه؟ التمنية آحاد، السبعة عشرات، الخمسة مئات، الأربعة ألوف. ألوف يعني قيمتها أربعة آلاف، مش أربعين ألف. فمعنى كده إن الاختيار الأول مش هو الاختيار الصحّ.
نشوف تاني اختيار: تسعمية ستة وسبعين ألف وستة وأربعين. فين الأربعة؟ آدي الأربعة. موجودة فين؟ في خانة العشرات. لأن الستة آحاد، والأربعة عشرات. يعني قيمتها أربعين. ولو عملناها بالطريقة التانية: الأربعة نزلت تحت الأربعة. والستة مكانها صفر. فتبقى قيمتها إيه؟ أربعين. برضو مش دي الإجابة الصحّ.
نشوف الاختيار اللي بعده: تسعمية أربعة وسبعين ألف وستة وخمسين. آدي الأربعة هنا. تعالوا نشوفها في خانة إيه. ستة آحاد، خمسة عشرات، صفر هنا مئات، أربعة ألوف. فده معناه إن الأربعة في خانة الألوف. يعني قيمتها أربعة آلاف.
لو عملناها بالطريقة التانية: أربعة تحت الأربعة، وتحت الصفر صفر، وتحت الخمسة صفر، وتحت الستة صفر، فتبقى قيمتها برضو أربعة آلاف. ودي مش إجابة صحّ. إحنا عايزين تبقى قيمتها أربعين ألف.
ونشوف الاختيار اللي بعده: ربعمية ستة وسبعين ألف وستاشر. فهنحطّ الأربعة تحت الأربعة، وتحت كل عدد صفر. تحت السبعة صفر، وتحت الستة صفر، وتحت الصفر صفر، وتحت الواحد صفر، وتحت الستة صفر. فأصبح عندنا إيه؟ قيمة الأربعة هي ربعمية ألف، مش أربعين ألف. فبرضو مش هي دي الإجابة الصحّ.
ونيجي لآخر اختيار: ميتين وأربعين ألف وخمسمية. نبصّ على الأربعة، هنلاقيها هنا. نحطّ أربعة تحت الأربعة، والصفر مكانه صفر، والخمسة صفر، والصفر صفر، والصفر صفر. آه، هنا طلعت قيمة الأربعة إيه؟ أربعين ألف. زيّ اللي مطلوب مننا في السؤال.
فتبقى الإجابة الصحّ واللي المفروض نختارها هي: ميتين وأربعين ألف وخمسمية.