فيديو: إيجاد المضاعفات المشتركة والمضاعف المشترك الأصغر لعددين

اكتب المضاعفات المشتركة الخمسة التالية بعد المضاعف المشترك الأصغر م. م. أ. لكل من ٤، ٩.

٠٢:٥٩

‏نسخة الفيديو النصية

اكتب المضاعفات المشتركة الخمسة التالية، بعد المضاعف المشترك الأصغر م م أ، لكلٍّ من أربعة وتسعة.

فأول حاجة هنعملها إننا هنوجد المضاعف المشترك الأصغر للعددين أربعة وتسعة. بعد كده هنشوف إيه هي المضاعفات المشتركة الخمسة، اللي بعد المضاعف المشترك الأصغر. وخلينا في الأول نفتكر إن المضاعف المشترك الأصغر لعددين، أو أكثر، هو أصغر عدد موجود ضمن مضاعفات الأعداد دي. فمعنى كده علشان نوجد المضاعف المشترك الأصغر للعددين أربعة وتسعة، يبقى هنكتب مضاعفات كل عدد فيهم، وبعد كده نشوف إيه هي المضاعفات المشتركة.

فهنبدأ نكتب الأول مضاعفات العدد أربعة. ومضاعفات العدد أربعة معناها أربعة في واحد، وأربعة في اتنين، وأربعة في تلاتة، وهكذا. فهتبقى مضاعفات العدد أربعة هي: أربعة، وتمنية، واتناشر، وستاشر، وعشرين، وأربعة وعشرين، وتمنية وعشرين، واتنين وتلاتين، وستة وتلاتين، وأربعين، وهكذا. وأمّا مضاعفات العدد تسعة فهي: تسعة، وتمنتاشر، وسبعة وعشرين، وستة وتلاتين، وخمسة وأربعين، وأربعة وخمسين، وتلاتة وستين، واتنين وسبعين، وهكذا.

بعد كده هنبدأ نشوف إيه هي المضاعفات المشتركة بين مضاعفات العددين. فهنلاحظ إن عندنا هنا العدد ستة وتلاتين موجود في مضاعفات العدد تسعة، وفي نفس الوقت موجود في مضاعفات العدد أربعة. فالبتالي هيبقى ستة وتلاتين هو مضاعف مشترك لكلٍّ من أربعة وتسعة. وفي نفس الوقت هو أصغر مضاعف مشترك ليهم، فبالتالي هيبقى المضاعف المشترك الأصغر لكلٍّ من أربعة وتسعة هو: ستة وتلاتين.

لكن المطلوب مننا في السؤال، إننا نكتب المضاعفات المشتركة الخمسة التالية، بعد المضاعف المشترك الأصغر. يعني إحنا عرفنا إن ستة وتلاتين هو المضاعف المشترك الأصغر. فالمطلوب بعد كده إننا نشوف إيه هي المضاعفات المشتركة الخمسة، اللي أكبر من ستة وتلاتين، وفي نفس الوقت تكون مضاعفات مشتركة بين مضاعفات العددين أربعة وتسعة. فبما إن العدد ستة وتلاتين هو المضاعف المشترك الأصغر للعددين، فمعنى كده إن المضاعفات المشتركة الخمسة، اللي بعد المضاعف المشترك الأصغر، هتبقى في نفس الوقت من مضاعفات العدد ستة وتلاتين؛ لأن هو المضاعف المشترك الأصغر لأربعة وتسعة.

فمعنى كده إننا عايزين نوجد مضاعفات العدد ستة وتلاتين، واللي هتبقى: ستة وتلاتين، واتنين وسبعين، ومية وتمنية، ومية أربعة وأربعين، ومية وتمانين، وميتين وستاشر، وهكذا. وبما إن العدد ستة وتلاتين هو المضاعف المشترك الأصغر، فبالتالي هتبقى المضاعفات المشتركة الخمسة، اللي بعد المضاعف المشترك الأصغر، هي مضاعفات العدد ستة وتلاتين الخمسة اللي بعد ستة وتلاتين، اللي هم: اتنين وسبعين، ومية وتمنية، ومية أربعة وأربعين، ومية وتمانين، وميتين وستاشر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.