فيديو: حل المسائل الكلامية عن طريق حساب الفترة الزمنية للفائدة المستحقَّة لرصيد مالي محدَّد بمعلومية رأس المال ومعدل الفائدة البسيطة

استثمرت كريمة ٦٦٠٠ جنيه بمعدل فائدة ٥٪. في أيّ عدد من الأعوام سيكون لديها ٨٩١٠ جنيهات؟

٠٢:٤٦

‏نسخة الفيديو النصية

استثمرت كريمة ست آلاف وستمية جنيه بمعدل فائدة خمسة في المية. في أيّ عدد من الأعوام سيكون لديها تمن تلاف تسعمية وعشرة جنيهات؟

هنرمز للمبلغ المستثمر بالمتغير أ، ومعدل الفايدة السنوية بالمتغير ر، والمدة الزمنية بالسنوات بالمتغير ن، وجملة المبلغ بعد مرور ن من السنوات بالمتغير ﺟ. ودي العلاقة المستخدمة لحساب الفايدة البسيطة على المبلغ المستثمر بعد مرور عدد ن من السنوات.

دلوقتي إحنا عندنا أصل المبلغ أو المبلغ المستثمر، اللي هو ست آلاف وستمية، واللي قلنا هنرمز ليه بالمتغير أ، ست آلاف وستمية. معدل الفايدة السنوية خمسة في المية اللي هو المتغير ر، خمسة في المية. ومطلوب مننا حساب المدة الزمنية بالسنوات، يعني ن دي هي اللي مطلوب إيجادها، وَ ﺟ اللي هي جملة المبلغ بعد مرور عدد ن من السنوات معطاة عندنا بتمن تلاف تسعمية وعشرة.

هنعوّض بقيم المتغيرات المعطاة عندنا في السؤال؛ هنعوض عن ﺟ بتمن تلاف تسعمية وعشرة هتساوي … أ ست آلاف وستمية، في واحد زائد … النسبة المئوية للفايدة أو معدل الفايدة السنوية ما بنكتبهاش على شكل نسبة مئوية، يعني هي المفروض عندنا خمسة في المية، هنكتبها على شكل العدد العشري المكافئ، يعني خمسة من مية؛ في ن اللي هو عدد السنوات المطلوب إيجاده.

هيبقى عندنا تمن تلاف تسعمية وعشرة، وبعدين هنضرب ست آلاف وستمية في واحد هتبقى ست آلاف وستمية، زائد … هنضرب ست آلاف وستمية في خمسة من مية هتبقى تلتمية وتلاتين، في ن. هنطرح ست آلاف وستمية من الطرفين؛ عشان نخلّي الحد اللي فيه المتغير ن في طرف لوحده. فهيبقى عندنا تلتمية وتلاتين ن هتساوي تمن تلاف تسعمية وعشرة ناقص ست آلاف وستمية، هيبقى تلتمية وتلاتين ن هتساوي ألفين تلتمية وعشرة.

عشان نوجد قيمة المتغير ن، هنقسم طرفَي المعادلة على تلتمية وتلاتين، فكده هيبقى ن بتساوي ألفين تلتمية وعشرة على تلتمية وتلاتين، هتبقى بتساوي سبع سنوات؛ عشان ن دي متغيّر بيرمز للمدة الزمنية بالسنوات. وكده قدرنا نحسب عدد السنوات اللي كريمة هيصبح لديها بعدها تمن تلاف تسعمية وعشرة من الجنيهات.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.