فيديو: إيجاد قياسات الزوايا في مثلث بمعلومية قياس زاوية واحدة والعلاقة بين قياسَي الزاويتين الأخريين

في المثلث ﺃﺏﺟ، قياسات الزوايا بالدرجات عند ﺃ، ﺏ، ﺟ تساوي ٢ﺱ، (٣ﺱ + ٧)، ٤٣ على الترتيب. أوجد ق∠ﺃ، ق∠ﺏ.

٠٣:١٦

‏نسخة الفيديو النصية

في المثلث أ ب ج، قياسات الزوايا بالدرجات عند أ، وَ ب، وَ ج؛ تساوي اتنين س، وتلاتة س زائد سبعة، وتلاتة وأربعين على الترتيب. أوجد قياس زاوية أ، وقياس زاوية ب.

علشان نوجد قياس زاوية أ، وقياس زاوية ب، محتاجين نوجد قيمة س. فالأول هنوجد قيمة س. فبما إن مجموع قياسات زوايا المثلث الداخلية تساوي مية وتمانين درجة. فهيبقى قياس زاوية أ، زائد قياس زاوية ب، زائد قياس زاوية ج، يساوي مية وتمانين درجة.

ومعطى عندنا في المثال، قياس زاوية أ يساوي اتنين س درجة. وقياس زاوية ب يساوي تلاتة س زائد سبعة الكل درجة. وقياس زاوية ج يساوي تلاتة وأربعين درجة. فهنعوّض في العلاقة اللي عندنا، عن قياس زاوية أ باتنين س درجة. وعن قياس زاوية ب بتلاتة س زائد سبعة الكل درجة. وعن قياس زاوية ج بتلاتة وأربعين درجة.

فلمّا هنعوّض هيبقى عندنا اتنين س درجة، زائد تلاتة س زائد سبعة الكل درجة، زائد تلاتة وأربعين درجة، يساوي مية وتمانين درجة. ولمّا هنبسّط الطرف الأيمن من المعادلة، هيبقى عندنا خمسة س الكل درجة، زائد خمسين درجة، يساوي مية وتمانين درجة.

هنطرح من طرفَي المعادلة دي، خمسين درجة. فهيبقى عندنا خمسة س الكل درجة، يساوي مية وتلاتين درجة. معنى كده إن هيبقى خمسة س يساوي مية وتلاتين. بعد كده علشان نوجد قيمة س، هنقسم طرفَي المعادلة على خمسة. فهيبقى عندنا س تساوي ستة وعشرين. كده إحنا أوجدنا قيمة س، وهنستخدمها علشان نوجد قياس كلًّا من زاوية أ، وزاوية ب.

هنبدأ أول حاجة نوجد قياس زاوية أ. من المعطيات اللي عندنا، قياس زاوية أ يساوي اتنين س درجة. وإحنا أوجدنا قيمة س، وقيمة س تساوي ستة وعشرين. فهنعوّض عن س بستة وعشرين، عشان نوجد قياس زاوية أ. فلمّا هنعوّض عن س بستة وعشرين، هنلاقي إن قياس زاوية أ يساوي اتنين في ستة وعشرين درجة. واتنين في ستة وعشرين، يساوي اتنين وخمسين. يعني هيبقى قياس زاوية أ يساوي اتنين وخمسين درجة.

وبكده يبقى إحنا أوجدنا قياس زاوية أ، وهو اتنين وخمسين درجة. بعد كده هنوجد قياس زاوية ب. ومن خلال المعطيات اللي عندنا، فهنلاقي إن قياس زاوية ب يساوي تلاتة س زائد سبعة الكل درجة. فهنعوّض عن س بستة وعشرين. فهيبقى قياس زاوية ب، يساوي تلاتة في ستة وعشرين زائد سبعة الكل درجة. وتلاتة في ستة وعشرين زائد سبعة، يساوي خمسة وتمانين. يعني معنى كده إن قياس زاوية ب، يساوي خمسة وتمانين درجة. وبكده يبقى إحنا أوجدنا قياس زاوية ب.

بكده يبقى إحنا أوجدنا قياس كلٍّ من زاوية أ، وهو اتنين وخمسين درجة. وزاوية ب، وهو خمسة وتمانين درجة. وهو ده المطلوب.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.